E toʻafia ni Molimau a Ieova e te silafiaina? O nisi o i matou atonu o ni ou tuaoi, faigaluega pe aʻoʻoga faatasi. Pe atonu foʻi na matou faia muamua se talanoaga faale-Tusi Paia faatasi ma oe. O ai moni lava i matou, ma aiseā e matou te faasoa atu ai i le lautele o matou talitonuga?

O i matou o tagata e pei foʻi o outou. E eseese o matou talaaga ma tulaga. O nisi o i matou na auai muamua i nisi lotu, a o nisi e leʻi talitonu i le Atua. Peitaʻi, a o leʻi avea ma Molimau a Ieova, sa matou faaaluina le tele o le taimi e suʻesuʻe māeʻaeʻa ai aʻoaʻoga a le Tusi Paia. (Galuega 17:11) Na matou ioeina mea na aʻoaʻoina ma faia loa se filifiliga e tapuaʻi atu iā Ieova le Atua.

Ua matou maua aogā mai le suʻesuʻeina o le Tusi Paia. I le pei o le toʻatele, e ao ona matou taulimaina o matou lava faafitauli ma vaivaiga. Ae o le taumafai e faatatau mataupu silisili o le Tusi Paia i o matou olaga i aso uma, ua matou tofo ai i suiga mataʻina i o matou olaga. (Salamo 128:1, 2) O se tasi lea o māfuaaga e matou te faasoa atu ai i isi mea lelei ua matou aʻoaʻoina mai le Tusi Paia.

E matou te ola e tusa ai ma tapulaa a le Atua. O nei tapulaa e pei ona aʻoaʻoina i le Tusi Paia, e fesoasoani mo lo matou lelei ma faaalia ai le faaaloalo i isi, faapea uiga e pei o le faamaoni ma le agalelei. E fesoasoani nei tapulaa i le agaʻigaʻi i luma ma le mauaina o ni olaga lelei o tagata lautele, ma faalaeiau le autasi ma amioga mamā i le aiga. Talu ai ua matou talitonu “e lē faailogaina tagata e le Atua,” ua matou auai ai i se aiga faavaomalo o se ʻauuso faaleagaga, e saʻoloto mai i le faailoga tagata ma faiga faapolotiki. E ui lava o i matou o tagata e pei foʻi o isi, ae o i matou o ni tagata e mataʻina i le vaaiga a isi.​—Galuega 4:13; 10:34, 35.

• O le ā le mea e tutusa ai Molimau a Ieova ma isi tagata?

• O ā tapulaa ua aʻoaʻoina e Molimau a Ieova mai i le Tusi Paia?

E manatu le toʻatele o Molimau a Ieova o le igoa o se tapuaʻiga fou. Peitaʻi, i le silia ma le 2,700 tausaga ua mavae, na taʻua ai auauna a le Atua moni e toʻatasi o ana “molimau.” (Isaia 43:10-12) E oo mai i le tausaga 1931, sa iloa i matou o Tagata Aʻoga o le Tusi Paia. Aiseā ua suia ai lo matou igoa i Molimau a Ieova?

E iloa ai lo matou Atua. E tusa ai ma faamaumauga i manusikulipi mai anamua, e silia i le fitu afe taimi o loo taʻua ai i le Tusi Paia le suafa o le Atua, o Ieova. O le tele o faaliliuga ua suia ai lenei igoa i faalupega e pei o le Alii po o le Atua. Peitaʻi, na faailoa atu e le Atua moni lona lava suafa o Ieova iā Mose, i lona fetalai atu: “O loʻu igoa lenā e faavavau.” (Esoto 3:15) O lenei auala na faaesea ai e le Atua o ia lava mai i atua sesē uma. E matou te mitamita e tauave le suafa paia o le Atua.

E faamatala ai la matou galuega. Na amata mai lava i aso anamua i le tagata amiotonu o Apelu, se faasologa umi o tagata sa avatu se molimau e faatatau i lo latou faatuatua iā Ieova. A o faagasolo le tele o senituri, sa auaufaatasi atu Noa, Aperaamo, Sara, Mose, Tavita ma isi i lenei “vaega e toʻatele o molimau.” (Eperu 11:4–12:1) E pei lava ona avatu e se tagata se molimau i le faamasinoga mo se tagata e leʻi faia se solitulafono, e matou te maumauaʻi foʻi e faailoa atu le upu moni e faatatau i lo matou Atua.

Ua matou faaaʻoaʻo iā Iesu. Ua taʻua i le Tusi Paia Iesu “o le molimau faamaoni ma moni.” (Faaaliga 3:14) Na taʻua e Iesu sa ia ʻfaailoa atu le suafa o le Atua,’ ma ʻmolimau atu pea i le upu moni’ e faatatau i le Atua. (Ioane 17:26; 18:37) O lea la, e tatau foʻi i soo moni o Keriso ona latou molimau ma faailoa atu le suafa o Ieova. O loo faaauau pea ona faia e Molimau a Ieova lenā galuega.

• Aiseā na suia ai le igoa o Tagata Aʻoga o le Tusi Paia i le taʻu Molimau a Ieova?

• O le ā le umi talu ona iai Molimau a Ieova i le lalolagi?

• O ai le Molimau sili a Ieova?

Na valoia mai i le Tusi Paia pe a mavae le maliu o Iesu, o le a ō mai aʻoaʻo pepelo mai uluaʻi Kerisiano ma faauiga sesē aʻoaʻoga moni o le Tusi Paia. (Galuega 20:29, 30) Ma o le mea tonu lava lenā na tupu. Ua latou faafilogia aʻoaʻoga a Iesu ma manatu o lotu faapaupau, ma na iʻu ina mapuna aʻe ai Kerisiano taufaasesē. (2 Timoteo 4:3, 4) E faapefea ona matou mautinoa o loo iā i matou le malamalamaga saʻo i mea moni o loo aʻoaʻoina i le Tusi Paia i aso nei?

Ua oo i le taimi a Ieova e faailoa ai le upu moni. Na ia valoia, ʻi le taimi o le iʻuga, o le a faatuputeleina ai le poto saʻo.’ (Tanielu 12:4) I le tausaga e 1870, na mātaulia ai e se vaega toʻaitiiti o tagata o loo saʻili i le upu moni, le anoanoaʻi o aʻoaʻoga a lotu e lē faale-Tusi Paia. O lea, na amata ai ona latou saʻilia se malamalamaga e uiga i uluaʻi aʻoaʻoga o le Tusi Paia, ma na faamanuia e Ieova i latou i le malamalama faaleagaga.

Na suʻesuʻe māeʻaeʻa e tane faamaoni le Tusi Paia. O na Tagata Aʻoga faamaoni o le Tusi Paia, o ē na muamua iā i matou, na latou amataina se auala fou o le faia o suʻesuʻega, lea o loo matou faaaogāina pea e oo mai i aso nei. Na latou talanoaina faasolosolo mataupu o le Tusi Paia. Afai na latou maua se vaega o le Tusi Paia e faigatā ona malamalama i ai, ona latou saʻili lea o isi fuaiupu e faamatala mai ai. Pe a latou iloa ua fetaui lelei lenā manatu ma le isi vaega o le Tusi Paia, ona latou tusia lea i lalo. E ala i le tuu atu e faamatala mai e le Tusi Paia lava ia, na latou toe faafoʻi ai le upu moni e uiga i le suafa o le Atua ma le Malo, lona finagalo mo le fanau a tagata ma le lalolagi, le tulaga o ē ua maliliu, ma le faamoemoe o le toetū. O a latou saʻiliʻiliga ua faasaʻoloto mai ai i latou i le tele o talitonuga ma faiga taufaasesē.​—Ioane 8:31, 32.

E oo ane i le 1879, ua manatu Tagata Aʻoga o le Tusi Paia ua oo i le taimi e faalauiloa ai i le lalolagi aoao le upu moni. O lea, mai i lenā tausaga, na amata ai loa ona lolomiina le mekasini o loo matou faasalalauina atu i aso nei, Le Olomatamata Faasilasilaina le Malo o Ieova. I le taimi nei, ua matou faailoa atu aʻoaʻoga moni o le Tusi Paia i tagata mai i atunuu e 240 i le silia ma le 750 gagana. E leʻi iai lava se taimi muamua na matuā faatupulaʻia ai le poto saʻo!

• Ina ua mavae le maliu o Keriso, o le ā na tupu i le upu moni o le Tusi Paia?

• O le ā na mafai ai ona matou toe faafoʻisia mai le upu moni mai i le Afioga a le Atua?

I le tele o tausaga, na faaaogā, lolomiina ma tufatufaina ai e Molimau a Ieova faaliliuga eseese o le Tusi Paia. Peitaʻi, na matou iloa ua manaʻomia se lomiga fou e sili atu ona lelei e fesoasoani i tagata e aʻoaʻoina ai le “poto saʻo i le upu moni,” ona o le finagalo lenā o le Atua mo tagata uma. (1 Timoteo 2:3, 4) O lea, i le 1950, na amata ai ona matou tatala ni vaega o le Tusi Paia o loo faaaogā ai le gagana o aso nei, le New World Translation i le faa-Peretania. Ua faaliliuina ma le faamaoni ma le saʻo lenei Tusi Paia i le sili atu i le 130 gagana.

Sa manaʻomia se Tusi Paia e faigofie ona malamalama i ai. E fesuisuiaʻi gagana a o faagasolo taimi, ma o loo iai i le tele o faaliliuga faaupuga e lē o toe faaaogāina ma e faigatā ona malamalama i ai. E lē gata i lea, ua maua nisi manusikulipi anamua e saʻo lelei ma e talitutusa ma uluaʻi manusikulipi, ma ua iʻu ai i se malamalamaga e sili atu o Tusitusiga Eperu, Aramaika, ma Eleni.

Sa manaʻomia se faaliliuga e faamaoni atu i afioga a le Atua. Nai lo o le saʻoloto e suia tusitusiga faagaeeina a le Atua, e tatau i tagata faaliliu o le Tusi Paia ona faamaoni i uluaʻi tusitusiga. Peitaʻi i le tele o faaliliuga, e lē o faaaogāina ai i Tusitusiga Paia le suafa o le Atua, o Ieova.

Sa manaʻomia se Tusi Paia e viia ai Lē na tusiaina. (2 Samuelu 23:2) E pei ona faaāta mai i inei, i le Faaliliuga a le Lalolagi Fou, ua toe faafoʻisia ai le suafa o Ieova lea e tusa ma le 7,000 taimi e aliaʻi mai ai i manusikulipi tuai o le Tusi Paia e pei ona faataʻitaʻi mai i le faaaʻoaʻoga i loo taʻua i lalo. (Salamo 83:18) O iʻuga o tausaga e tele na faia ai ni iloiloga filigā, ua tatou fiafia ai e faitau lenei Tusi Paia a o faailoa manino mai ai manatu o le Atua. E tusa pe e lē o maua le Faaliliuga a le Lalolagi Fou i lau gagana, e matou te faalaeiauina oe e atiaʻe se masaniga lelei o le faitauina o le Afioga a Ieova i aso taʻitasi.​—Iosua 1:8; Salamo 1:2, 3.

• Aiseā na matou filifili ai ua manaʻomia se faaliliuga fou o le Tusi Paia?

• O le ā le masaniga i aso taʻitasi e lelei mo so o se tasi o loo naunau e aʻoaʻoina le finagalo o le Atua?