Polokalame mo le Atiina Aʻe o Tomai i le Avea o se Failauga ma se Faiaʻoga

E TUSA lava pe e te talavou po ua afu foʻi lou soifua, po o oe o se alii po o se tamaʻitaʻi, e mafai lava ona fesoasoani le polokalame lenei iā te oe i se auala e sili ona lelei e faailoa atu ai oe, ma ia avea ma faiaʻoga e sili ona agavaa o le Afioga a le Atua.

O tofiga mo i latou e auai i le Aʻoga o le Faiva Faatiokarate e saunia e le ovasia o le aʻoga. O isi itulau e tolu o loo sosoo mai, o le a e maua ai lau lava pepa mo le faatonutonuina. O fuainumera o loo amata ai manatu eseese e fesootaʻi i suʻesuʻega o loo i itulau o mulimuli mai. I totonu o na suʻesuʻega o le a e maua ai faamatalaga i mea e aofia i le faaleleia o nei vala o le tautala ma le aʻoaʻo atu atoa ma le pogai e tāua ai nei vala taʻitasi. O le a e maua ai foʻi taʻiala e fesoasoani i le auala e mafai ona fai ai mea o loo fautuaina mai.

O lanu e pei ona faatulaga mai i le pepa mo le faatonutonuina, e faailoa ai po o lē fea manatu e faatatau i tofiga na e aofia ai (1) le faitau atu i se aofia, (2) se faataʻitaʻiga ma ni tagata se toʻalua pe sili atu, pe o (3) se lauga atu i le faapotopotoga. O le a tofia atu e le ovasia o le aʻoga le manatu o le a e galue i ai. E sili ona lelei le galue i se manatu se tasi i le taimi e tasi. O le a e maua aogā e ala i le fai o le mea e ao ona fai o loo fautuaina i le faaiʻuga o le suʻesuʻega ua tofia mai. Afai e te faaalia mai faamaoniga e faapea ua lelei ona e faatatauina le fautuaga i le suʻesuʻega e pei ona fuafuaina, o le a tofia atu e le ovasia se isi manatu iā te oe.

Afai o lou tofiga e taulima o se faataʻitaʻiga, e te manaʻomia la se faatulagaga. O loo iai le lisi o faatulagaga i le itulau e 82, peitaʻi e lē na pau na o faatulagaga e mafai ona e faia. E ono fautuaina oe e le ovasia e faataʻitaʻi se isi faatulagaga ina ia maua ai le poto masani, ia pe e tuu mai foʻi e filifili oe i le faatulagaga e faaaogā.

O le faitauina o le tusi lenei ma fai mea e ao ona fai e tusa lava pe e te lē o sauniuni mo ni tofiga o le aʻoga, o le a matuā saosaolaumea i lou alualu i luma. E te ono mafai ona faia se suʻesuʻega se tasi i vaiaso taʻitasi.

E tusa lava po o le ā le umi talu ona e auai i le aʻoga, po o le auai foʻi i le faiva i le fanua, ae o loo iai lava le avanoa mo le faia atili o faaleleiga. Tau ina ia e mauaina atoatoa aogā mai aʻoaʻoga o loo saunia e ala mai i le Aʻoga o le Faiva Faatiokarate.