LESONA 5

Le Tāua o le Taʻitaʻiga a Tagata Matutua

O AI E TATAU ONA TAʻITAʻIA LE FANAU?

E manaʻomia e le fanau ni tagata matutua e mafai ona saunia le taʻitaʻiga ma fautuaga. I le avea ai o se matua, e ao ona e saunia le fesoasoani mo lau fanau auā o lou tiute tauave lenā. Peitaʻi, e mafai foʻi e isi tagata matutua ona avatu le fesoasoani ma fautuaga mo le fanau.

AISEĀ E TĀUA AI LE TAʻITAʻIGA A TAGATA MATUTUA?

I le tele o atunuu, e itiiti se taimi e faatasitasi ai talavou ma tagata matutua. Seʻi mātau:

E faaalu e le fanau le tele o lo latou taimi i le aʻoga, lea e toʻatele ai tamaiti aʻoga nai lo faiaʻoga ma isi tagata matutua.
A tuua aʻoga, e foʻi atu nisi talavou i le fale e lē o iai mātua ona o loo faigaluega uma.
Na maua mai i se suʻesuʻega na faia i le Iunaite Setete, i se fua faatatau, e toetoe ono itula i le aso e faaaluina e le fanau e i le va o le 8 ma le 12 tausaga, i faafiafiaga i luga o masini faatekinolosi.a

Ua taʻua i le tusi Hold On to Your Kids e faapea: “Ua saʻilia e talavou faatonuga, taʻitaʻiga ma fautuaga e lē mai i mātua, faiaʻoga ma isi tagata matutua ae mai . . . i isi talavou.”

LE AUALA E SAUNIA AI LE TAʻITAʻIGA

Faaalu se taimi ma lau fanau.

MATAUPU SILISILI FAALE-TUSI PAIA: “Ia aʻoaʻo le tama e tusa ma le ala saʻo; a oo ina toeaina lava e lē liliuese ai o ia.”—Faataoto 22:6.

O le tele o taimi, o le faanaunauga o le fanau ia faalagolago atu i mātua mo le taʻitaʻiga. O le mea moni ua taʻua e tagata atamamai, a o faasolo ina avea fanau ma talavou, e latou te faatāua fautuaga mai i o latou mātua nai lo o fautuaga mai i isi talavou. Na taʻua e Dr. Laurence Steinberg i le tusi You and Your Adolescent e faapea, “O loo avea pea mātua ma taaʻiga autū i uiga ma amioga a fanau a o talavou ma faasolosolo ina avea ma tagata matua. E fia iloa e talavou mea o loo mafaufau i ai mātua ma mea o loo fai atu ai e tusa lava pe lē ioe i ai.”

Talu ai e manaʻomia e le fanau lau taʻitaʻiga o se matua, ia e faaaogā lenā avanoa e avatu ai le taʻitaʻiga o loo manaʻomia e lau fanau. Ia faaalu se taimi ma lau fanau ma fefaasoaaʻi i ou manatu, o mea e tāua iā te oe ma mea na e aʻoaʻoina mai i le olaga.

Ia saunia ni taʻitaʻiga.

MATAUPU SILISILI FAALE-TUSI PAIA: “O lē e savali ma tagata atamamai, e atamai ai o ia.”—Faataoto 13:20.

Pe e iai se tagata e mafai ona avea o se faataʻitaʻiga lelei i lau fanau talavou? Pe e mafai ona e faatulaga se taimi ma lenā tagata e faatasitasi ai ma ia? E lē o uiga atu i le tuulafoaʻi o lau tiute faamatua e faia e isi. Ae o faalaeiauga mai i se tagata matua e te talitonuina, o le a mafai ona fesoasoani i le toleniina o lau fanau. I le Tusi Paia, na maua e Timoteo aogā mai i le faatasitasi ma Paulo, ma na maua foʻi e Paulo aogā mai i le la faauōga ma Timoteo.—Filipi 2:20, 22.

I le senituri ua mavae, o le tele o aiga ua lē o toe nonofo faatasi. O nisi tauaiga ua nonofo i isi vaipanoa o le lalolagi. Afai o le tulaga lenā o lou aiga, ia taumafai e saunia ni avanoa e aʻoaʻoina ai e lau fanau ni uiga lelei, mai i taaʻiga lelei a tagata matutua.

a Ua taʻua atili, i se fua faatatau e toetoe iva itula i le aso e faaaluina e talavou i faafiafiaga i luga o masini faatekinolosi. O nei faamaumauga, e lē o aofia ai le taimi o loo faaaluina e fanau ma talavou i le faia o meaaʻoga i luga o le initaneti.

Ua Faapea Mai Isi Mātua . . .

“I nisi taimi ou te pisi tele ae faapea mai loʻu afafine e iai se mea e fia talanoa mai ai. Ou te faamautinoa e tāua o ia iā te aʻu, e tusa pe ou te fai atu i ai e faatali mo ni nai minute ina ia mafai ona ou uaʻi atu atoatoa iā te ia. E ma te taumafai ma laʻu avā i le tele e mafai ai, ina ia faataatia se faaaʻoaʻoga lelei mo ia ma iloa ai o loo ma ola e tusa ma mea o loo ma aʻoaʻoina ai o ia.”—David.

“Ina ua fanau le ma tama teine, na ma filifili ai loa ma laʻu tane ia ou nofo mai le galuega ina ia tausia le ma tama. Ou te leʻi salamō i laʻu filifiliga na fai. E tāua tele le faatasi ma le fanau i le tele e mafai ai, ina ia mafai ona avatu le taʻitaʻiga ma faatonuga. Ae sili atu i lenā, o le faaalu o se taimi faatasi ma lau fanau, e taʻu atu ai o oulua o ni mātua alolofa ma o loo lua naunau atu foʻi iā i latou.”—Lisa.

FAAALUINA O LE TAIMI MA TAGATA MATUTUA

“Na feola aʻe laʻu fanau faatasi ma tagata matutua e eseese siʻomaga, ma na fesoasoani lenā e faalautele ai lo latou vaai i le olaga e ala i mea na tutupu i isi. Mo se faataʻitaʻiga, na faateʻia i latou ina ua faamatala atu e le tinā o loʻu tinā, o i latou le aiga muamua na iai se molī e ola i le eletise i lo latou vaipanoa. Na ia taʻua foʻi, na ō mai aiga tuaoi i lo latou fale ma tutū i le umukuka, e tau lava ina matamata i le auala e ki ma tapē ai le molī. O le faalogo atu o laʻu fanau i mea na tutupu i le olaga o le loomatua, na mafai ai ona latou faaalia le faaaloalo iā te ia faapea isi tagata matutua. Pe a faaalu le tele o le taimi o le fanau ma tagata matutua nai lo o latou lava tupulaga, o le a tele atu mea e mafai ona latou aʻoaʻoina.”—Maranda.