Na Latou Tusia Tala e Uiga iā Iesu

O e vaai atu i tamāloloa o loo i le ata?— O Mataio, Mareko, Luka, Ioane, Peteru, Iakopo, Iuta ma Paulo. O nei tamāloloa sa ola i le taimi na soifua ai Iesu, ma na latou tusia tala e uiga iā Iesu. Seʻi o tatou talanoa e uiga iā i latou.

O le toʻatolu o i latou nei o aposetolo na talaʻi faatasi ma Iesu. Pe e te iloa o ai i latou na?— O Mataio, Ioane, ma Peteru. Sa masani lelei aposetolo o Mataio ma Ioane iā Iesu, ma e tofu i laʻua ma le tusi na tusia e faatatau i le olaga o Iesu. Sa tusia foʻi e le aposetolo o Ioane le tusi o le Faaaliga, ma isi tusi e tolu ua taʻua o le Tusi Muamua a Ioane, Tusi Lona Lua a Ioane, ma le Tusi Lona Tolu a Ioane. E lua tusi o le Tusi Paia na tusia e le aposetolo o Peteru. O le Tusi Muamua ma le Tusi Lona Lua a Peteru. I le tusi lona lua a Peteru, na tusi ai o ia e faatatau i le taimi na fetalai mai ai Ieova i le lagi e uiga iā Iesu: ʻO loʻu atalii pele lenei. Ou te alofa iā te ia, ma ua malie loʻu loto iā te ia.’

Sa tusia foʻi e isi tamāloloa o loo i le ata ni tusi e aʻoaʻoina ai i tatou e uiga iā Iesu. O se tasi o i latou o Mareko. Atonu sa iai o ia i le taimi na puʻeina ai Iesu, ma vaai i mea uma na tutupu. O le isi tamāloa o Luka. O ia o se fomaʻi, ma atonu na avea o ia ma Kerisiano ina ua mavae le maliu o Iesu.

O isi tusitala e toʻalua o le Tusi Paia o loo i le ata, o uso lāiti o Iesu. Pe e te iloa o la igoa?— O Iakopo ma Iuta. I le taimi muamua, e la te leʻi talitonu iā Iesu, ma na la manatu ua faalētonu lona mafaufau. Ae na mulimuli ane la talitonu iā Iesu ma avea ma Kerisiano.

O le tusitala o le Tusi Paia o loo totoe i le ata, o Paulo. A o leʻi avea o ia ma Kerisiano, sa igoa muamua iā Saulo. Sa ʻinoʻino ma faasauā o ia i Kerisiano. Pe e te iloa le auala na avea ai Paulo ma Kerisiano?— I se tasi aso, a o faimalaga Paulo i le ala, sa faafuaseʻi ona ia faalogoina o tautala mai se tasi i le lagi. O ia lenā o Iesu. Sa faapea mai o ia iā Paulo: ʻAiseā ua e faasauā ai i ē ua talitonu mai iā te aʻu?’ Ina ua uma, sa suia loa Paulo ma avea ma Kerisiano. E 14 tusi o le Tusi Paia na tusia e Paulo, e amata mai i le Roma seʻia oo i le Eperu.

O aso uma lava e tatou te faitauina ai le Tusi Paia, a ea?— E tele mea e tatou te aʻoaʻoina e uiga iā Iesu pe a faitauina le Tusi Paia. Pe e te fia iloa atili nisi mea e uiga iā Iesu?—