Tala e Uiga i Mafutaga a Tagata

Initia

I se suʻesuʻega na faia i le 2014, na iloa ai o le 61 pasene o talavou e 18-25 tausaga, e manatu o le feusuaʻi a o leʻi faaipoipo, “ua lē o toe avea o se mataupu maʻaleʻale i Initia.” Na taʻua e se fomaʻi i Mumbai i le nusipepa o le Hindustan Times, “pe a amata se faigāuō a ni talavou, e lē faapea ai ua latou mafaufau e faaipoipo. E tusa po o se paaga o le pō, o se faigāuō mo na o sina taimi, po o se faapouliuli, e lē manaʻomia fua ona faaipoipo.”

LE MANATU O LE TUSI PAIA: Pe e māfua faalogona tigā ma faamaʻi pipisi, ona o feusuaʻiga a o leʻi faaipoipo po o feusuaʻiga ina ua uma ona faaipoipo?—1 Korinito 6:18.

Tenemaka

O se tasi o māfuaaga ua faateteleina ai le vave feoti o tagata i le va o le 35 i le 50 tausaga, ona o le misa soo ma isi tagata o le aiga. I se suʻesuʻega na faia i le Iunivesite o Copenhagen mo le 11 tausaga i tagata e toetoe 10,000 e i le va o le 35 i le 50 tausaga, na iloa ai o ē na misa soo ma nisi e vavalalata i ai, e foliga mai na vave ona feoti nai lo o i latou e seāseā misa ma nisi. Na taʻua e se tusitala o lenei suʻesuʻega, o le taulimaina o popolega ma mea e ao ona faamuamua, ma le foʻia o feeseeseaʻiga, “atonu o ni auala tāua ia e faaitiitia ai le vave feoti.”

LE MANATU O LE TUSI PAIA: “O lē ua pulea ana upu ua iā te ia le poto, a o le tagata ua iai le faautaga loloto ua toʻafilemu lona loto.”—Faataoto 17:27.

Iunaite Setete

I se suʻesuʻega talu ai nei na faia i Louisiana i ulugalii e 564 faatoʻā uma ona faaipoipo, na iloa ai o ulugalii na fai ma faauma a latou faigāuō a o feoaʻi, atonu e ono iai se taimi e alu ai lava le tagata ia ma nofo i lona aiga, a o faagasolo uluaʻi tausaga e lima o le la faaipoipoga. E tele foʻi ina feeseeseaʻi ma e lē fiafia le la faaipoipoga.

LE MANATU O LE TUSI PAIA: “O ē ua faatasia e le Atua [i le faaipoipoga], aua neʻi tuueseeseina e se tagata.”—Mataio 19:6.