AUALA E FEAGAI AI MA LE TAUGATĀ O LE SOIFUAGA

Ia Faamoemoe o le a Faaleleia le Tulaga o Mea

Po o taugatā le soifuaga i le tou atunuu ae lāiti totogi o tagata? Po o e popole pe e faapefea ona tausia oe ma lou aiga? Pe afai o ou faalogona na, atonu la o loo e popole i le lumanaʻi. E tusa pe e faigatā lou tulaga, ae e tāua tele lenei uiga o le faamoemoe.

LE MĀFUAAGA E TĀUA AI

O le faamoemoe e lē na o le moomoo ia tutupu ni mea lelei, ae e uunaʻia ai se tasi e gaoioi ma faaaogā lelei mea o loo iā te ia. O se faaaʻoaʻoga, ua faaalia i suʻesuʻega, o tagata e iai lenei uiga o le faamoemoe . . .

e mafai ona latou onosaia tulaga faigatā
e mafai ona fetuutuunaʻi o latou olaga i suiga e tulaʻi mai
e mafai ona faia ni filifiliga lelei, e aofia ai le tausia o le soifua mālōlōina

MEA E MAFAI ONA E FAIA

Muamua, ia mafaufau i auala e fesoasoani ai le Tusi Paia iā te oe i aso nei. E tele fautuaga aogā o loo i le Tusi Paia e fesoasoani iā te oe e feagai ai ma le taugatā o le soifuaga. O nei fautuaga ma isi manatu lelei, e mafai ona fesoasoani iā te oe e lavātia ai tulaga faigatā i le taimi lenei, faapea isi faafitauli e tulaʻi mai i le lumanaʻi.

“E leoleoina oe e le mafaufau lelei, e malupuipuia foʻi oe i le faautaga loloto.”—Faataoto 2:11.

Lua, ia mafaufau i folafolaga a le Tusi Paia mo le lumanaʻi. O lou iloa o le tāua o fautuaga atamai o loo i le Tusi Paia, e uunaʻia atili ai oe e saʻiliʻili i folafolaga a le Tusi Paia e faatatau i le lumanaʻi. O se faataʻitaʻiga, ua folafola mai e le Atua o le a ia avatu iā te oe “se lumanaʻi ma se faamoemoe.” (Ieremia 29:11) O le a faataunuuina lenā folafolaga e ala i le Malo o le Atua.

O LE Ā LE MALO O LE ATUA? O LE Ā O LE A FAIA E LENĀ MALO?

O le Malo o le Atua o se pulega i le lagi lea o le a pulea le lalolagi atoa. (Tanielu 2:44; Mataio 6:10) O le a aveesea e lenā Malo mafatiaga ma le tulaga mativa, ae aumaia le filemu i tagata faapea le tele o mea e latou te manaʻomia, e pei ona faaalia i mau nei.

“E te fiafia ma e taulau manuia.”—Salamo 128:2.

“O le a lē galulue fua i latou [o tagatānuu o le Malo].”—Isaia 65:23.

“O le a tele saito i le laueleele.”—Salamo 72:16.

E faitau miliona tagata e latou te maufaatuatuaina na folafolaga, auā e latou te talitonu “e lē mafai ona tala pepelo” le Atua. (Tito 1:2) E faalaeiauina oe e suʻesuʻeina le Tusi Paia. O le faia faapea, o le a faamalosia ai lou faamoemoe e onosaia tulaga faigatā tau tamaoaiga, ma tulimataʻia ai se olaga fiafia i le lumanaʻi.