O le Tigā Matuitui o le Faavauvau

“Na ma faaipoipo ma Sophiaa i le silia ma le 39 tausaga ae maliu loa i se maʻi faaumiumi. Na ou maua le tele o le fesoasoani mai i aʻu uō, ma sa tele ina ou pisi. Peitaʻi, na atoa lelei le tausaga o tumau pea oʻu faalogona tigā. Na fesuisuiaʻi oʻu faalogona i taimi uma. E oo mai lava i le taimi lenei, e toetoe 3 tausaga talu ona maliu laʻu avā ae o loo faaauau pea ona iai oʻu faalogona tigā.”—Kostas.

Po ua maliu sē e pele iā te oe? Afai o lea, atonu e te malamalama i faalogona o Kostas. E leai se mea e sili ona tigā nai lo o le maliu o sau paaga faaipoipo, tauaiga po o sau uō. E ioe foʻi tagata atamamai e suʻesuʻeina lenei mataupu i lenā manatu. O loo taʻua i se mataupu i le The American Journal of Psychiatry, “o le oti o se mafatiaga tumau ma e sili ona tigā.” O le feagai ai ma nei faalogona tigā atonu e tuufesili ai nisi: ʻO le ā le umi o le a i ai nei faalogona? Po o le a ou toe maua le fiafia? E faapefea ona ou maua se fesoasoani?’

O le a iloiloina i lenei Ala Mai! tali o nei fesili. O le mataupu o loo sosoo mai, o le a talanoaina ai mea e te faatalitalia pe afai o loo e aafia i faalogona faavauvau. O isi mataupu o loo i ai, o le a talanoaina ai auala e fesoasoani e faaitiitia ai na faalogona.

E matou te faamoemoe o faamatalaga o loo mulimuli mai, o le a avea ma faamāfanafanaga ma fesoasoani talafeagai i so o se tasi o loo feagai ma ni faalogona faavauvau.