11 Galue Mamafa

LE UIGA O LE GALUE MAMAFA

O tagata e galulue mamafa e latou te lē ʻalofia galuega. Peitaʻi, e latou te fiafia e faia faapea ina ia tausia ai o latou manaʻoga ma fesoasoani i isi, e tusa pe e faatauvaa a latou galuega.

LE TĀUA O LE GALUE MAMAFA

O le mea moni e tele tiute tauave i le olaga e tusa pe e te lē fiafia i ai. E toʻatele tagata e lē fiafia e galue mamafa, peitaʻi e iai itu e lelei ai le galue mamafa.​—Failauga 3:13.

“Na ou iloa pe a galue mamafa, o le a e mauaina le fiafia ma le faamalieina. O faalogona o le faamalieina na māfua ai ona ou fiafia e galue. O le iai o se masaniga o le galue mamafa e fesoasoani foʻi iā te oe e atiaʻe ai se talaaga lelei.”​—Reyon.

MATAUPU SILISILI FAALE-TUSI PAIA: “E iai le itu lelei e maua mai i ituaiga o galuega uma.”​—Faataoto 14:23.

MEA E MAFAI ONA E FAIA

Ia atiaʻe se vaaiga saʻo e faatatau i galuega i le iloiloina o vala o loo mulimuli mai.

Ia maua le fiafia i le faatinoina o mea i se auala lelei. E tusa lava pe faia ni feʻau, faauma au meaaʻoga, pe faigaluega foʻi, ia faia le mea sili e te mafaia. O le taimi lava e lelei ai ona e faataunuuina se galuega, ia saʻili nisi auala e faaleleia atili ai. O le tele o lou tomai e iai, o le tele foʻi lenā o lou fiafia i lau galuega.

MATAUPU SILISILI FAALE-TUSI PAIA: “Po ua e tagaʻi ea i se tagata tomai i lana galuega? O le a tū o ia i luma o tupu; e lē tū o ia i luma o tagata lautele.”​—Faataoto 22:29.

Ia taulaʻi atu i aogā. Pe afai e te manatu mamafa i au tiute tauave, o le a maua ai e isi aogā. O se faataʻitaʻiga, o le faia o au feʻau, o le a e faamāmā avega ai foʻi i isi sui o lou aiga.

MATAUPU SILISILI FAALE-TUSI PAIA: “E sili le fiafia e maua i le foaʻi atu i lo o le talia mai.”​—Galuega 20:35.

Ia faia nisi mea e sili atu. Nai lo o le faia o mea ua faatonuina e fai, taumafai ia faia nisi mea e sili atu. O le faia faapea, ua e pulea ai lou olaga e lē ona ua faamalosia oe e faia nisi mea e sili atu ae ona ua e filifili e faia faapea.​—Mataio 5:41.

MATAUPU SILISILI FAALE-TUSI PAIA: “Ia e faia i lou lotomalie le mea lelei e aunoa ma le faatauanauina.”​—Filemoni 14.

Ia paleni. O tagata e galulue mamafa e lē paiē pe naunau foʻi e faigaluega faasoloatoa. O lo latou sini ia paleni, i le mauaina o le fiafia i le galue mamafa faapea taimi o mālōlōga.

MATAUPU SILISILI FAALE-TUSI PAIA: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.”​—Failauga 4:6.