Aʻoaʻo Fanau Ina ia Lotomaulalo

LE LUʻI

• Ua iai uiga faamaualuga o lou alo, ae e na o le sefulu ona tausaga.

• E na te faatalitalia e fai faalelei o ia e tagata uma.

Ua e mafaufau, ʻO le ā le mea ua tupu iā te ia? Ou te manaʻo ia ona lagona e iai lona aogā, ae e lē o le manatu e sili o ia i lo o isi.’

Pe e mafai ona aʻoaʻo se tamaitiiti ina ia lotomaulalo, e aunoa ma lona manatu ai ua leai sona aogā?

MEA E TATAU ONA E ILOA

I tausaga talu ai nei, na faalaeiauina ai mātua ina ia faia so o se mea e mananaʻo i ai a latou fanau; ia matuā viiviia i latou e tusa pe leai se māfuaaga tatau; ma aua le avatu ni faasaʻoga ma aʻoaʻiga. Na faia faapea ona o le manatu pe a matutua aʻe tamaiti, o le a latou lagona e tāua i latou. Ae o le ā le mea ua iloa mai i mea moni o loo tutupu? Ua faamatalaina i le tusi Generation Me: “O lenā uunaʻiga ua maua mai ai se ʻautau o tamaiti faamaualuluga, nai lo o ni tamaiti e usiusitaʻi ma fiafia.”

O le toʻatele o tamaiti e soona faaviivii, e feola aʻe e aunoa ma le sauniunia o i latou mo tulaga faanoanoa e tulaʻi mai, faitioga, ma tulaga e lē taulau ai. Talu ai na aʻoaʻoina i latou e faamuamua o latou lava manaʻoga, o le a faigatā la ona latou atiaʻe ni faauōga e tumau pe a oo ina avea ma tagata matutua. O le iʻuga, o le toʻatele o i latou e aafia i le popole ma le lotomafatia.

E atiaʻe e le fanau le lagona e iai moni lo latou aogā e ala i galuega e faia e i latou lava, ae e lē o le faaauau ona faamanatu atu i ai e faapitoa i latou. I lenā tulaga e lē lava le tau ina talitonu e iai so latou aogā. Ae e manaʻomia ona latou aʻoaʻoina, faataʻitaʻi, ma faaleleia ni tomai faapitoa. (Faataoto 22:29) E manaʻomia foʻi ona latou faamuamua manaʻoga o isi. (1 Korinito 10:24) O na vala uma e manaʻomia ai le lotomaulalo.

MEA E MAFAI ONA E FAIA

Ia avatu le faamālō pe afai e iai se māfuaaga tatau. Pe a lelei ni togi e maua e lou alo i lana suʻega, ia faamālō atu iā te ia. Ae pe afai e lē lelei, aua le vave ona tuuaʻia le faiaʻoga. O le faia faapea, o le a fesoasoani ai i lou alo e faaalia le lotomaulalo. O lea, ia fesoasoani iā te ia i auala e ono faaleleia ai ona togi i le suʻega. Ia manatua ia faamālō atu i lou alo pe a ia faia se mea lelei.

Ia avatu faasaʻoga pe a manaʻomia. E lē o le uiga o lenei manatu e tatau ona e otegiaina lou alo mo mea sesē uma e na te faia. (Kolose 3:21) Ae e tatau lava ona faasaʻo ni mea sesē matuiā. O le tulaga foʻi lenā e ao ona faia i ni uiga lē lelei e aliaʻe mai i lou alo. Pe a lē faia faapea, o le a atili ai ona mauaa i le loto o le tamaitiiti na uiga.

O se faataʻitaʻiga, seʻi faapea o le masaniga a lou alo o le gugutu. Pe afai e lē faasaʻoina o ia, e mafai ona ia faamaualuga ma amata ona ia lē amanaʻia ai isi. O lea, ia faamatala atu i lou alo o le gugutu e faaleagaina ai lona talaaga ma faamāsiasi ai o ia. (Faataoto 27:2) Ia faamatala atu foʻi iā te ia, o se tagata e iai se vaaiga mautinoa e faatatau iā te ia lava, e lē manaʻomia ona ia faasalalau atu i isi mea e mafai ona ia faia. O le avatu o faasaʻoga i se auala alofa, o le a e aʻoaʻoina ai o ia ina ia lotomaulalo e aunoa ma le manatu ua leai sona aogā.​—Mataupu silisili o le Tusi Paia: Mataio 23:12.

Ia sauniunia lou alo mo omiga e tulaʻi mai i aso taʻitasi. O le faia o mea uma e manaʻo i ai se tamaitiiti, o le a ia manatu ai o le mea lava lea e tatau ona iai. O lea, mo se faataʻitaʻiga, pe afai e manaʻo lou alo i se mea e te lē gafatia, ia faamatala atu iā te ia le māfuaaga e tāua ai ona ola e tusa ma tupe o loo maua. Pe afai ua tatau ona tolopō se tafaoga po o se faigāmalaga, e mafai ona e faapea atu i lou alo o mea masani ia e tutupu i le olaga, ma atonu e mafai ona e faamatala atu iā te ia le auala e te feagai ai ma na tulaga. Nai lo o le puipuia o lau fanau mai i luʻi uma o lenei olaga, ia sauniunia i latou mo luʻi o le a latou fesagaʻia pe a avea ma tagata matutua.​—Mataupu silisili o le Tusi Paia: Faataoto 29:21.

Ia faalaeiau lou alo e foaʻi atu. Ia faamaonia atu i lou alo “e sili le fiafia e maua i le foaʻi atu i lo o le talia mai.” (Galuega 20:35) E faapefea? E mafai ona oulua saunia faatasi se lisi o tagata o loo manaʻomia se fesoasoani i le faiga o faatau, se auala mo femalagaaʻiga, po o le faia o se galuega ina ia toe faaleleia ai se mea. Pe a uma, ona oulua ō faatasi lea e fai na galuega. Ia mātau mai e lou alo o loo e fiafia ma faamalieina a o e fesoasoani atu i isi. O lenei auala o le a aʻoaʻoina ai e lou alo le lotomaulalo i se auala e sili ona aogā, e ala lea i le faataatia o se faaaʻoaʻoga.​—Mataupu silisili o le Tusi Paia: Luka 6:38.