Auala e Faatoese Atu Ai

LE LUʻI

Ua faatoʻā uma lava se lua taugāupu ma lau paaga. Ua e faapea ifo: ʻE lē tatau ona ou faatoese atu auā e lē o aʻu na māfua ai!’

Atonu e te lē o toe talanoa e faatatau i le mea na tupu, ae o loo iai pea ou faalogona lē fiafia. Ua e toe mafaufau e faatoese atu, ae e faigatā ona e faapea atu “Malie lou loto.”

LE POGAI

Faamaualuga. Ua taʻutino mai se tane e igoa iā Sale:a “O nisi taimi e faigatā ona ou fai atu ʻmalie lou loto,’ ona o oʻu manatu faualuga e uiga iā te aʻu lava.” O le iai o ni manatu faamaualuga e mafai ona musu ai se tasi e faailoa atu e iai foʻi lona sesē.

Ou manatu. E te ono manatu e faatoʻā manaʻomia lava ona e faatoese atu pe afai o oe e sesē. Ua taʻua e se avā e igoa iā Sili: ʻE faigofie lava ona ou faatoese atu pe afai ou te mautinoa o aʻu e sesē. Ae e faigatā tele pe afai o i maʻua uma na faia ni upu faatigā, auā aiseā ou te faatoese atu ai fua pe afai o i maʻua uma e sesē?’

E ono atili ona e taʻutonuina oe lava, pe afai e te manatu o lau paaga e tuuaʻia i le mea na tupu. Ua faapea mai se tane e igoa iā Iosefa: “Pe afai e te talitonu atoatoa e leai sau mea sesē na faia, o lou lē faatoese atu la e taʻu atu ai o oe e saʻo.”

Le auala na ola aʻe ai. Atonu na e ola aʻe i se aiga e seāseā ona faatoese atu tagata. O lea, atonu la e te lē iloa le auala e faailoa atu ai o oe e sesē. Pe afai e lē masani ona e faatoese atu a o e laʻitiiti, o le a faigatā la ona fai ma au masani le faatoese atu ma le lotoatoa, pe a oo ina e matua.

MEA E MAFAI ONA E FAIA

Ia uaʻi atu i lau paaga. Ia mafaufau i le lelei o ou faalogona i se taimi na faatoese atu ai se tasi iā te oe. Pe e te lē manaʻo ia oo foʻi na faalogona i lau paaga? E tusa pe e te manatu e lē o oe e sesē, ae e mafai ona e faatoese atu ona ua tigā faalogona o lau paaga, pe ona o ni āuga o au gaoioiga. O lou faatoese atu o le a foʻia ai le loto tigā o lau paaga.​—Mataupu silisili o le Tusi Paia: Luka 6:31.

Ia uaʻi atu i lau faaipoipoga. Ia aua neʻi manatu i le faatoese atu e pei ua e toʻilalo ai, ae ia manatu i ai o se auala e faamalosia ai lau faaipoipoga. Ua taʻua i le Faataoto 18:19, o le tagata e tumau lona ita “e sili ona faigatā o ia nai lo o se aai malosi.” E faigatā ona toe maua le filemu pe afai e tumau le ita o se tasi. Ae o lou faatoese atu o le a ʻalofia ai le avea o le mea na tupu ma faafitauli telē. O lea, ia faamuamua le lelei o lau faaipoipoga nai lo o oe lava.​—Mataupu silisili o le Tusi Paia: Filipi 2:3.

Ia vave ona faatoese atu. E moni e faigatā ona faatoese atu pe afai e lē na o oe e sesē. Peitaʻi, e lē avea le sesē o lau paaga ma faamolemolega o lou faaalia o uiga lē lelei. Ia aua le faatalatū e faatoese atu, ma mafaufau o le a galo le mea na tupu a o faagasolo taimi. O lou faatoese atu o le a faigofie ai foʻi i lau paaga ona faatoese mai. O le fai ma masani ona faatoese atu, o le a faigofie ai iā te oe ona faia faapea i so o se taimi.​—Mataupu silisili o le Tusi Paia: Mataio 5:25.

Ia faamaonia atu e moni lau faatoesega. E lē o se faatoese atu lou taumafai e taʻutonuina au gaoioiga. E lē o se faatoesega foʻi lou fai atu o ni tala tutui e pei o le, “Ou te faamalie atu ou te leʻi iloa e maʻaleʻale ou faalogona i laʻu mea na fai.” Ia talia lou sesē ma ia amanaʻia faalogona tigā o lau paaga, e tusa pe e te manatu e talafeagai pe e lē talafeagai lona lē fiafia.

Ia talia lou sesē. Ia talia ma le lotomaulalo e iai foʻi taimi e te sesē ai, auā e tofu le tagata ma lona sesē. E tusa pe e te manatu e matuā leai sou sesē, ae ia manatua o lou manatu e faatatau i le mea na tupu, atonu e lē o le mea atoa lenā na tupu. Ua taʻua i le Faataoto 18:17: “O lē e tautala muamua e tusa ma lana tagi faaletulafono, e amiotonu o ia; e sau lona tuaoi ma suʻesuʻe auʻiliʻili o ia.” O le a faigofie ona e faatoese atu pe afai e te talia e iai foʻi taimi e te sesē ai.