E toʻatele tagata ua lē o toe auai i ni sauniga faalotu, ona e latou te lē o mauaina mai ai ni taʻiala po o ni faamāfanafanaga faaleagaga. Aiseā la e tatau ai ona e auai i sauniga faa-Kerisiano a Molimau a Ieova? O ā mea o le a e mauaina mai ai?

Olioli faatasi ma tagata e alolofa ma manatu mamafa. I le uluaʻi senituri, sa faamaopoopo ai Kerisiano i faapotopotoga, ma na latou faia sauniga e tapuaʻi ai i le Atua, suʻesuʻe le Tusi Paia, ma faalaeiau le tasi i le isi. (Eperu 10:24, 25) O le faatasitasi i se siʻomaga alofa, e latou te lagonaina ai o loo latou miomiō faatasi ma uō moni​—o o latou uso ma tuafāfine faaleagaga. (2 Tesalonia 1:3; 3 Ioane 14) O loo matou mulimuli pea i na faatulagaga ma maua ai le olioli lava lenā e tasi.

Le aogā o le aʻoaʻoina o le auala e faatatau ai mataupu silisili o le Tusi Paia. E pei lava ona sa faia i taimi o le Tusi Paia, sa faapotopoto faatasi tane, fafine ma tamaiti. E faaaogā e faiaʻoga agavaa le Tusi Paia e fesoasoani iā i matou, ia iloa le auala e faatatau ai mataupu silisili i o matou olaga i aso taʻitasi. (Teuteronome 31:12; Neemia 8:8) E mafai ona fai se sao o tagata uma i le aofia i talanoaga, le usuina o pese, ma maua le avanoa e faailoa atu ai lo matou faamoemoe faa-Kerisiano.​—Eperu 10:23.

Le faamanuiaga o le faamalosia o lou faatuatua i le Atua. I aso o le aposetolo o Paulo, na ia taʻu atu ai i se tasi o faapotopotoga e faapea: “Ua ou matuā naunau lava e fia feiloaʻi ma outou, . . . ma ia tatou fefaalaeiauaʻi ai i le faatuatua, o outou atoa ma aʻu.” (Roma 1:11, 12) I a matou sauniga, e matou te feiloaʻi ai e lē aunoa ma o matou uso talitonu, e faamalosia ai lo matou faatuatua ma le naunau e ola i se olaga faa-Kerisiano.

Aiseā e te lē taliaina ai lenei valaaulia e auai i le isi a matou sauniga e sosoo ai, ma e iloa ai le moni o nei mea? E talia ma le māfana oe. E lē totogiina nei sauniga, ma e lē aoina ai foʻi ni peleti.

• O le ā le faaaʻoaʻoga o loo mulimuli ai a matou sauniga?

• E faapefea ona matou maua aogā i le auai i sauniga faa-Kerisiano?

E tusa pe tauasa ma ui atu i totonu o vaomatua, pe e matuā leaga foʻi le tau, ae e matou te auai pea i a matou sauniga faa-Kerisiano. Po o ā lava luʻi o le olaga e fesagaʻia pe e vaivai foʻi i le māeʻa ai o galuega o le aso, ae aiseā e taumafai ai lava Molimau a Ieova e faatasitasi ma o latou uso talitonu?

E mo lo matou lelei. Na tusi Paulo e uiga i ē o loo matou auaumea i le faapotopotoga, ʻIa manatunatu foʻi le tasi i le isi.’ (Eperu 10:24) O le uiga o lenei faaupuga “ia manatunatu ma le faaeteete,” o le iloa lelei lea e le tasi o le isi. O loo faalaeiau la i tatou i upu a le aposetolo ia manatu mamafa e uiga i isi. E ala i le faamasani atu i isi aiga Kerisiano, e matou te iloa ai nisi o i latou sa taulau manuia i le onosaia o luʻi e talitutusa ma luʻi o loo matou fesagaʻia, ma e fesoasoani iā i matou e taulau manuia ai foʻi.

E atiaʻe ai faauōga tumau. I a matou sauniga, e matou te faapotopoto faatasi ai, e lē tau ina ia feiloaʻi, ae o se faatasiga ma uō vavalalata. O nisi taimi, e matou te faatasitasi ai mo ni nai faafiafiaga ma faiga mālōlōga e aogā. O ā aafiaga aogā e maua mai i nei faatasiga? E matou te aʻoaʻoina ai le talisapaia e le tasi o le isi, ma faamalosia ai la matou fusi o le alofa. O lea, pe afai e fesagaʻia e o matou uso faafitauli, e matou te nofosauni e fesoasoani atu iā i latou, talu ai ua iai ni a matou faauōga māfana. (Faataoto 17:17) E ala i le auaumea faatasi ma isi sui uma o le faapotopotoga, e faaalia ai o loo matou ʻfetausiaʻi i o matou itutino.’​—1 Korinito 12:25, 26.

E matou te faalaeiauina oe e filifili ia avea i latou o loo faia le finagalo o le Atua ma au uō. O le a e maua na ituaiga uō i Molimau a Ieova. Faamolemole, ia aua neʻi iai se mea e taofia ai oe mai le auaufaatasi ma i matou.

• Aiseā e tāua ai ona matou faatasitasi i sauniga?

• O afea o le a e taumafai e iloa lelei ai la matou faapotopotoga?

I sauniga a uluaʻi Kerisiano, sa usuina ai pese, fai tatalo, faitau ma iloilo mau o le Tusi Paia, e aunoa ma ni tū masani faalotu. (1 Korinito 14:26) E te faatalitalia la se mea e talitutusa faapena i a matou sauniga.

O faatonuga e faavae mai i le Tusi Paia ma e aogā. I faaiʻuga o vaiaso, e feiloaʻi ai faapotopotoga taʻitasi e faalogologo i se lauga faale-Tusi Paia e 30 minute, e iloa ai pe faapefea ona fesootaʻi le Tusi Paia i o matou olaga ma le taimi o loo tatou ola ai. E faalaeiauina i matou uma ia mulimuli i a matou Tusi Paia a o faagasolo le lauga. Pe a māeʻa le lauga, e tasi le itula e faaalu mo le Suʻesuʻega o le “Olomatamata,” lea e valaaulia ai sui uma o le faapotopotoga e fai se sao a o talanoaina le mataupu mai le lomiga o Le Olomatamata mo suʻesuʻega. E fesoasoani lenei talanoaga iā i matou ina ia faatatauina i o matou olaga le taʻitaʻiga mai i le Tusi Paia. O loo suʻesuʻeina foʻi le mataupu lava lea e tasi i le silia i le 110,000 isi faapotopotoga i le lalolagi aoao.

E fesoasoani iā i matou e faaleleia ai o matou tomai e aʻoaʻo atu. E iai foʻi le sauniga amata o le vaiaso e tolu ona vaega e taʻua o La Tatou Faiva ma le Olaga Faa-Kerisiano, lea e faavae mai i mataupu mai i La Tatou Faiva ma le Olaga Faa-Kerisiano—Polokalame mo le Sauniga, lea e maua i masina taʻitasi. O le vaega muamua o lenei sauniga e taʻua o le, ʻOa Tautele Mai i le Afioga a le Atua, e fesoasoani iā i matou ina ia faamasani ai i se vaega o le faitauga Tusi Paia ua māeʻa ona faitauina e le faapotopotoga. O le isi vaega o le sauniga e taʻua o le Toleniga mo le Faiva i le Fanua, e aofia ai faataʻitaʻiga i le auala e faaaogā ai le Tusi Paia e faia ai talanoaga ma isi. E aumai e se faiaʻoga faufautua ni fautuaga, ina ia faaleleia atili ai o matou tomai o le faitau ma le tautala. (1 Timoteo 4:13) O le vaega mulimuli o le sauniga e taʻua o le, Auala e Ola ai o se Kerisiano, e iloiloina ai faatatauga aogā o mataupu silisili o le Tusi Paia i le olaga i aso fai soo. E aofia ai i lenei vaega se talanoaga e faafesili ma tali, lea e faalolotoina ai lo tatou malamalama i le Tusi Paia.

Pe a e auai i a matou sauniga, e mautinoa o le a e maofa i le maualuga o le tulaga tauaʻoaʻoga faale-Tusi Paia o le a e mauaina.​—Isaia 54:13.

• O le ā e te faatalitalia o le a e faalogologo i ai i sauniga a Molimau a Ieova?

• O lē fea o a matou sauniga faale-vaiaso o sosoo mai e te fia auai ai?

Po o e mātauina i ata o lenei polosiua le onomea o laʻei o Molimau a Ieova, a o auai i sauniga a a latou faapotopotoga? Aiseā e matou te uaʻi totoʻa atu ai i o matou laʻei ma teuga?

E faaalia ai le faaaloalo i lo matou Atua. E moni e silasila le Atua i tala atu o o tatou foliga vaaia. (1 Samuelu 16:7) Peitaʻi, pe a matou faapotopoto e tapuaʻi atu iā te Ia, o le faanaunauga o o matou loto ia faaalia atu le faaaloalo iā te ia ma o matou uso tapuaʻi. Pe a tatou tulaʻi i luma o se faamasinoga, e masani lava e tatou te faamautinoa o loo atagia atu i o tatou foliga vaaia le faaaloalo i le tulaga o le faamasino. I se tulaga talitutusa, o le auala e matou te laʻei ai i sauniga, e faaalia ai lo matou faatāuaina o le “Faamasino o le lalolagi uma,” o Ieova le Atua, ma le nofoaga o loo matou tapuaʻi atu ai iā te ia.​—Kenese 18:25.

E iloa ai tapulaa o loo matou ola ai. Ua fautuaina e le Tusi Paia Kerisiano ia fai laʻei “onomea ma ia mafaufau lelei.” (1 Timoteo 2:9, 10) O le laʻeiina o ofu “onomea” e uiga atu i le ʻalofia o laʻei e ono tosina mai ai le vaai a isi iā i matou ona o le faalialiavale, faatosina, po o le faaaliali o nisi o vaega o le tino. E lē gata i lea, o le iai o se “mafaufau lelei,” e fesoasoani iā i matou e filifili ai laʻei mananaia e lē teuanoaʻi, pe atagia atu ai tifiga uigaese o lenei lalolagi. O nei mataupu silisili o loo tuu mai ai le avanoa e faia ai filifiliga a le tagata lava ia. E aunoa ma ni upu, o o matou laʻei onomea ma talafeagai e mafai ona ʻfaamamaluina ai aʻoaʻoga a lo tatou Faaola,’ ma ʻfaamamaluina ai le Atua.’ (Tito 2:10; 1 Peteru 2:12) O laʻei onomea i taimi o sauniga, e mafai ona taaʻina ai le auala e manatu ai isi i le tapuaʻiga iā Ieova.

Aua neʻi avea laʻei ma mea e taofia ai oe mai le auai i sauniga. E mafai lava ona tatou laʻeiina ofu talafeagai, mamā ma onomea, nai lo o le faatalitali i se ofu taugatā.

• O le ā le tāua o le auala e matou te laʻei ai i taimi o le tapuaʻiga i le Atua?

• O ā mataupu silisili e taʻitaʻia ai a matou filifiliga e tusa ai o laʻei ma teuga?

Pe afai o loo e suʻesuʻeina le Tusi Paia ma se Molimau a Ieova, atonu la e te taumafai e iloilo muamua le mataupu a o leʻi faia suʻesuʻega taʻitasi. Ina ia maua le tele o aogā, o se mea lelei ona faia foʻi faapea a o leʻi auai i se sauniga a le faapotopotoga. E maua iʻuga e sili ona lelei pe a faataatia se faasologa lelei.

Filifili po o le ā le taimi ma le nofoaga e fai ai suʻesuʻega. O fea le taimi e sili ona lelei ai lau uaʻi atu i se mea? Po o le taeaopō, a o leʻi amata au galuega o le aso, po o le afiafi i le taimi ua momoe ai tamaiti? E tusa lava foʻi pe e lē mafai ona e suʻesuʻe mo se taimi umi, ae ia filifili po o le ā le tele o le taimi e mafai ona e faataatia ese, ma taumafai ia aua neʻi iai se mea e faalavelavea ai lenā taimi. Ia suʻe se nofoaga e toʻafilemu, ma aveese mea uma e faauaʻi ese ai e ala i le tapē o le leitiō, televise ma le telefoni feaveaʻi. O le tatalo a o leʻi faia au suʻesuʻega o le a fesoasoani e faateʻa ese ai popolega o le aso, ina ia mafai ai ona e uaʻi atu i le Afioga a le Atua.​—Filipi 4:6, 7.

Faailoga le mataupu, ma sauni e fai se sao. Ia amata e ala i le malamalama i le uiga atoa o le mataupu. Mafaufau e uiga i le ulutala o le mataupu, iloilo po o le ā le fesootaʻiga o tamaʻi ulutala taʻitasi i lenā matua, ma iloilo so o se ata ma fesili autalu o loo faamatilatila mai ai manatu tāua. Ona faitau lea o palakalafa taʻitasi, ma suʻe le tali o le fesili o palakalafa. Suʻe ma faitau mau o loo sii mai, ma mafaufau i le auala o loo lagolagoina ai e na mau le mataupu. (Galuega 17:11) Pe a e maua le tali o le fesili, ona vase lea o ni nai upu po o faaupuga autū i le palakalafa e toe faamanatu atu ai iā te oe le tali. Pe a oo loa i le taimi o le sauniga, e mafai ona sii i luga lou lima ma fai se tali puupuu i au oe lava upu.

E ala i le iloiloina o mataupu eseese e talanoaina i vaiaso taʻitasi i sauniga, o le a e faaopoopo ai manatu fou i lou “fale teuoloa” o le poto mai le Tusi Paia.​—Mataio 13:51, 52.

• O le ā se faasologa e mafai ona e faatulaga ina ia sauniuni ai mo sauniga?

• E faapefea ona e sauni e fai se tali i le sauniga?

Talu mai aso anamua, na finagalo ai Ieova i aiga taʻitasi ia faaalu faatasi se taimi e atiaʻe ai se faiā malosi ma ia, ma faamalosia ai o latou aiga. (Teuteronome 6:6, 7) O le pogai lenā e faataatia ese ai e Molimau a Ieova se taimi i vaiaso taʻitasi e tapuaʻi faatasi ai le aiga​—e talanoa i se siʻomaga toʻafilemu mataupu faaleagaga e patino i o latou manaʻoga. E tusa pe e te nofo toʻatasi, ae e mafai ona faaaogā lelei lenā taimi e mafuta ai i le Atua, e ala i le suʻesuʻeina o le Tusi Paia i se mataupu ua e filifilia.

O se taimi e mafuta vavalalata ai iā Ieova. “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) E mafai ona tatou iloa lelei Ieova pe a aʻoaʻoina faamatalaga e uiga i ona uiga ma ana galuega e ala mai i lana Afioga le Tusi Paia. O le auala faigofie e amata ai le tapuaʻiga a le aiga, o le faaalu lea o se taimi e faitau faatasi ai ma le leotele le Tusi Paia, atonu i le mulimuli i le faasologa o le vaiaso mo le Sauniga o le Faiva ma le Olaga Faa-Kerisiano. E mafai ona tofia sui taʻitasi o le aiga e faitau mai se vaega o le Tusi Paia, ona talanoa faatasi uma lea po o le ā se manatu na aʻoaʻoina mai i le Tusi Paia.

O se taimi e mafuta vavalalata ai sui o le aiga. O tane ma avā, faapea mātua ma fanau, e faamalosia a latou faiā pe a suʻesuʻeina le Tusi Paia o se aiga. E tatau ona avea o se taimi fiafia, filemu ma e tulimataʻia uma e le aiga i vaiaso taʻitasi. E faalagolago i tausaga o a latou fanau, e mafai ona filifili e mātua mataupu aogā e talanoaina, atonu e faaaogā ai mataupu mai i Le Olomatamata ma le Ala Mai! po o luga foʻi o la matou Upega tafaʻilagi o le jw.org. E mafai ona outou talanoa e faatatau i se faafitauli na feagai ma lau fanau i le aʻoga, ma vaai po o le ā le auala e foʻia ai. Aiseā e tou te lē matamata ai i se polokalame o loo maua i le TV i le Initaneti a Molimau a Ieova, ma talanoa faatasi ai e uiga i lenā polokalame pe a māeʻa? Atonu e te fiafia e faataʻitaʻi pese o le a usuina i le sauniga, ma taumamafa faatasi pe a māeʻa le tapuaʻiga a le aiga.

O lenei taimi faapitoa e faaaluina i vaiaso taʻitasi e tapuaʻi faatasi ai iā Ieova, o le a fesoasoani i le aiga atoa e maua ai le olioli i le suʻesuʻeina o le Afioga a le Atua, ma o le a Ia matuā faamanuia i a outou taumafaiga.​—Salamo 1:1-3.

• Aiseā e matou te faataatia ese ai se taimi mo le tapuaʻiga a le aiga?

• E faapefea i mātua ona faaaogā lenei taimi e avea ma taimi fiafia mo le aiga atoa?

Aiseā e foliga fiafia ai nei tagata? O loo latou auai i se tasi o a matou fonotaga. I le pei o auauna a le Atua i aso ua mavae, o ē na faatonuina ia faapotopoto faatolu i le tausaga, e matou te tulimataʻi foʻi e faapotopoto faatasi i vaega toʻatele. (Teuteronome 16:16) I tausaga taʻitasi, e tolu a matou faatasiga tetele: e lua fonotaga matagaluega e taʻitasi aso, ma se tauaofiaga itumalo e tolu aso. E faapefea ona aogā iā i matou nei faatasiga?

E faamalosia ai lo matou ʻauuso Kerisiano. E pei ona sa olioli tagata Isaraelu e vivii atu iā Ieova “i totonu o faapotopotoga,” e matou te fiafia foʻi e tapuaʻi faatasi atu iā te ia i faatasiga faapitoa. (Salamo 26:12; 111:1) O nei faatasiga e maua ai avanoa e feiloaʻi ma faatasitasi ai ma Molimau mai i isi faapotopotoga pe mai i isi atunuu. I le aoauli, e matou te aai fiafia faatasi i le nofoaga o loo faia ai le fonotaga, ma maua atili ai se siʻomaga faaleuō i nei faatasiga faaleagaga. (Galuega 2:42) I na fonotaga tetele e matou te tofo ai i le alofa, lea e autasia ai lo matou “ʻauuso atoa” i le lalolagi.​—1 Peteru 2:17.

E fesoasoani e matou te agaʻigaʻi ai i luma faaleagaga. Sa maua foʻi e tagata Isaraelu aogā e ala i le “malamalama i upu” o le Tusi Paia na faamatala atu iā i latou. (Neemia 8:8, 12) E matou te talisapaia foʻi faatonuga mai i le Tusi Paia e maua mai i a matou fonotaga. O polokalame taʻitasi e faavae mai i se matua faale-Tusi Paia. E ala mai i lauga mananaia, lauga faasolo ma le toe faaataina o mea moni na tutupu, e matou te aʻoaʻoina ai le auala e fai ai le finagalo o le Atua i o matou olaga. E faalaeiauina i matou pe a faalogo atu i tala i mea na tutupu, i ē na taulau i le onosaia o le luʻi o le avea o ni Kerisiano i nei taimi faigatā. I tauaofiaga itumalo, o tala faatino e atili ai ona moni iā i matou tala o le Tusi Paia, ma matou aʻoaʻoina ai lesona aogā. E faia i fonotaga uma se papatisoga mo ē e mananaʻo e faailoga lo latou tuuina atu i le Atua.

• Aiseā e avea ai fonotaga o ni taimi fiafia?

• E mafai faapefea ona e maua aogā i le auai i se fonotaga?

A o lata i lona maliu, na fetalai ai Iesu: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.” (Mataio 24:14) Ae ua faapefea ona faataunuuina lenei galuega talaʻi i le lalolagi aoao? E ala i le mulimuli i le faaaʻoaʻoga na faataatia e Iesu a o iai i le lalolagi.​—Luka 8:1.

E matou te taumafai e faafesootaʻi tagata i o latou fale. Na aʻoaʻo e Iesu ona soo ia talaʻi atu le tala lelei mai lea fale i lea fale. (Mataio 10:11-13; Galuega 5:42; 20:20) O na tagata talaʻi i le uluaʻi senituri na tofia i oganuu faapitoa e tatau ona talaʻi ai. (Mataio 10:5, 6; 2 Korinito 10:13) E faapena foʻi i aso nei, ua faamaopoopo lelei la matou galuega talaʻi, ma ua tofu lava faapotopotoga taʻitasi ma oganuu ua tofia e latou te galulue ai. O lea auala ua mafai ai ona matou faataunuuina le faatonuga a Iesu ia “talaʻi atu i tagata ma molimau māeʻaeʻa.”​—Galuega 10:42.

E matou te taumafai ia oo i tagata po o fea lava e maua ai. Na faataatia foʻi e Iesu le faaaʻoaʻoga e ala i le talaʻi atu i tagata i le lautele, e pei o luga o le matafaga po o se vaieli. (Mareko 4:1; Ioane 4:5-15) E matou te talanoa foʻi i tagata e uiga i le Tusi Paia po o fea lava e maua ai—i alatetele, i nofoaga o pisinisi, i paka po o le telefoni. E matou te molimau foʻi i o matou tuaoi, tagata e faigaluega ma aʻoaʻoga faatasi, ma tauaiga pe a maua se avanoa talafeagai. O nei taumafaiga uma ua mafai ai ona faalogo le faitau miliona o tagata i le lalolagi aoao i “le tala lelei o le faaolataga.”​—Salamo 96:2.

Pe e mafai ona e mafaufau i se tasi e te manaʻo e faasoa atu i ai le tala lelei o le Malo o le Atua, ma le aogā o lenā tala lelei i lona lumanaʻi? Seʻi aua lava neʻi e taofia le faailoa atu o lenei feʻau o le faamoemoe. Ia faailoa atu i isi i le vave e te mafai ai!

• O le ā le “tala lelei” e tatau ona faalauiloa atu?

• Ua faapefea ona faaaʻoaʻo Molimau a Ieova iā Iesu i le auala e talaʻi ai?

O le taʻu “paeonia” e masani ona faasino atu i ē e saʻilia oganuu fou, ma tatalaina se ala mo isi e mulimuli i ai. Sa pei Iesu o se paeonia, e ala i le auina mai i le lalolagi ina ia faatino se galuega faasaoola ma tatala le ala i le faaolataga. (Mataio 20:28) I aso nei, o loo faaaʻoaʻo ona soo iā te ia e ala i le faaalu o le taimi i le tele e mafai ai e ʻfaia isi ma soo.’ (Mataio 28:19, 20) O nisi ua mafai ona auai i le auaunaga e taʻua o le auaunaga faapaeonia.

O le paeonia o se tagata e talaʻi faataimi atoa. O Molimau a Ieova uma o tagata talaʻi o le tala lelei. Peitaʻi, o isi ua faatulaga o latou olaga e auauna o ni paeonia sauatoa, e faaalu le 70 itula i masina taʻitasi i le galuega talaʻi. Ina ia faia faapea, o le toʻatele lava ua faatapulaa a latou galuega totogi i le galulue faavaitaimi. O isi ua filifilia e galulue o ni paeonia faapito i vaipanoa o loo tele ai le manaʻoga mo tagata talaʻi o le Malo, e faaalu le 130 itula pe sili atu i masina taʻitasi i le talaʻiga. E lotomalilie paeonia e ola i se olaga faigofie, ma mautinoa o le a saunia e Ieova mea e latou te manaʻomia i le olaga. (Mataio 6:31-33; 1 Timoteo 6:6-8) O ē e lē mafai ona paeonia faataimi atoa, e ono galulue o ni paeonia lagolago pe a mafai, ma faateleina lo latou sao i le talaʻiga i le 30 pe 50 itula i se masina.

E uunaʻia se paeonia i le alofa i le Atua ma tagata. I le pei o Iesu, ua matou mātauina e toʻatele tagata i aso nei o loo matuā manaʻomia ona iloa le Atua ma lona finagalo. (Mareko 6:34) Ae ua iā i matou le poto lea e mafai ona fesoasoani iā i latou i le taimi nei, ma avatu ai iā i latou se faamoemoe mautū mo le lumanaʻi. O le alofa i tuaoi e uunaʻia ai se paeonia e foaʻi atu ma le lotomalie lona taimi ma le malosi e fesoasoani ai i isi i le itu faaleagaga. (Mataio 22:39; 1 Tesalonia 2:8) O le iʻuga, e faamalosia ai le faatuatua o le paeonia, atili ai ona mafuta vavalalata atu i le Atua, ma tofo ai i le tele o le olioli.​—Galuega 20:35.

• E faapefea ona e faamatalaina se paeonia?

• O le ā e uunaʻia ai nisi e paeonia faataimi atoa?

Ua loa tausaga o iloga Molimau a Ieova i a latou aʻoga faale-Tusi Paia. Ua saunia ni aʻoga faapitoa mo i latou ua faaalu lo latou taimi atoa i le talaʻia o le Malo, ina ia mafai ai ona ʻfaia ma le māeʻaeʻa la latou faiva.’​—2 Timoteo 4:5.

Aʻoga mo le Auaunaga Paeonia. Pe a māeʻa se tausaga atoa o auauna pea se tasi o se paeonia sauatoa, ona agavaa lea e auai i se aʻoga e faia mo aso e ono, i se Maota mo Sauniga e lata ane i lona vaipanoa. O le fuafuaga o lenei aʻoga, ina ia fesoasoani i le paeonia e mafuta vavalalata atu iā Ieova, ia uigā lana faiva, ma ia tumau pea ma le faamaoni i lana auaunaga.

Aʻoga mo Tagata Talaʻi o le Malo. E lua masina e faia ai lenei aʻoga, ma e toleniina ai paeonia ua lava le poto masani, o ē ua lotomalilie e tuua o latou aiga ina ia auauna i se vaipanoa o loo tele ai le manaʻoga. Ua faaaʻoaʻo i latou nei i lē na auauna o se Faievagelia sili i le lalolagi, o Iesu, e ala i le faapea atu: “O aʻu lenei! Inā auina atu ia aʻu.” (Isaia 6:8; Ioane 7:29) O le auauna i isi vaipanoa e ono aofia ai le faamasani i se olaga faafaigofie. Atonu e manaʻomia foʻi ona faamasani i le aganuu, le tau, o meaʻai, ma aʻoaʻoina se isi gagana fou. E fesoasoani lenei aʻoga i uso ma tuafāfine nofofua ma ulugalii ua 23 i le 65 tausaga le matutua, e atiaʻe uiga faaleagaga e manaʻomia mo la latou auaunaga, aemaise o tomai e mafai ona aogā i le auaunaga iā Ieova ma lana faalapotopotoga.

Aʻoga Faale-Tusi Paia a le Olomatamata o Kiliata. I le gagana Eperu, o le upu “Kiliata” e uiga atu i ni “Molimau e Toʻatele.” Talu ona faavaeina le Aʻoga o Kiliata i le 1943, ua silia ma le 8,000 i latou na aʻoaʻoina ai ua auina atu o ni misionare e avatu se molimau i “tuluʻiga uma o le lalolagi,” ma e tele iʻuga lelei ua maua mai ai. (Galuega 13:47) Ina ua faatoʻā taunuu misionare i le atunuu o Peru, sa leʻi iai ni faapotopotoga i inā. Peitaʻi, ua silia nei ma le 1,000 faapotopotoga. Ina ua faatoʻā taunuu foʻi misionare i Iapani, e leʻi atoa se toʻasefulu o tagata talaʻi i lenā atunuu. Peitaʻi ua silia nei ma le 200,000 tagata talaʻi. O le Aʻoga o Kiliata e faia mo le lima masina, ma e aofia ai le suʻesuʻeina māeʻaeʻa o le Afioga a le Atua. O lenei aʻoga e maua ai ni toleniga e sili ona lelei, e fesoasoani e faatumauina ma faamalosia ai le galuega talaʻi i le lalolagi aoao. E mafai ona auai i lenei aʻoga i latou o loo avea ma paeonia faapito, misionare i oganuu, o ē galulue i ofisa o lālā, po o i latou foʻi o loo iai i le galuega femalagaaʻi.

• O le ā le fuafuaga o le Aʻoga mo le Auaunaga Paeonia?

• O ai ua fuafuaina i ai le Aʻoga mo Tagata Talaʻi o le Malo?