Tusi o le Tusi Paia Numera 32—Iona
Lē na Tusia: Iona
Māeʻa Ona Tusia: Pe tusa o le 844 T.L.M.
SA AVEA Iona ma misionare i se isi atunuu i le iva senituri T.L.M.! Sa faapeʻī lona manatu i lona tofiga mai iā Ieova? O ā nisi mea fou na oo iā te ia ona o lenei tofiga? Pe sa talia fiafia o ia e tagata i le mea na tofia o ia e galue ai? O le ā se lelei na iai lana talaʻiga? O loo taliina fesili nei i le tala mataʻina i le tusi o Iona. Na tusia i le vaitaimi ina ua lafoaʻi e le nuu filifilia o Ieova le feagaiga ma ia, ae liliu atu i ifoga i tupua faapaupau, ua faaalia ai i le faamaumauga faavaloaga e faapea, o le alofa mutimutivale o le Atua e lē faapitoa i se nuu se tasi, e lē faapea foʻi na o Isaraelu. E lē gata i lenā, o loo faasilisilia ai le tele o le alofa mutimutivale ma le alofa agalelei o Ieova, e tuufaafeagai i le leai o se alofa mutimutivale, onosai, ma le faatuatua lea e masani ona mātauina i tagata lē lelei atoatoa.
2 O le igoa Iona (faa-Eperu, Yoh·nahʹ) o lona uiga o le “Lupe.” O ia o le atalii o le perofeta o Amitai i Kataferu i Kalilaia i le nuu o Sepulona. I le 2 Tupu 14:23-25 tatou te faitau ai e faapea, sa faalautele atu e Ierepoamo le tupu o Isaraelu ia tuaoi o le nuu e tusa ai o afioga na tulei mai ai Ieova e ala mai iā Iona. Ua mafai ai i lenei mea ona faatulaga le taimi na vavalo mai ai Iona pe tusa o le 844 T.L.M., o le tausaga o le tulaʻi mai o Ierepoamo II e fai ma tupu o Isaraelu ma i le tele o tausaga a o lumanaʻi le pulea o Isaraelu e Asuria, ma lona laumua o Nineva.
3 E lē fesiligia le moni aʻiaʻi o le tala atoa a Iona. O ‘Iesu lē na te faaatoatoaina lo tatou faatuatua,’ sa faasino atu iā Iona e faapea o ia o se tagata soifua moni lava, ma sa ia aumaia se faauigaga o ni mea faavaloaga se lua na tutupu o loo i le Iona, lea ua faaalia ai o loo iai i le tusi valoaga moni. (Epe. 12:2; Mata. 12:39-41; 16:4; Luka 11:29-32) E masani lava ona tuu e tagata Iutaia le tusi o Iona faatasi ma a latou tusi o le Tusi Paia ua faamaoniaina ma e manatu i ai o vaega o le talafaasolopito. O le faamaoni o Iona lava ia i le faamatalaina o ana mea sesē ma vaivaiga, e aunoa ma se taumafai e ufiufi, ua faailogaina ai foʻi le faamaoni o le tusi o Iona.
4 Ae faapefea le “iʻa tele” na foloina Iona? E anoanoaʻi taumatematega o loo iai po o le ā le ituaiga iʻa na foloina Iona. E mafai e le tafolā telē ulu faatafafā (sperm whale) ona foloina atoa se tagata. E faapena foʻi le malie paʻepaʻe lapoʻa. Ae e na ona faapea mai lava o le faamatalaga a le Tusi Paia: “Na tofia e Ieova le iʻa tele e foloina Iona.” (Iona 1:17) E lē o faamaʻoti maia po o le ā le ituaiga iʻa. E lē mafai ona iloa po o le ā tonu lava le iʻa, po o se tafolā telē, po o se malie paʻepaʻe lapoʻa, ia po o se isi meaola e lē mailoa o le sami.a O le tala a le Tusi Paia faapea o le “iʻa tele” ua lava lea mo lo tatou iloa.
LE POGAI E AOGĀ AI
9 O le auala na gaoioi ai Iona ma le iʻuga na oo i ai, e ao ona avea o se lapataʻiga mo i tatou. Na sola ese Iona mai le galuega na tofia mai e le Atua; sa tatau lava ona ia talia le galuega ma faalagolago atu i le Atua e fesoasoani mai iā te ia. (Iona 1:3; Luka 9:62; Faata. 14:26; Isa. 6:8) Ina ua ia agaʻi atu i le itulagi sesē, sa ia faaalia se uiga lē lelei i le lē taulau lea ona faailoa atu i le ʻauvaa e faapea o ia o se tagata tapuaʻi iā “Ieova le Atua o le lagi.” Ua lē o toe iai sona loto tele. (Iona 1:7-9; Efe. 6:19, 20) O le manatu ifo o Iona mo lona lava lelei, na faapogaia ai o ia e manatu i le alofa mutimutivale o Ieova agaʻi i Nineva e faapea o se teena totino o ia; sa ia taumafai e taʻusaʻoina ia lava e ala i le fai atu iā Ieova faapea, na ia silafia lava mai le amataga o le iʻuga lea e oo i ai ae aiseā la na auina atu ai o ia o se perofeta? Sa aʻoaʻia o ia ona o lenei uiga lē faaaloalo ma le faitio, o lea la e ao ona aogā iā i tatou le mea na tupu iā te ia ma ʻaloese mai le suʻesuʻe masei i le faaalia e Ieova o le alofa mutimutivale po o lana auala e fai ai mea.—Iona 4:1-4, 7-9; Fili. 2:13, 14; 1 Kori. 10:10.
10 E laualuga i isi mea uma i le tusi a Iona le faaataina mai e le tusi o uiga matagofie o Ieova, o lona alofa agalelei ma le alofa mutimutivale. Sa faaalia e Ieova le alofa agalelei agaʻi i Nineva e ala i le auina atu o lana perofeta e lapataʻi atu e uiga i le faaumatiaga o loo faaloloʻi mai, ma sa ia sauni e faaalia le alofa mutimutivale pe a salamō le aai—le alofa mutimutivale lenā na faasaoina ai Nineva mo le sili atu i le 200 tausaga seʻia oo ina faaumatia e Metai ma Papelonia pe tusa o le 632 T.L.M. Sa ia faaalia le alofa mutimutivale iā Iona i le faasaoina o ia mai le sami sousou i le matagi, atoa ma le saunia o le kikaiona e “laveaʻi iā te ia ai lona tigā.” E ala i le saunia o le kikaiona e fai ma puipuiga ona toe aveese lea, sa faailoa atu ai e Ieova iā Iona e faapea, e Na te faaalia le alofa mutimutivale ma le alofa agalelei e tusa ai ma Lona lava finagalo malie.—Iona 1:2; 3:2-4, 10; 2:10; 4:6, 10, 11.
11 I le Mataio 12:38-41, na taʻu atu ai e Iesu i taʻitaʻi lotu e faapea, na pau le faailoga e avatu iā i latou o “le faailoga o Iona.” Ina ua mavae aso e tolu ma pō e tolu i “le mea maulalo i tuugamau,” na alu atu ai loa Iona ma talaʻi i Nineva, o lea na avea ai ma “faailoga” i tagata Nineva. (Iona 1:17; 2:2; 3:1-4) E faapena foʻi Iesu, sa ia faaaluina se vaega o aso e tolu i le tuugamau ma sa toe faatū mai. Ina ua faamatala atu e ona soo faamaoniga o lenā mea na tupu, sa avea ai Iesu ma faailoga i lenā tupulaga. E tusa ai o le auala a tagata Iutaia mo le fuaina o le taimi ma mea moni na faataunuuina i le tulaga o Iesu, o le vaitaimi lenei o le “tolu ao e tolu foʻi pō” e mafai ona itiiti ifo i aso atoatoa e tolu.b
12 I le talanoaga lava lenei, sa faaeseese ai e Iesu le salamō o tagata Nineva ma le loto maaa ma le matuā tetee mai na oo iā te ia mai i tagata Iutaia i le taimi o lana foʻi faiva, lea na ia faapea mai ai: “E tutū tagata o Nineva i le faamasinoga faatasi ma le tupulaga nei, e faasala i ai; auā na latou salamō i le talaʻiga a Iona; faauta foʻi, o i inei lava lē sili iā Iona.” (Tagaʻi foʻi i le Mataio 16:4 ma le Luka 11:30, 32.) “Lē sili iā ona”—o le ā sa uiga i ai nei afioga a Iesu? Sa ia faatatau atu iā te ia o le perofeta sili i perofeta uma, o Lē na auina mai e Ieova e talaʻi: “Inā salamō ia outou; auā ua latalata mai le malo o le lagi.” (Mata. 4:17) Ae ui lava i lea, o le toʻatele o Iutaia i lenā tupulaga na teea “le faailoga o Iona.” Ae faapefea aso nei? E ui lava e toʻatele latou te lē o utagiaina le feʻau o le lapataʻiga mai iā Ieova, ae faitau afe i latou i le lalolagi atoa ua maua le avanoa matagofie e faalogo ai i le tala lelei o le Malo o le Atua lea na uluaʻi talaʻia e Iesu, “le Atalii o le tagata.” E pei lava o tagata Nineva na salamō, lea na latou maua aogā o le talaʻiga a Iona, o le a faapena foʻi tagata nei latou te ono mauaina le sauniuniga maoaʻe ma le alofa mutimutivale mo le soifua faafualoa, auā e moni lava e “mai iā Ieova le olataga.”—Iona 2:9.
[Faaopoopoga i lalo]