2 Galulue Faatasi

LE UIGA O LE GALULUE FAATASI

Pe a galulue faatasi le tane ma le avā, e tai pei i laʻua o se pailate ma lona soā pailate o loo galulue faatasi. Pe a tulaʻi mai faafitauli, e la te mafaufau mo lo la lelei nai lo o le lelei o le tagata lava ia.

MATAUPU SILISILI FAALE-TUSI PAIA: “Ua lē toe toʻalua ai, ae ua avea i laʻua ma tino e tasi.”​—Mataio 19:6.

“E lē faia aʻe le faaipoipoga i se tagata se toʻatasi. E ao ona galulue faatasi le tane ma le avā ina ia taulau ai.”​—Christopher.

LE TĀUA O LE GALULUE FAATASI

Pe a tulaʻi mai se feteenaʻiga, o se ulugalii e lē galulue faatasi e ono taulaʻi atu i sesē o le isi paaga nai lo o le taumafai e foʻia le faafitauli. O na faafitauli lāiti, e mafai ona iʻu atu ai i ni faafitauli matuiā.

“O le galulue faatasi o le vala autū lea o le faaipoipoga. Pe afai e ma te lē galulue faatasi ma laʻu tane, e tai pei i maʻua o ni tagata se toʻalua i se fale e tasi e lē tutusa o la manatu pe a faia ni filifiliga tāua.”​—Alexandra.

MEA E MAFAI ONA E FAIA

ILOILO OE LAVA

• Po ou te manatu i aʻu tupe maua “o aʻu e ana”?

• Pe e manaʻomia ona ou alu ese mai i loʻu toʻalua, ina ia mapu ai loʻu mafaufau?

• Po ou te ʻaloʻalo mamao i aiga o loʻu toʻalua e ui e māfana o ia iā i latou?

ILOILO FAATASI MA LAU PAAGA FAAIPOIPO

• O ā vala o le ta faaipoipoga e faaalia ai le ta galulue faatasi?

• O ā vala o le ta faaipoipoga e manaʻomia ona faaleleia ai le ta galulue faatasi?

• O ā mea e mafai ona ta faia e faaleleia ai le ta galulue faatasi?

FESOASOANI

• Faaāta i le mafaufau o loo lua faafesagaʻi ma lou toʻalua i se malae tenisi. Nai lo o lou taumafai e te manumalo i lau paaga faaipoipo, o ā laasaga e mafai ona e faia ina ia lua ʻau faatasi ai?

• Nai lo o le mafaufau e faapea, ʻE faapefea ona ou manumalo?’ ae ia fesili ifo ʻE faapefea ona ma manumalo?’

“Aua le mafaufau po o ai e saʻo pe sesē. E lē sili atu lenā i le mauaina o le filemu ma le autasi i le faaipoipoga.”​—Ethan.

MATAUPU SILISILI FAALE-TUSI PAIA: “Ia vaavaai ma le naunau e lē gata i au lava mea, ae i mea foʻi e lelei ai isi.”​—Filipi 2:3, 4.