12 Sini

LE UIGA O LE SINI

E lē pei le sini o se miti. O le miti ua na o se mea e te moomoo o le a tupu. Peitaʻi o sini aogā i le olaga e aofia ai le faataatitia o fuafuaga, fetuutuunaʻi ma le galue mamafa.

E eseese sini e mafai ona ausia. O isi sini e ausia i se taimi puupuu, atonu i ni nai aso po o se vaiaso. O isi sini e feoloolo se taimi e ausia ai atonu i ni nai masina. Ae o nisi sini e umi atu se taimi e ausia ai, atonu i se tausaga pe sili atu foʻi, ma e manaʻomia ni sini puupuu ma sini feoloolo ina ia ausia ai lenei sini.

LE TĀUA O SINI

O le ausia o sini e faamalosia atili ai ou lagona mautinoa, faaleleia ai faauōga ma faateleina ai lou fiafia.

Lagona mautinoa: Pe a e faatutūina sini faigofie ma ausia, e faamalosia atili ai ou lagona mautinoa e taumafai e ausia sini faigatā. E te lagona foʻi le mautinoa pe a feagai ma faafitauli i aso taʻitasi e pei o le tetee atu i omiga mai i isi.

Faauōga: O le tele o taimi e fiafia tagata e faatasitasi ma i latou ua faataatitia ni sini, ma lotomalilie e galulue ina ia ausia. E lē gata i lea o se isi auala sili e faaleleia ai faauōga o le galulue faatasi lea ma se isi tagata i se sini e tasi.

Fiafia: E te lagona le fiafia pe a e ausia ni sini na e faatutūina.

“Ou te fiafia pe a iai ni oʻu sini. O le iai o ni sini e avea o se mea e pisi ai ma faaauau ai pea ona aapa atu ina ia ausia na sini. Pe a e ausia se sini, e te lagona le fiafia ma faapea ifo ʻUa ou faataunuuina oʻu sini na ou manaʻo e ausia.’”​—Christopher.

MATAUPU SILISILI FAALE-TUSI PAIA: “O lē e matamata i le matagi e lē lūlū fatu o ia; o lē foʻi e vaavaai i ao e lē selesele lava o ia.”​—Failauga 11:4.

MEA E MAFAI ONA E FAIA

Ia faaaogā auala nei e faataatitia ma ausia ai ou sini.

Ia iloa ou sini. Ia fai se lisi o sini e mafai ona e ausia, ma faatulaga na sini po o lē fea e te manaʻo e galue muamua i ai.

Ia fuafua lelei ou sini. I sini taʻitasi ia mulimuli i auala nei:

• Ia faatulaga le aso e ausia ai lou sini ma ia fetuutuunaʻi.

• Ia fuafua lelei vala e aofia ai i le ausiaina o lou sini.

• Ia mafaufau i faafitauli e ono tulaʻi mai ma le auala e taulima ai na faafitauli.

Ia faatino ou sini. Aua le faatali seʻia iai uma faamatalaga manaʻomia ina ia amata ai se sini. Ia iloilo po o le ā le mea muamua e mafai ona e faia ina ia ausia ai lou sini ma ia faia faapea. Pe a uma vala taʻitasi nei ia iloilo po o agaʻigaʻi i luma lou sini.

MATAUPU SILISILI FAALE-TUSI PAIA: “O fuafuaga a le tagata toʻaga e manuia ai o ia.”​—Faataoto 21:5.