3 Faaaloalo

LE UIGA O LE FAAALOALO

Pe a faaalia e paaga taʻitasi le faaaloalo, o le a alofa pea le tasi i le isi e ui e lē tutusa o la manatu i se mea. Na taʻua e le tusi o le Ten Lessons to Transform Your Marriage e faapea, “O nei ulugalii e lē maumauaʻi e tausisi i o la manatu. Nai lo o lea, e la te talanoa pea e faatatau i mea e lē malilie i ai. E la te faalogologo atu ma le faaaloalo i manatu o le isi paaga ma faia ni fetuunaʻiga e malilie uma i ai.”

MATAUPU SILISILI FAALE-TUSI PAIA: ʻE lē saʻili le alofa mo lona lava lelei.’​—1 Korinito 13:4, 5.

“O le faaaloalo i laʻu avā o lona uiga ou te faatāuaina o ia ma ou te lē manaʻo e faia se mea e faalumaina ai o ia pe faaleagaina ai le ma faaipoipoga.”​—Micah.

LE TĀUA O LE FAAALOALO

Pe a aunoa ma le faaaloalo, o le a amata ona faaaofia e ulugalii i a la talanoaga le faitio, faamatalaga tutui, ma upu faalumaluma. Ua faapea mai tagata suʻesuʻe, o nei uiga o faailoga muamua ia e ono iʻu atu ai i le tatala o le faaipoipoga.

“O le faia o faamatalaga tigā, faamatalaga faalumaluma po o ni tala tausua e faatatau i lau avā, e ono mou atu ai ona faalogona mautinoa, lona maufaatuatuaina o oe, ma faaleagaina ai le lua faaipoipoga.”​—Brian.

MEA E MAFAI ONA E FAIA

ILOILO OE LAVA

Ia mātau lelei po o ā au faamatalaga ma gaoioiga mo se vaiaso, ona e fesili ifo lea:

• ʻO le ā le tele ou te faitio ai i laʻu paaga, ma o le ā le tele ou te faamālō atu ai?’

• ʻO ā auala patino sa ou faaalia ai le faaaloalo i laʻu paaga?’

ILOILO FAATASI MA LAU PAAGA FAAIPOIPO

• O ā gaoioiga ma upu e mafai ona lua lagona ai le faaaloalo?

• O ā gaoioiga ma upu e lua te lagona ai le lē faaaloalo?

FESOASOANI

• Ia tusi i lalo ni auala se tolu e te manaʻo e faaalia ai e lau paaga le faaaloalo. Ia faia foʻi faapea e lau paaga, ona fesuiaʻi lea o lua lisi ma galulue ai i na vala.

• Ia tusi i lalo ni uiga o lau paaga e sili ona e fiafia i ai, ma faailoa atu iai lou matuā talisapaia o na uiga.

“O le faaaloalo i laʻu tane o lona uiga ou te faaalia e ala i aʻu gaoioiga loʻu faatāuaina o ia ma ou te manaʻo e na te maua le fiafia. E lē manaʻomia ona faia se gaoioiga telē ma i nisi taimi o le faia o gaoioiga lāiti e mafai ona faailoa atu ai le faaaloalo moni.”​—Megan.

E lē tāua lou manatu pe e te faaaloalo pe leai, ae o le mea tāua po o lagona e lau paaga o loo e faaaloalo iā te ia.

MATAUPU SILISILI FAALE-TUSI PAIA: “Ia oofu outou i le alofa mutimutivale, le agalelei, lotomaulalo, agamalu ma le faapalepale.”​—Kolose 3:12.