LE MANATU O LE TUSI PAIA
Agelu
E masani ona faaalia agelu i lomiga, ata tusi ma ata tifaga. Ae o ai agelu, ma o le ā la latou matafaioi?
O ai agelu?
MANATU O LE TUSI PAIA
A o leʻi foafoaina e le Atua le lagi ma le lalolagi faapea uluaʻi tagata, ua uma ona ia foafoaina foafoaga e sili atu ona atamamai i lo o tagata. E sili atu lo latou malolosi i lo o tagata, ma e iai i le nofoaga o loo afio ai le Atua, lea e lē mafai ona sao atu i ai se tagata ma e lē mafai ona vaai atu i ai. (Iopu 38:4, 7) Ua taʻua e le Tusi Paia nei foafoaga e sili atu o “agaga” ma “agelu.”—Salamo 104:4.a
E fia agelu o loo iai? E toʻatele. O agelu o loo siʻomia le nofoālii o le Atua e “mano ni mano,” pe “sefulu afe faatele i le faitau sefulu afe.” (Faaaliga 5:11; faaopoopoga pito i lalo) Pe a faatele numera nei, o le aofaʻi la o agelu e faitau selau miliona.
“Ua ou iloa . . . le tele o agelu o loo siʻosiʻomia le nofoālii . . . , ma o lo latou aofaʻi e mano ni mano.”—Faaaliga 5:11.
O le ā le matafaioi a agelu i aso anamua?
MANATU O LE TUSI PAIA
Na masani ona auauna agelu o ni fofoga fetalai po o ni avefeʻau a le Atua.b O loo taʻua foʻi i latou i le Tusi Paia o ē e faatinoina galuega mamana a le Atua. Na auina mai e le Atua se agelu e faamanuia Aperaamo, ma taofia o ia mai i le faaaogāina o lona atalii o Isaako e fai ma taulaga. (Kenese 22:11-18) Na faaali mai foʻi se agelu iā Mose i le ogatotonu o se laau na mumū, ina ia taʻu atu iā te ia se feʻau o le a suia ai lona olaga. (Esoto 3:1, 2) Ina ua lafo foʻi le perofeta o Tanielu i le lua o leona, “na auina mai e [le] Atua lana agelu e punitia gutu o leona.”—Tanielu 6:22.
“Ona faaali mai lea o le agelu a Ieova iā [Mose] i se afi mumū i le laau tuitui.”—Esoto 3:2.
O le ā le matafaioi a agelu i aso nei?
MANATU O LE TUSI PAIA
E lē mafai ona tatou iloa mea uma o loo faia e agelu i aso nei. Peitaʻi, o loo taʻua i le Tusi Paia o loo aofia agelu i le fesoasoani atu i tagata lotofaamaoni e aʻoaʻoina atili e faatatau i le Atua.—Galuega 8:26-35; 10:1-22; Faaaliga 14:6, 7.
Na vaaia e Iakopo i se miti na faaali mai e Ieova iā te ia, ni agelu o loo ō aʻe ma ō ifo i se apefaʻi i le va o le lagi ma le lalolagi. (Kenese 28:10-12) Ua faaalia i lenei miti o loo auina mai e Ieova le Atua agelu i le lalolagi mo ni tofiga faapitoa, e gaoioi mo le lelei o tagata lotofaamaoni o ē e manaʻomia lana fesoasoani.—Kenese 24:40; Esoto 14:19; Salamo 34:7.
“O se apefaʻi ua faatū i le eleele ma ua oo atu lona tumutumu i le lagi; ma vaai! o loo ō aʻe ma ō ifo ai agelu a le Atua.”—Kenese 28:12.
a Ua faaalia i le Tusi Paia nisi agaga na fouvale i le pule a le Atua, ma ua taʻua nei agelu leaga o “temoni.”—Luka 10:17-20.
b O le mea moni, o le uluaʻi upu Eperu ma le upu Eleni o loo faaaogā i le Tusi Paia mo le “agelu” o lona uiga o le “avefeʻau.”