O lou suʻesuʻeina o le Tusi Paia faatasi ma Molimau a Ieova, ua e iloa ai le upu moni. E mautinoa o mea ua e aʻoaʻoina e fesoasoani iā te oe e maua ai se faiā lelei ma le Atua ma e maua ai le faamoemoe o le ola i le lumanaʻi, ma faamanuiaga i se lalolagi parataiso i lalo o le pulega a le Malo o le Atua. Ua faamalosia lou faatuatua i le Afioga a le Atua, ma e ala i le faifaimea faatasi ma le faapotopotoga Kerisiano, ua e tofo ai i le tele o faamanuiaga. Ua e talisapaia le auala o loo feutagaʻi ai Ieova ma ona tagata i aso nei.​—Saka. 8:23.

A o e sauni atu mo le papatisoga, o le a aogā iā te oe le autaluina o talitonuga faavae Faa-Kerisiano ia e tauaaoina e toeaina o le faapotopotoga. (Epe. 6:1-3) Tau ina ia faaauau pea ona faamanuia Ieova i au taumafaiga uma ina ia iloa ai o ia, ma ia foaʻi atu iā te oe le taui na folafolaina mai.​—Ioa. 17:3.

1. Aiseā ua e manaʻo ai e papatiso?

2. O ai Ieova?

• “O Ieova o le Atua moni i le lagi i lugā atoa ma le lalolagi i lalo nei. E leai lava se isi.”​—Teu. 4:39.

• “O oe e ou le suafa o Ieova, e na o oe lava o Lē e Silisili Ese i le lalolagi uma.”​—Sala. 83:18.

3. Aiseā e tāua ai lou faaaogāina o le suafa o le Atua?

• “Ia faapea ona outou tatalo: ʻLo matou Tamā e o i le lagi, ia faapaiaina lou suafa.’”​—Mata 6:9.

• “E faaolaina i latou uma o ē e valaau i le suafa o Ieova.”​—Roma 10:13.

4. O ā nisi taʻu o loo faaaogā i le Tusi Paia e faamatala ai Ieova?

• “O Ieova o Lē na foafoaina tuluʻiga uma o le lalolagi, o le Atua e soifua e faavavau”​—Isa. 40:28.

• “Lo matou Tamā e o i le lagi.”​—Mata. 6:9.

• “O le Atua o le alofa lava ia.”​—1 Ioa. 4:8.

5. O le ā e mafai ona e avatu iā Ieova le Atua?

• “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.”​—Mare. 12:30.

• “E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.”​—Luka 4:8.

6. Aiseā e te manaʻo ai e faamaoni iā Ieova?

• “Loʻu atalii e, ia atamai oe ma faafiafia ai loʻu loto, ona ou mautali ai lea i lē o loo taufaifai mai.”​—Faata. 27:11.

7. O ai e tatau ona e tatalo iai, ma o le suafa o ai e ala atu ai au tatalo?

• “E moni, e moni, ou te [Iesu] fai atu iā te outou, Afai e tou te talosaga atu i le Tamā i se mea, e na te foaʻi mai iā te outou i loʻu igoa.”​—Ioa 16:23.

8. O ā nisi o mea e tatau ona faaaofia i au tatalo?

• “Ia faapea ona outou tatalo: ʻLo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi. Ia e foaʻi mai i le aso nei a matou meaʻai mo le asō; ma faamagalo mai i a matou agasala e pei foʻi ona matou faamagalo atu i ē o agasala mai iā i matou. Aua foʻi neʻi tuua i matou e lolo atu i faaosoosoga, ae ia laveaʻi iā i matou mai i lē o loo leaga’”​—Mata. 6:9-13.

• “O le mea lenei ua tatou mautinoa ai i le Atua, po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.”​—1 Ioa. 5:14.

9. Aiseā e ono lē faafofogaina ai e Ieova se tatalo a se tasi?

•“Latou te alalaga atu ai iā Ieova mo se fesoasoani, ae e lē tali mai o ia iā i latou . . . auā ua leaga a latou mea e fai.”​—Mika 3:4.

• “O loo silasila mai fofoga o Ieova i ē e amiotonu, e faafofoga mai foʻi ona taliga i la latou talosaga; ae e faasagatau atu fofoga o Ieova i ē o faia mea leaga.”​—1 Pete. 3:12.

10. O ai Iesu Keriso?

• “Ona tali mai lea o Simona Peteru: ʻO oe o le Keriso, o le Alo o le Atua soifua.’”​—Mata. 16:16.

11. Aiseā na afio mai ai Iesu i le lalolagi?

• “E leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.”​—Mata. 20:28.

• “E tatau ona ou [Iesu] folafola atu le tala lelei o le malo o le Atua i isi foʻi aai, auā o le mea lea na auina mai ai aʻu.”​—Luka 4:43.

12. E faapefea ona e faaalia le loto faafetai i le taulaga a Iesu?

• “Na maliu o ia mo tagata uma, ina ia lē toe ola i latou mo i latou lava, ae ia ola mo ia o lē na maliu mo i latou ma toe faatūina mai.”​—2 Kori. 5:15.

13. O le ā le pule ua tuuina atu iā Iesu?

• “Ua tuuina mai iā te aʻu le pule uma i le lagi ma le lalolagi.”​—Mata. 28:18.

• “Ua faaeaina ai foʻi o ia e le Atua i se tulaga e sili ona maualuga, ma avatu ma le agalelei iā te ia le suafa e sili i isi igoa uma.”​—Fili 2:9.

14. Pe e te talitonu o le Vaega Pule o Molimau a Ieova, o “le pologa faamaoni ma le faautauta” na tofia e Iesu?

• “O ai la le pologa faamaoni ma le faautauta, o lē ua tofia e lona matai e vaavaaia lana ʻaufaigaluega, e avatu a latou meaʻai i le taimi tatau?”​—Mata. 24:45.

15. O le ā le agaga paia?

• “Ona tali mai lea o le agelu iā te ia: ʻE iā te oe le agaga paia, ma e faamalumalu ifo iā te oe le mana o le Silisili Ese. O le mea lea e taʻua ai lē o le a fanau mai, e paia ma o le Alo o le Atua.’”​—Luka 1:35.

• “O lea la, o outou o ē e leaga, afai tou te avatu i a outou fanau meaalofa lelei, e sili atu la ona foaʻi mai e le Tamā o i le lagi le agaga paia iā i latou o ē e ōle atu iā te ia!”​—Luka 11:13.

16. Ua faapefea ona faaaogā e Ieova lona agaga paia?

• “Na faia le lagi i le afioga a Ieova, na faia foʻi a latou ʻau uma i le mānava a lona fofoga.”​—Sala. 33:6.

• “E maua e outou le mana, pe a oo ifo iā te outou le agaga paia, ona fai lea o outou ma molimau iā te aʻu . . . i tuluʻiga uma o le lalolagi.”​—Galu. 1:8.

• “E leai se valoaga o i Tusitusiga Paia e tupuga mai i manatu o tagata. Auā e lē o loto o tagata na aumai ai valoaga, ae na tautatala tagata i mea na faailoa mai e le Atua e ala i le taʻitaʻiga a le agaga paia.”​—2 Pete. 1:20, 21.

17. O le ā le malo o le Atua?

• “O le a faatūina ai e le Atua o le lagi o le malo e lē faaumatia lava. O lea malo foʻi e lē tuuina atu i se isi nuu. O le a ia tuʻimomomoina ma faaumatia malo uma, ae e tumau lea malo e faavavau.”​—Tani. 2:44.

18. O ā aogā o le a e maua ona o le pulega a le malo o le Atua?

• “Na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”​—Faaa. 21:4.

19. E faapefea ona e iloa ua lata ona oo mai faamanuiaga o le Malo?

• “Ua ō mai ona soo iā te ia ua na o i latou, ua faapea mai: ʻIa e fetalai mai iā i matou, Pe e oo afea ia mea, ma o le ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?’ Ona tali atu lea o Iesu iā i latou: ʻ. . .O le a siitaua atu isi atunuu i isi atunuu, ma isi malo i isi malo, o le a iai foʻi oge ma mafuiʻe i lea mea ma lea mea. O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga’”​—Mata. 24:3, 4, 7, 14.

• “O aso e gata ai e oo mai ai aso e sili ona faigatā. Auā e avea tagata ma ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, o ē e lē faamaoni, o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua, o ē e foliga mai e faamaoni i le Atua, ae e latou te lē o ola e tusa ai ma lea mana.”​—2 Timo. 3:1-5.

20. E faapefea ona e faailoa atu e tāua le Malo iā te oe?

• “O lea, ia faaauau pea ona outou saʻili muamua le malo ma le amiotonu.”​—Mata. 6:33.

• “Fetalai atu lea o Iesu i ona soo: ʻA fia mulimuli mai se tasi iā te aʻu, ia faafitia e ia o ia lava ma amo le laau e faapuapuagatia ai o ia, ma mulimuli mai pea iā te aʻu.’”​—Mata. 16:24.

21. O ai Satani ma ana temoni?

• “O outou e mai i lo outou tamā le Tiapolo . . . O ia o le fasioti tagata talu le amataga.”​—Ioa 8:44.

• “Ona lafo ifo lea o le tarako tele, o le uluaʻi gata lea, ua igoa foʻi i le Tiapolo ma Satani, o lē ua faasesēina le lalolagi atoa; ua lafo ifo o ia i le lalolagi, ua lafo ifo foʻi ana agelu faatasi ma ia.”​—Faaa. 12:9

22. O le ā na tuuaʻia ai e Satani Ieova ma i latou o loo tapuaʻi iā te Ia?

• “Ona tali atu lea o le fafine i le gata: ʻO fua o laau o le faatoʻaga, e mafai ona ma aai ai. A o le fua o le laau o loo i le ogatotonu o le faatoʻaga, na fetalai mai le Atua, “Aua lava neʻi oulua aai ai, aua foʻi neʻi oulua papaʻi i ai, ina neʻi oulua feoti.”’Ona fai mai lea o le gata i le fafine: ʻE lua te lē oti lava. Auā ua silafia e le Atua, o le aso lava lua te aai ai e pupula ai o oulua mata, ona pei ai lea o oulua o le Atua, e iloa le lelei ma le leaga.’”​—Kene. 3:2-5.

• “Ona tali mai lea o Satani iā Ieova, ua faapea mai: ʻO le paʻu e sui ai le paʻu, o mea uma foʻi ua iai i le tagata e avatu e ia e sui ai lona ola.’”​—Iopu 2:4.

23. E faapefea ona e faamaonia le sesē o tuuaʻiga a Satani?

• “Auauna atu iā te ia [i le Atua] ma le lotoatoa.”​—1 No. 28:9.

• “Seʻia oo lava i loʻu oti, ou te lē aveesea loʻu faamaoni!”​—Iopu 27:5.

24. Aiseā ua feoti ai tagata?

• “Pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.”​—Roma 5:12

25. O le ā le tulaga o tagata ua feoti?

• “O ē ua ola ua latou iloa e oti i latou; a o ē ua oti, latou te lē iloa se mea.”​—Fai. 9:5.

26. O le ā le faamoemoe mo i latou ua feoti?

• “E toetutū mai tagata amiotonu ma tagata amiolētonu.”​—Galu. 24:15.

27. E toʻafia le vaega e ō i le lagi e pule faatasi ma Iesu?

• “Faauta! o loo tū mai le Tamaʻi Mamoe i le Mauga o Siona, o loo faatasi ma ia le selau fā sefulu fā afe, o ē ua tusia lona suafa ma le suafa o lona Tamā i o latou muāulu.”​—Faaa. 14:1.

I lau suʻesuʻega o le Tusi Paia, ua e iloa ai mea e faafinagaloina e Ieova mai iā te oe ma le auala e faaōgatusa ai lou olaga ma ana tapulaa amiotonu. O lou faatatauina o mea ua e iloa, atonu na e faia ai ni suiga i lau amio faapea lau vaaiga i le olaga. Talu ai o lea ua e filifili e ola e tusa ai ma tapulaa amiotonu a Ieova, ua mafai nei ona e faia se auaunaga e finagalo malie i ai o ia, a o avea ai oe o se faifeʻau o le tala lelei.

O le autaluina o fesili o loo mulimuli mai, o le a fesoasoani e tāmau ai i lou mafaufau tapulaa amiotonu a Ieova, ma faamanatu atu iā te oe nisi o mea e mafai ona e faia, e avea ai o se auauna e finagalo malie i ai o ia. O le a fesoasoani nei faamatalaga iā te oe, ina ia iloa ai le tāua o le faia o mea uma ma se lotofuatiaifo lelei, ma ia faamamaluina ai Ieova.​​—2 Kori. 1:12; 1 Timo. 1:19; 1 Pete. 3:16, 21.

O lou ausia o lea tulaga i lau suʻesuʻega, ua e naunau ai e gauaʻi i tulafono a Ieova ma avea ma vaega o lana faalapotopotoga. O fesili ma mau faale-Tusi Paia o loo sii mai, o le a fesoasoani iā te oe e iloilo ai lou malamalamaga i le gauaʻi i faatulagaga a Ieova i le faapotopotoga, aiga, po mataupu e fesootaʻi atu i faiga faapolotiki a lenei faiga o mea. E lē taumatea o le a faaloloto ai lou talisapaia o faatulagaga a Ieova ina ia aʻoaʻo ma atiaʻe ona tagata i le itu faaleagaga. E aofia ai sauniga a le faapotopotoga o le a e manaʻo e auai ma faia ai se sao pe a talafeagai ma lou tulaga.

O le a taulaʻi atu foʻi lenei vaega i le tāua o le faia e lē aunoa o se sao i le galuega talaʻi o le Malo, fesoasoani i isi ina ia aʻoaʻoina e faatatau iā Ieova faapea lona finagalo mo tagata. (Mata. 24:14; 28:19, 20) O le a tāmau ai foʻi i lou mafaufau le tāua o lou tuuina atu iā Ieova le Atua ma lou papatisoga. E mafai ona e mautinoa e talisapaia e Ieova lou taliaina o lona agalelei faifua ua faasafua mai iā te oe.

1. O le ā le faatulagaga faaKerisiano mo faaipoipoga? O le ā le faavae faale-Tusi Paia e tasi mo le tatalaina o faaipoipoga?

• “Tou te leʻi faitaulia ea o lē na foafoaina i laʻua i le amataga, na ia faia i laʻua o le tane ma le fafine, ma na ia fetalai atu, ʻO le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi’? O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata . . . Ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.”​—Mata. 19:4-6, 9.

2. Aiseā e tatau ai ona faaipoipo faaletulafono ē o loo nonofo faatasi o se tane ma se avā? Afai ua e faaipoipo, po ua e mautinoa ua lesitalaina faaletulafono lau faaipoipoga ma e ōgatusa ma aiāiga a le malo?

• “Ia faamanatu atu pea iā i latou ina ia gauaʻi ma usiusitaʻi i malo ma pule.”​—Tito 3:1.

• “Ia faamamaluina e tagata uma le faaipoipoga, ma ia aua neʻi faaleagaina le moega o le faaipoipoga, auā e faamasino e le Atua o ē e faitaaga ma ē e mulilulua.”​—Epe. 13:4.

3. O le ā lau matafaioi i totonu o le aiga?

• “Loʻu atalii e, ia e faalogo i le aʻoaʻiga a lou tamā, ma aua e te tuulafoaʻiina le tulafono a lou tinā.”​—Faata. 1:8.

• “O le tane o le ulu lea o le avā, e pei foʻi o Keriso o le ulu ia o le faapotopotoga . . . Tane, ia faaauau ona alolofa atu i a outou avā, e pei o le Keriso foʻi ona alofa i le faapotopotoga.”​—Efe. 5:23, 25.

• “O outou tamā foʻi, aua le faatigā loto i a outou fanau, a ia tausia pea i latou i aʻoaʻiga ma apoapoaʻiga a Ieova.”​—Efe. 6:4.

• “O outou le fanau, ia usiusitaʻi i o outou mātua i mea uma lava, auā o le mea lea e finagalo malie i ai le Alii.”​—Kolo. 3:20.

• “Outou avā, ia gauaʻi atu i a outou lava tane.”​—1 Pete. 3:1.

4. Aiseā e tatau ai ona tatou faatāuaina le ola?

• “Ua ia [le Atua] foaʻi mai lava i tagata uma le ola, ma le mānava, ma mea uma lava. . . . O ia ua tatou ola ai, gaoioi ai, ma ua tatou iai foʻi ona o ia.”​—Galu. 17:25, 28.

5. Aiseā e lē tatau ai ona tatou fasiotia se tagata, e aofia ai ma se pepe e leʻi fanau mai?

• “Ae afai e fetauaʻi ni tamāloloa ma lavea ai se fafine ua tō ma . . . afai e oti ai se tasi, e ao ona avatu le ola e sui ai le ola.”​—Eso. 21:22, 23.

• “Na silasila mai lava ou fofoga ina o afuafua aʻu, na tusia foʻi i lau tusi ona vaega uma, e faatatau i aso na faia ai a o leai ni vaega o loʻu tino.”​—Sala. 139:16.

• ʻE ʻinoʻino Ieova i lima e sasaa le toto o ē e lē sala.’​—Faata. 6:16, 17.

6. O le ā le poloaʻiga a le Atua e faatatau i le toto?

• “Faaauau ona taumamao mai. . . le toto ma mea ua titina.”​—Galu. 15:29.

7. Aiseā e tatau ai ona tatou alolofa i o tatou uso ma tuafāfine Kerisiano?

• “Ua ou tuuina atu iā te outou le poloaʻiga fou, ina ia outou alolofa o le tasi i le isi; e pei ona ou alofa atu iā te outou, ia outou alolofa foʻi o le tasi i le isi. O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”​—Ioa 13:34, 35.

8. Ina ia taofia le salalau atu i isi o se faamaʻi pipisi: (a) Aiseā e lē tatau ai i le tagata ua maua i lea faamaʻi ona tausolomua e opo ma sogi atu i isi? (e) Aiseā e lē tatau ai ona ita pe a filifili nisi e lē valaaulia o ia i o latou fale? (i) Aiseā e tatau ai i se tasi o lē atonu ua maua i se faamaʻi pipisi, ona lotomalie e alu e suʻe lona toto a o leʻi amata se faigāuō ma se tasi o le isi itupā? (o) Aiseā e tatau ai i le tagata ua maua i se faamaʻi pipisi ona faailoa atu i le sooupu o le ʻautoeaina lona tulaga a o leʻi papatiso?

• “Aua neʻi o outou nofo aitalafu i se tagata ae e tau lava o le alofa o le tasi i le isi. . . . ʻIa e alofa atu i lou tuaoi e pei o oe lava iā te oe.’ E lē agaleaga le alofa i lona tuaoi.”​—Roma 13:8-10.

• “Vaavaai ma le naunau e lē gata i au lava mea, ae i mea foʻi e lelei ai isi.”​—Fili. 2:4.

9. Aiseā e faatalitalia ai e Ieova i tatou e faamagalo atu i isi?

• “Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia.”​—Kolo. 3:13.

10. O le ā e tatau ona e faia pe a taufaaleaga pe taufaasesē se uso iā te oe?

• “Afai ua faia e sou uso se agasala, ia e alu lua te talanoa na o oulua e faaali i ai lana mea sesē. A faalogo o ia, ua e maua la lou uso. Ae afai e lē faalogo o ia, ia lua ō ma se toʻatasi po o se toʻalua, ina ia faamaonia ai mataupu uma i le molimau a le toʻalua po o le toʻatolu. Afai e lē faalogo o ia i na tagata, ia talanoa atu i le faapotopotoga. Afai foʻi e lē faalogo o ia i le faapotopotoga, ona e vaai lea iā te ia e pei o se tagata o nuu ese ma se aolafoga.”​—Mata. 18:15-17.

11. O le ā le silafaga a Ieova i agasala nei?

▪ Amioga lē mamā uma taufeusuaʻiga

▪ Faaaogāina o faatusa i tapuaʻiga

▪ Feusuaʻiga i le itupā e tasi

▪ Gaoi

▪ Taaloga faitupe

▪ Onā

• “Aua neʻi faasesēina outou. O ē e faitaaga, o ē e ifo i tupua, o ē e mulilulua, o tauatane, o tane e momoe ma isi tane, o ē e gāoi, o ē e matapeʻapeʻa, o ē e onanā, o ē e fai upu masoā, ma ē e taufaavalea, e lē fai mo latou tofi le malo o le Atua.”​—1 Kori. 6:9, 10.

12. E faatatau i feusuaʻiga lē mamā e aofia ai soo se ituaiga gaoioiga taufeusuaʻiga i fafo atu o le faaipoipoga, o le ā ua e maumauaʻi e fai?

• “Ia sosola ese i le faitaaga!”​—1 Kori. 6:18.

13. Aiseā e tatau ai ona tatou faamamao mai le faalagolago i fualaau e aunoa ma ni māfuaaga faafomaʻi, po o fualaau e faaleagaina ai le mafaufau?

• “Ia tuuina atu o outou tino o le taulaga ola, e paia, ma e mālie i le Atua, ia faia le auaunaga paia ma lo outou mafaufau lelei. Aua tou te mulimuli i lenei faiga o mea a le lalolagi, ae peitaʻi ia liliu e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.”​—Roma 12:1, 2.

14. O ā ni faiga faatemoni e teena e le Atua?

• “Aua neʻi maua iā te oe . . . o sē e faia valovaloga faataulāitu, o sē e faia faiga faaagaga, po o se tasi e saʻili i ni faailoilo o mea o le a tutupu po o se faataulāitu, po o se tasi e na te faalauatau i isi, po o se tasi e alu atu i sē e saʻili i agaga, po o lē e vavalo i mea e tutupu i le lumanaʻi, po o se tasi e fesili atu i ē ua oti.”​—Teu. 18:10, 11.

15. Afai e faia e se tagata se agasala matuiā ma ua manaʻo ina ia toe talileleia o ia e Ieova, o le ā le gaoioiga e ao ona ia vave faia?

• “Ona ou taʻutino atu lea iā te oe o laʻu agasala, ou te leʻi ufitia foʻi loʻu sesē. Na ou faapea ifo: ʻOu te taʻutino atu aʻu solitulafono iā Ieova.’”​—Sala. 32:5.

• “Pe e iai ea se tasi o outou ua maʻi? Inā aami atu ia o toeaina o le faapotopotoga ina ia latou tatalo mo ia, ma uu iā te ia i le suāuu i le suafa o Ieova. O le tatalo e faia i le faatuatua e malosi ai le tagata maʻi, ma o le a faatūina o ia e Ieova. E faamagaloina foʻi o ia pe afai ua agasala.”​—Iako. 5:14, 15.

16. Afai ua e iloa na faia e se Kerisiano se agasala matuiā, o le ā e tatau ona e faia?

• “Pe afai e faalogo se tasi i se faamalaia ua faia i luma o le lautele, ae na te lē faailoaina atu se agasala ua faia e se tasi e ui o ia o se molimau, pe na vaai i se mea, pe iloa foʻi se mea, e agasala o ia, ma e ao la ona ia tali atu ona o lona sesē.”​—Levi. 5:1.

17. Pe afai na faia se faasilasilaga i se tasi ua lē toe avea ma Molimau a Ieova, o le ā la tatou vaaiga i lenā tagata?

• “Aua neʻi outou toe faifaimea faatasi ma sē ua taʻua o se uso ae e faitaaga, pe e matapeʻapeʻa, pe e ifo i tupua, pe e fai upu masoā, pe e onā, pe e taufaavalea, aua foʻi neʻi aai faatasi ma se tagata faapena.”​—1 Kori. 5:11.

• “Afai e sau se tasi iā te outou ae na te lē faailoa maia lenei aʻoaʻoga, aua lava tou te taliaina o ia i o outou fale, pe faatalofa atu foʻi iā te ia.”​—2 Ioa. 10.

18. Aiseā e tatau ai ona e faauō atu i ē e alolofa iā Ieova?

• “O lē e savali ma tagata atamamai, e atamai ai o ia, a o lē e faifaimea faatasi ma tagata vālea, e leaga ai lava o ia.”​—Faata. 13:20.

• “Aua neʻi faasesēina outou. O aumea leaga e faaleagaina ai mea lelei ua masani ai tagata.”​—1 Kori. 15:33.

19. Aiseā e solitū ai Molimau a Ieova i faiga faapolotiki?

• “E lē o ni tagata o le lalolagi i latou, e pei foʻi o aʻu [Iesu], e lē o aʻu o se tagata o le lalolagi.”​—Ioa 17:16.

20. Aiseā e tatau ai ona e usiusitaʻi i faigāmalo?

• “Ia gauaʻi tagata uma i faipule silisili, auā e leai se pule pe a lē mai i le Atua; o faipule o loo iai nei, ua faatagaina e le Atua e pule i o latou tulaga eseese.”​—Roma 13:1.

21. Pe a feteenaʻi tulafono a tagata ma tulafono a le Atua, o le ā e tatau ona e faia?

• “E tatau ona matou usiusitaʻi i le Atua o le pule, nai lo o tagata.”​—Galu. 5:29.

22. O ā ni mau o le Tusi Paia e fesoasoani iā te oe ia tumau pea ona faaesea mai le lalolagi pe a filifili se galuega?

• “E latou te lē toe sii le pelu, o le tasi atunuu i le isi atunuu, pe e latou te toe aʻoaʻo foʻi i taua.”​—Mika 4:3.

• “Loʻu nuu e, ia outou ō ese mai iā te ia [Papelonia le Aai Tele], pe afai tou te lē mananaʻo e tofusia i ana agasala, ma lē mananaʻo e aafia i ona mala.”​—Faaa. 18:4.

23. O ā ituaiga faafiafiaga ma tafaoga o le a e filifilia, ma o ā ituaiga e te lē filifilia?

• “E inosia lava e [Ieova] le tagata e fiafia i le faasauā.”​—Sala. 11:5.

• “Ia ʻinoʻino i le leaga, ae pipii i le lelei.”​—Roma 12:9.

• “O mea uma ua moni, o mea uma ua matuā tāua, o mea uma ua tonu, o mea uma ua mamā, o mea uma e faatupu ai le lotofiafia, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.”​—Fili. 4:8.

24. Aiseā e lē tapuaʻi faatasi ai Molimau a Ieova ma isi vaega faalotu?

• “E lē mafai foʻi ona outou aai i ʻle laoai a Ieova’ ma le laoai a temoni.”​—1 Kori. 10:21.

• “ʻIa outou vavaeese,’ ua fetalai mai ai Ieova, ʻma aua tou te toe papaʻi atu i se mea e lē mamā’ ʻona ou talia ai lea o outou.’”​—2 Kori. 6:17.

25. O ā ni mataupu silisili e fesoasoani iā te oe e filifili ai pe faia sau vaega i se aso faamanatu?

• “Na latou miomiō pea ma nuu ma aʻoaʻoina a latou gaoioiga. Ua auauna atu pea i latou i o latou tupua,ma na avea nei mea ma mailei iā i latou.”​—Sala. 106:35, 36.

• “O ē ua oti, latou te lē iloa se mea.”​—Fai. 9:5.

• “E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.”​—Ioa 17:16.

• “Ua lava ia na taimi i aso ua mavae na outou faia ai le manaʻo o tagata o le lalolagi, o amioga matagā, ma le tuʻinanau, le inu tele i le uaina, ma patī lē taupulea, ma tauvaga o inuga ʻava, ma le ifo i tupua e inosia.”​—1 Pete. 4:3.

26. E faapefea ona fesoasoani faaaʻoaʻoga faale-Tusi Paia iā te oe, e filifili ai pe e te faamanatuina aso fanau?

• “I le aso lona tolu, o le aso fanau foʻi lea o Farao, ona ia faia lea o se taumafataga mo ana auauna uma, ma ua ia tatalaina ai le pule o le ʻautautū uaina ma le pule o le ʻaufaifalaoa a o iai ana auauna uma. Ua ia toe faaea le pule o le ʻautautū uaina i lona tulaga o se tautū uaina . . . A o le pule o le ʻaufaifalaoa ua ia faatautauina.”​—Kene. 40:20-22.

• “Ina ua faamanatuina le aso fanau o Herota, na siva ai le tama teine a Herotia ma na matuā faafiafiaina ai Herota. O lea, na ia tautō ma folafola atu iā te ia e avatu so o se mea lava e talosaga mai ai. Ona faaoso ai lea o ia e lona tinā e fai atu: “Ia aumai iā te aʻu i inei le ulu o Ioane le Papatiso i se ipu.’ Ona ia auina atu lea o se tasi i le falepuipui, ina ia vavaeese le ulu o Ioane”​—Mata. 14:6-8, 10.

27. Aiseā e te manaʻo ai e mulimuli i le taʻitaʻiga a le ʻautoeaina?

• “Ia usiusitaʻi i ē o taʻimua iā te outou ma ia gauaʻi iā i latou, auā o loo leoleoina e i latou o outou ola talu ai e tatau ona latou fai atu se tala; ina ia latou faia ma le olioli ae e lē ma le ōi, auā e leaga lea mo outou.”​—Epe. 13:17.

28. Aiseā e tāua ai mo oe ma lou aiga ona faatulaga se taimi e faitau ma suʻesuʻe ai e lē aunoa le Tusi Paia?

• “E naunau o ia i le tulafono a Ieova, e faitau lē leoa o ia i lana tulafono i le ao ma le pō. E avea o ia e pei lava o se laau ua totō i tafatafa o vaitafe, e fua mai ona fua i ona lava tau, e lē mamae foʻi ona lau. Ae e taulau manuia mea uma e na te faia.”​—Sala. 1:2, 3.

29. Aiseā e te fiafia ai e auai ma faia se sao i sauniga?

• “Ou te taʻutaʻu atu lou suafa i oʻu uso; ou te vivii atu iā te oe i totonu o le faapotopotoga.”​—Sala. 22:22.

• “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou e pei o le masani a isi, a ia fefaalaeiauaʻi, ia sili foʻi ona faia faapea auā ua outou iloa ua matuā latalata mai lava le aso.”​—Epe. 10:24, 25.

30. O le ā le galuega e sili ona tāua na tuuina mai e Iesu iā i tatou e fai?

• “O le mea lea, ia outou ō atu e fai tagata o nuu uma lava ma soo, ma papatiso atu iā i latou . . . , ia aʻoaʻoina i latou ia tausi i mea uma ua ou poloaʻi atu ai iā te outou.”​—Mata. 28:19, 20.

31. Pe a faia a tatou foaʻi mo galuega o le Malo po le fesoasoani foʻi i ō tatou uso ma tuafāfine, o le ā le uiga e faafiafiaina ai Ieova?

• “Ia e āva iā Ieova i au ʻoa.”​—Faata. 3:9.

• “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.”​—2 Kori. 9:7.

32. O ā faigatā e faatalitalia e Kerisiano o le a latou fesagaʻia?

• “E fiafia o ē e sauāina ona o le amiotonu, auā e fai mo i latou le malo o le lagi. E fiafia outou pe a upuleagaina, sauāina, ma tuuaʻia pepelo outou i mea leaga uma ona o aʻu. Ia outou olioli ma fiafia, auā o loo i le lagi lo outou taui e tele; auā na faapena foʻi ona latou faasauā i perofeta o ē na muamua atu iā te outou.”​—Mata. 5:10-12.

33. Aiseā o se faaeaga faapitoa ai le papatiso ma avea ma se tasi o Molimau a Ieova?

• “Na avea foʻi lau afioga ma mea e fiafia ma olioli ai loʻu loto; auā ua taʻua aʻu i lou suafa, Ieova e, le Atua.”​—Iere. 15:16.

E masani ona faia papatisoga i fonotaga ma tauaofiaga a Molimau a Ieova. Pe a māeʻa le lauga o le papatisoga, o le a valaaulia e le failauga tagata o le a papatiso e tutulaʻi, ma tali fesili e lua o loo mulimuli mai ma le leotele:

1. Po ua e salamō mai i au agasala, tuuina atu oe iā Ieova ma talia lana auala i le faaolataga e ala iā Iesu Keriso?

2. Po ua e malamalama o lou papatisoga ua faailoa atu ai o oe o se Molimau a Ieova, ma ua avea oe o se vaega o le faalapotopotoga a Ieova?

O le tali atu o sui papatiso ioe i nei fesili, ua latou “taʻutino atu ai i luma o tagata” ua latou faaalia le faatuatua i le togiola, ma ua tuuina atu atoatoa o latou ola iā Ieova. (Roma 10:9, 10) E mautinoa e mananaʻo tagata o le a papatiso e mafaufau loloto muamua faatasi ma le tatalo i nei fesili, ina ia mafai ai ona latou tali atu e ōgatusa ma mea ua latou talitonu i ai.

Po ua māeʻa ona e tuuina atu oe lava iā Ieova i le tatalo, taʻutino atu o le a e tapuaʻi tau lava o Ia ma avea le faia o lona finagalo o se mea e sili ona tāua i lou olaga?

Po ua e mautinoa atoatoa ua tatau ona papatisoina oe i le taimi lenei?

O ā laʻei e talafeagai mo le papatisoga? (1 Timo. 2:9, 10; Ioa. 15:19; Fili. 1:10)

E manaʻomia ona tatou laʻei i laʻei “onomea ma ia mafaufau lelei,” ina ia faailoa atu ai lo tatou “matataʻu i le Atua.” O lea, o i latou o le a papatiso e lē tatau ona ofu i se ofu taʻele e lē onomea po se ofu o loo tusia ai ni faaupuga. E tatau ona laʻei i se auala e atagia mai ai le mamā ma onomea, ma ia talafeagai lelei ma lenei faatasiga.

E tatau faapefea ona amioaʻi se tagata i le taimi e papatiso ai? (Luka 3:21, 22)

Ua faataatia e le papatisoga o Iesu le faaaʻoaʻoga mo le papatisoga o Kerisiano i aso nei. Na malamalama Iesu o le papatisoga o se laasaga tāua, ma na atagia mai lenā mea i ona manatu ma gaoioiga. O lea, o le mea e fai ai le papatisoga e lē o se nofoaga e fai ai ni tausuaga lē talafeagai, taaalo ai, ʻauʻau ai, pe faia ai foʻi nisi amioga e aveesea ai le mamalu o le aso. E lē tatau foʻi i le tagata o le a papatiso ona amioaʻi e pei lava ua ia manumalo. E ui lava o le papatisoga o se taimi e olioli ai, ae e tatau ona faaalia i se auala faaaloalo.

E faapefea i le auai e lē aunoa i sauniga ma aufaatasiga ma le faapotopotoga ona fesoasoani iā te oe e faataunuu ai lou tuuina atu iā Ieova?

Pe a uma ona e papatiso, aiseā e matuā tāua ai ona e tausisi pea i se faasologa lelei o le faia o au lava suʻesuʻega, ma auai e lē aunoa i le faiva?