Le Auala ua Faamaopoopoina ma Pulea ai le Faapotopotoga

I LE uluaʻi tusi a Paulo i Kerisiano i Korinito, na ia taʻua ai se mea moni tāua e faatatau i le Atua. Na ia tusi e faapea: “O le Atua, o ia o le Atua o le filemu ma e fai mea maopoopo.” Ona ia faapea atili mai lea e faatatau i sauniga a le faapotopotoga: “Ia faia mea uma i se tulaga talafeagai ma le maopoopo.”​—1 Kori. 14:33, 40.

² I le amataga o le tusi lenei a Paulo, na avatu ai e le aposetolo se apoapoaʻiga e faatatau i fevaevaeaʻiga na tulaʻi mai i totonu o le faapotopotoga i Korinito. Na ʻaiʻoi atu Paulo i uso i inā, ina ʻia autasi i a latou upu’ ma “ia autasi o [latou] manatu ma mafaufauga.” (1 Kori. 1:10, 11) Ona ia avatu lea o fautuaga i mataupu eseese na aafia ai le autasi o le faapotopotoga. Na ia faamanino atu le manaʻomia o le autasi ma le felagolagomaʻi, e ala i lona faaaogāina o le faataʻitaʻiga i le tino o le tagata. Na ia uunaʻia sui uma o le faapotopotoga Kerisiano e tusa lava po o ai i latou, ina ia fetausiaʻi i se auala alofa. (1 Kori. 12:12-26) E atagia mai se faatulagaga maopoopo pe a felagolagomaʻi tagata uma o le faapotopotoga.

³ Ae e tatau faapefea ona faamaopoopoina le faapotopotoga Kerisiano? O ai e faamaopoopoina le faapotopotoga? O le ā le auala e faamaopoopoina ai? O ai e auauna i tulaga tofia i totonu o le faapotopotoga? E tatou te maua tali manino mo nei fesili pe a saʻili atu i le Tusi Paia mo taʻiala.​—1 Kori. 4:6.

FAAMAOPOOPOINA E ŌGATUSA MA FAATULAGAGA A LE ATUA

⁴ Na faavaeina le faapotopotoga Kerisiano i le Penetekoso 33 T.A. O ā mea e mafai ona tatou aʻoaʻoina e faatatau i le faapotopotoga i le uluaʻi senituri? O lenā faapotopotoga na faamaopoopoina ma pulea faatiokarate. O lona uiga, na pulea e ōgatusa ma le pule (gagana Eleni, kraʹtos) a le Atua (the·osʹ). I le 1 Peteru 5:10, 11 o loo faaliliuina nei upu e lua i le “malosi” ma le “Atua.” O faamatalaga faagaeeina e faatatau i le mea na tupu i Ierusalema i le toetoe 2,000 tausaga ua mavae, e faamaonia ai o le faapotopotoga o Kerisiano faauuina na faavaeina e le Atua. (Galu. 2:1-47) Na avea lea ma fale o le Atua, o lona aiga. (1 Kori. 3:9; Efe. 2:19) O loo mulimuli le faapotopotoga Kerisiano i aso nei, i le auala na faamaopoopo ma faagaoioia ai le faapotopotoga e pei ona faatulaga ai i le uluaʻi senituri.

⁵ E pe ā ma le toʻa 120 soo na faia aʻe ai le uluaʻi faapotopotoga ina ua faatoʻā amata. O i latou ia na muamua liligi ifo i ai le agaga paia, ma faataunuuina ai loa le Ioelu 2:28, 29. (Galu. 2:16-18) I le aso lava lenā, e tusa ma le 3,000 isi na papatisoina i le vai ma taliaina i totonu o le faapotopotoga o ē ua faauuina i le agaga. Na latou talia le upu e faatatau i le Keriso, ma “faaauau ona latou uaʻi atu i aʻoaʻoga a le ʻauaposetolo.” Ina ua māeʻa lenā, na faaauau pea ona ʻfaaopoopo atu e Ieova iā i latou i aso taʻitasi o ē ua faaolaina.’​—Galu. 2:41, 42, 47.

⁶ O le faatuputeleina o le faapotopotoga i Ierusalema, na māfua ai ona faitio le ositaulaga sili a Iutaia e faapea, ua faatumulia e le ʻausoo Ierusalema i a latou aʻoaʻoga. O soo fou na iai i Ierusalema, na aofia ai le toʻatele o ositaulaga Iutaia ua avea ma vaega o le faapotopotoga.​—Galu. 5:27, 28; 6:7.

⁷ Na fetalai Iesu: “Ona fai lea o outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.” (Galu. 1:8) O le mea lea na tupu ina ua tulaʻi mai sauāga ogaoga i Ierusalema ina ua mavae le maliu o Setefano. Na faataapeapeina soo na nonofo i Ierusalema, ma latou agaʻi atu ai i vaipanoa eseese o Iutaia ma Samaria. Peitaʻi, po o fea lava le vaipanoa na latou agaʻi atu i ai, ae na faaauau pea ona latou folafolaina atu le tala lelei ma faia isi ma soo. Na aofia ai i na soo nisi o tagata Samaria. (Galu. 8:1-13) I se taimi mulimuli ane, na talaʻia atu ai le tala lelei i tagata e lē o ni Iutaia e lē peritomeina, ma na maua ai ni iʻuga lelei. (Galu. 10:1-48) O nei galuega talaʻi uma na maua ai le tele o soo fou, ma iʻu ai i le faavaeina o ni faapotopotoga fou i fafo atu o Ierusalema.​—Galu. 11:19-21; 14:21-23.

⁸ O ā faatulagaga na faia ina ia faamautinoa ai ua faamaopoopoina, ma pulea nei faapotopotoga fou taʻitasi i le auala a le Atua? E ala i le uunaʻiga a le agaga paia, na faia ai se faatulagaga mo ni leoleo mamoe fesoasoani e latou te tausia le lafu. Na tofia e Paulo ma Panapa ni tane e auauna o ni toeaina, i faapotopotoga na asiasi atu i ai i le la uluaʻi asiasiga faamisionare. (Galu. 14:23) Na tusia foʻi e le tusitala o le Tusi Paia o Luka faamatalaga e faatatau i le feiloaʻiga a Paulo, ma toeaina o le faapotopotoga i Efeso. Na faapea atu Paulo iā i latou: “Ia outou uaʻi iā te outou lava, ma le lafu mamoe uma, o ē ua tofia i ai outou e le agaga paia e fai ma ovasia, ina ia leoleo le faapotopotoga a le Atua, lea ua ia faatauina mai i le toto o lona lava Alo.” (Galu. 20:17, 28) Na tofia nei tane e avea ma toeaina, ona o lo latou ausiaina o agavaa faale-Tusi Paia mo toeaina. (1 Timo. 3:1-7) Na tuuina atu foʻi iā Tito o lē na galulue faatasi ma Paulo, le pule e na te tofia ai toeaina i faapotopotoga i Kereta.​—Tito 1:5.

⁹ A o faateleina le aofaʻi o faapotopotoga na faavaeina, na faaauau pea ona avea le ʻauaposetolo ma toeaina i Ierusalema, o ni ovasia autū o lenei faapotopotoga Kerisiano i le lalolagi aoao i le uluaʻi senituri. Na avea i latou ma vaega pule o le faapotopotoga.

¹⁰ Na faailoa atu e Paulo i lana tusi i le faapotopotoga i Efeso, pe afai e latou te galulue faatasi ma le agaga o le Atua, o le a faatumauina le autasi o le faapotopotoga Kerisiano e ala i le usiusitaʻi i lo latou ulu, o Iesu Keriso. Na uunaʻia e le aposetolo Kerisiano i Efeso e atiaʻe le lotomaulalo, ma faatumauina le “autasi i le agaga” i faatasitasiga filemu ma tagata uma o le faapotopotoga. (Efe. 4:1-6) Ona ia sii mai lea o le Salamo 68:18, ma ia faasino atu i le faatulagaga a Ieova mo tane agavaa faaleagaga e tausia manaʻoga o le faapotopotoga o ni aposetolo, perofeta, faievagelia, leoleo mamoe ma o ni ē e aʻoaʻo atu. O nei tane o ni meaalofa mai iā Ieova, e latou te atiaʻe sui taʻitasi o le faapotopotoga ina ia latou ausia ni tulaga taʻumatuaina faaleagaga, e finagalo malie i ai le Atua.​—Efe. 4:7-16.

E MULIMULI FAAPOTOPOTOGA I ASO NEI I FAATULAGAGA NA FAATAATIA E LE ʻAUAPOSETOLO

¹¹ O le faatulagaga foʻi lea o loo faamaopoopoina ai faapotopotoga i aso nei, ma o loo mulimuli i ai faapotopotoga uma a Molimau a Ieova. O nei faapotopotoga uma o loo faia aʻe ai se faapotopotoga autasi i le lalolagi aoao, lea e faaautū i ē faauuina. (Saka. 8:23) Ua mafai ona taunuu lenei mea ona o Iesu Keriso. E pei ona sa ia folafola atu, o loo faaauau pea ona faatasi mai o ia i ona soo faauuina “i aso uma lava seʻia oo i le taufaaiʻuiʻuga o le faiga o mea.” Ua talia e i latou ua auai atu i lenei faapotopotoga o loo faatupulaʻia pea le tala lelei a le Atua. Ua tuuina atu atoatoa o latou ola iā Ieova ma papatisoina ma avea ai o ni soo o Iesu. (Mata. 28:19, 20; Mare. 1:14; Galu. 2:41) Ua latou amanaʻia foʻi Iesu Keriso o “le leoleo mamoe lelei,” ma o le Ulu o le lafu atoa lea e faia aʻe i Kerisiano faauuina faapea ma “isi mamoe.” (Ioa. 10:14, 16; Efe. 1:22, 23) E faatumauina le autasi o lenei “lafu e tasi,” i lo latou amanaʻiaina lea ma le faamaoni o le tulaga ulu o Keriso, ma gauaʻi atu i “le pologa faamaoni ma le faautauta” lea na ia tofia, o lana auala lea e faamaopoopoina ai. Tau ina ia o tatou maufaatuatuaina atoatoa lenei faatulagaga i aso nei.​—Mata. 24:45.

FAAAOGĀINA O ASOSI FAALOTU

¹² Ua faavaeina nisi o asosi ina ia mafai ai ona saunia meaʻai faaleagaga i le taimi tatau, faapea le folafolaina atu o le tala lelei o le Malo a o leʻi oo mai le iʻuga. O nei asosi faaletulafono e lesitalaina e tusa ai ma tulafono a atunuu eseese. E galulue soosootauʻau nei asosi eseese i atunuu taʻitasi, ma o loo faaaogāina ina ia faafaigofie ai le talaʻia o le tala lelei i le lalolagi aoao.

AUALA O LOO FAAMAOPOOPOINA AI LĀLĀ

¹³ O le taimi lava e faavaeina ai se ofisa o le lālā, e tofia ai foʻi ma se Komiti o le Lālā lea e faia aʻe i ni toeaina se toʻatolu pe sili atu. E latou te vaavaaia le galuega i lea atunuu po o isi atunuu i lalo o le vaavaaiga a lea lālā. E auauna se sui e toʻatasi o lenei komiti o se sooupu o le Komiti o le Lālā.

¹⁴ O faapotopotoga o loo i lalo o le vaavaaiga a lālā taʻitasi e vaevaeina i ni matagaluega. E eseese le tetelē o nei matagaluega e fua i le tetelē o vaipanoa, gagana o loo aofia ai, faapea le tele o faapotopotoga i atunuu o loo i lalo o le vaavaaiga a le lālā. E tofia se ovasia o le matagaluega e asia faapotopotoga ia o loo i matagaluega taʻitasi. E saunia mai e le ofisa o le Lālā taʻiala mo ovasia matagaluega i le auala e taulima ai ona tiute.

¹⁵ E talia e faapotopotoga uma faatulagaga ua faataatia mai e le faalapotopotoga mo le lelei o tagata uma. E talia foʻi e faapotopotoga le tofiaina o toeaina e vaavaaia galuega o loo faia i lālā, i matagaluega ma faapotopotoga. E faalagolago faapotopotoga i le pologa faamaoni ma le faautauta mo meaʻai faaleagaga i le taimi tatau. O loo usiusitaʻi le pologa faamaoni i aso nei i le tulaga ulu o Keriso, tausisi i mataupu silisili o le Tusi Paia, ma gaoioi e tusa ai ma le taʻitaʻiga a le agaga paia. A o tatou galulue faatasi uma i le autasi, ua tatou tofo ai i iʻuga lelei e talitutusa ma iʻuga na oo i Kerisiano i le uluaʻi senituri: ʻUa faaauau ona faamalosia le faatuatua o faapotopotoga, ma faatuputeleina ai mai i lea aso i lea aso.’​—Galu. 16:5.