Talanoaga Faaiʻu ma Tagata o le a Papatiso

E masani ona faia papatisoga i fonotaga ma tauaofiaga a Molimau a Ieova. Pe a māeʻa le lauga o le papatisoga, o le a valaaulia e le failauga tagata o le a papatiso e tutulaʻi, ma tali fesili e lua o loo mulimuli mai ma le leotele:

1. Po ua e salamō mai i au agasala, tuuina atu oe iā Ieova ma talia lana auala i le faaolataga e ala iā Iesu Keriso?

2. Po ua e malamalama o lou papatisoga ua faailoa atu ai o oe o se Molimau a Ieova, ma ua avea oe o se vaega o le faalapotopotoga a Ieova?

O le tali atu o sui papatiso ioe i nei fesili, ua latou “taʻutino atu ai i luma o tagata” ua latou faaalia le faatuatua i le togiola, ma ua tuuina atu atoatoa o latou ola iā Ieova. (Roma 10:9, 10) E mautinoa e mananaʻo tagata o le a papatiso e mafaufau loloto muamua faatasi ma le tatalo i nei fesili, ina ia mafai ai ona latou tali atu e ōgatusa ma mea ua latou talitonu i ai.

Po ua māeʻa ona e tuuina atu oe lava iā Ieova i le tatalo, taʻutino atu o le a e tapuaʻi tau lava o Ia ma avea le faia o lona finagalo o se mea e sili ona tāua i lou olaga?

Po ua e mautinoa atoatoa ua tatau ona papatisoina oe i le taimi lenei?

O ā laʻei e talafeagai mo le papatisoga? (1 Timo. 2:9, 10; Ioa. 15:19; Fili. 1:10)

E manaʻomia ona tatou laʻei i laʻei “onomea ma ia mafaufau lelei,” ina ia faailoa atu ai lo tatou “matataʻu i le Atua.” O lea, o i latou o le a papatiso e lē tatau ona ofu i se ofu taʻele e lē onomea po se ofu o loo tusia ai ni faaupuga. E tatau ona laʻei i se auala e atagia mai ai le mamā ma onomea, ma ia talafeagai lelei ma lenei faatasiga.

E tatau faapefea ona amioaʻi se tagata i le taimi e papatiso ai? (Luka 3:21, 22)

Ua faataatia e le papatisoga o Iesu le faaaʻoaʻoga mo le papatisoga o Kerisiano i aso nei. Na malamalama Iesu o le papatisoga o se laasaga tāua, ma na atagia mai lenā mea i ona manatu ma gaoioiga. O lea, o le mea e fai ai le papatisoga e lē o se nofoaga e fai ai ni tausuaga lē talafeagai, taaalo ai, ʻauʻau ai, pe faia ai foʻi nisi amioga e aveesea ai le mamalu o le aso. E lē tatau foʻi i le tagata o le a papatiso ona amioaʻi e pei lava ua ia manumalo. E ui lava o le papatisoga o se taimi e olioli ai, ae e tatau ona faaalia i se auala faaaloalo.

E faapefea i le auai e lē aunoa i sauniga ma aufaatasiga ma le faapotopotoga ona fesoasoani iā te oe e faataunuu ai lou tuuina atu iā Ieova?

Pe a uma ona e papatiso, aiseā e matuā tāua ai ona e tausisi pea i se faasologa lelei o le faia o au lava suʻesuʻega, ma auai e lē aunoa i le faiva?

FAATONUGA MO TOEAINA O LE FAAPOTOPOTOGA

Afai ua faailoa atu e se tagata talaʻi lona faanaunauga e fia papatiso, e ao ona faalaeiauina o ia e autalu lelei “Fesili mo Ē e Fia Papatiso” o loo maua i itulau e 185-207 o lenei tusi. E tatau ona faauaʻi atu o ia i le ulutala “Se Feʻau mo le Tagata Talaʻi e Leʻi Papatisoina” o loo i le itulau e 182, lea e faamatala ai le auala e sauniuni ai mo talanoaga ma toeaina. E pei ona taʻua i inā, e mafai e le tagata o loo fia papatiso ona faaaogā ana lava faamaumauga, ma e mafai foʻi ona tatala le tusi lenei a o faagasolo a latou talanoaga ma toeaina. Peitaʻi, e lē manaʻomia mo se isi tagata ona autaluina fesili ma le tagata o loo fia papatiso, a o leʻi feiloaʻi ma toeaina.

O soo se tasi e iai le faanaunauga e fia papatiso, e tatau ona faailoa atu i le sooupu a le ʻautoeaina. Pe a māeʻa ona autalu e le tagata o loo fia papatiso “Fesili mo Ē e Fia Papatiso,” o le a fesiligia o ia e le sooupu a le ʻautoeaina po ua māeʻa ona ia faia lona lava tuuina atu iā Ieova e faia lona finagalo e ala i le tatalo. Pe a faailoa mai ua uma ona ia faia faapea, ona faatulaga loa lea e le sooupu a le ʻautoeaina ni toeaina se toʻalua e talanoa ma le tagata “Fesili mo Ē e Fia Papatiso.” E eseese toeaina e tofia e taulima vaega taʻitasi. E lē manaʻomia ona faatali mo se faasilasilaga o se fonotaga po o se tauaofiaga, ona faia lea o nei talanoaga.

E masani lava e mafai ona talanoaina vaega e lua e pe tusa e tasi le itula mo vaega taʻitasi. E leai se mea e afāina ai pe a manaʻomia se isi taimi faaopoopo e talanoaina ai nei vaega. E tatau ona amata ma faaiʻu i le tatalo vaega taʻitasi. E lē tatau i lē o loo fia papatiso po o le toeaina ona faatopelau le talanoaina o fesili. O le a faamuamua e toeaina ua filifilia lenei talanoaga i a latou faasologa.

E lelei pe a autaluina fesili ma tagata taʻitoʻatasi e fia papatiso, ae e lē talanoaina o se vaega o tagata fia papatiso. O le avatuina e le tagata papatiso o se tali i fesili taʻitasi, o le a manino ai toeaina i le loloto ua oo i ai le malamalama o le tagata, ma iloa ai po ua agavaa o ia mo le papatisoga. O le a sili atu foʻi ona naunau le tagata o loo fia papatiso e faaali atu ona manatu pe a na o i laʻua ma le toeaina. E mafai ona faatalanoa faatasi se tane ma le avā.

Pe afai o se tuafafine lea e fia papatiso, e tatau ona faia le talanoaga i se auala e mafai ai ona iloa atu i laʻua e isi ae e lē lagona atu le talanoaga o loo faia. Pe afai e manaʻomia ona iai se isi tagata e toʻalua ma le tagata o loo fia papatiso, e tatau ona faaaogā se toeaina po o se auauna o le faiva, e fua i le vaega o loo talanoaina e pei ona faamatalaina i le palakalafa o loo sosoo mai.

I faapotopotoga e lē toʻatele ni toeaina, e ono mafai ona autalu e auauna o le faiva agavaa e iai le faautaga loloto ma le tagata e fia papatiso fesili mo le papatisoga i le “Vaega 1−Talitonuga Faa-Kerisiano.” E na o toeaina lava e tatau ona talanoaina faatasi ma le tagata o loo fia papatiso le “Vaega 2−Olaga Faa-Kerisiano.” Pe afai e lē toʻatele ni uso agavaa i se faapotopotoga, e ono faafesootaʻi le ovasia o le matagaluega ina ia iloa ai pe e iai se faapotopotoga lata ane e ono mafai ona fesoasoani ifo.

Pe afai o le tagata e fia papatiso o se tasi o le fanau laiti, e tatau ona iai i le iloiloga o fesili ona mātua (lona matua) talitonu. Pe afai e lē auai se matua po o mātua, e tatau la ona auai ni toeaina se toʻalua (po o se toeaina ma se auauna o le faiva e fua i le vaega o loo iloilo) i le iloiloina o vaega taʻitasi.

E faamautinoa e toeaina, o le tagata lea o le a papatiso ua lava sona malamalamaga i aʻoaʻoga faavae o le Tusi Paia. E latou te mananaʻo foʻi e faamautinoa na te talisapaia moni le upu moni, ma faaalia le faaaloalo talafeagai mo le faalapotopotoga a Ieova. Pe afai e lē malamalama le tagata i aʻoaʻoga faavae o le Tusi Paia, o le a faatulaga e toeaina se fesoasoani mo ia ina ia agavaa ai mo le papatisoga i se taimi mulimuli ane. Atonu e manaʻomia ona tuu atu i isi tagata o loo fia papatiso se taimi, e faaalia ai lo latou matuā talisapaia o le talaʻiga, po o le gauaʻi atu foʻi i faatulagaga a le faalapotopotoga. E tatau i toeaina ona faaaogā le faautaga loloto e fuafua ai pe e itula pe e sili atu e tatau ona faaalu mo vaega taʻitasi, ina ia faamautinoa ai po ua agavaa le tagata mo le papatisoga. E ui lava atonu e tele atu le taimi e faaalu i isi fesili nai lo o isi fesili, ae e tatau pea ona autaluina fesili uma.

O le a feiloaʻi toeaina ua filifilia e talanoaina nei fesili ma le tagata o loo fia papatiso, pe a māeʻa le vaega lona lua, ma filifili ai po ua agavaa le tagata mo le papatisoga pe leai. E iloilo e toeaina talaaga, tomai, ma isi tulaga o tagata taʻitoʻatasi. O le mea tāua ia faamautinoa ua liliu atu le tagata iā Ieova, ma ua malamalama i aʻoaʻoga faavae o le Tusi Paia. O la outou lagolagosua, o le a fesoasoani iā i latou o loo fia papatiso e lava tapena ai e faataunuu lo latou tofiga tāua, o le avea o ni faifeʻau o le tala lelei.

Mulimuli ane, e toʻatasi po o toeaina uma sa tofia e tatau ona feiloaʻi ma le tagata o loo fia papatiso, ma taʻu i ai po ua agavaa o ia mo le papatisoga pe leai. Pe afai ua agavaa le tagata, e tatau i toeaina ona autalu ma ia le vaega ua taʻua “Talanoaga Faaiʻu ma Tagata o le a Papatiso,” o loo maua i itulau e 206-207. Pe afai e leʻi māeʻa ona suʻesuʻeina e le tagata o loo fia papatiso le tusi Se Olaga Fiafia e Faavavau!, e tatau i toeaina ona faalaeiauina o ia e faia faapea pe a uma lona papatisoga. Faailoa i le tagata o le aso o lona papatisoga o le a faaopoopo i Faamaumauga mo le Tagata Talaʻi a le Faapotopotoga e faaaogā ai lona igoa. Faamanatu iai e manaʻomia e toeaina faamatalaga e faatatau iā te ia ina ia mafai ai e le faalapotopotoga ona vaavaaia lelei galuega faale tapuaʻiga a Molimau a Ieova i le lalolagi aoao ma mafai ai e le tagata talaʻi ona faia se sao i galuega faaleagaga, ma ia mauaina le lagolagosua faaleagaga. E faamanatu atu foʻi e toeaina i le tagata talaʻi fou, o soo se faamatalaga lava e faatatau iā te ia, e taulima e tusa ai ma aiāiga faaletulafono i le Global Data Protection Policy of Jehovah’s Witnesses i le jw.org. E masani lava e na o le sefulu minute pe itiiti ifo foʻi le umi e faia ai lenei talanoaga.

Pe a māeʻa le tausaga talu ona papatiso le tagata talaʻi, e tatau ona ia feiloaʻi ma ni toeaina se toʻalua ina ia la avatu iā te ia ni faalaeiauga ma fautuaga aogā. O se tasi o nei toeaina o le ovasia o le vaega mo le talaʻiga o loo iai lea tagata. Pe afai o lea tagata o se tasi o le fanau laiti, e tatau ona iai ona mātua (lona matua) talitonu. E tatau ona faia le talanoaga i se auala māfana ma faalaeiauina ai le tagata. O le a iloiloina e toeaina le agaʻigaʻi i luma faaleagaga o lea tagata. E latou te avatu foʻi fautuaga aogā i le auala e faaauau ai pea lana masaniga lelei o le faia o ana lava suʻesuʻega, faitauina i aso taʻitasi o le Tusi Paia, faia o le tapuaʻiga a le aiga i vaiaso taʻitasi, auai e lē aunoa i sauniga ma faia ai se sao, faapea le galuega talaʻi i vaiaso taʻitasi. (Efe. 5:15, 16) Pe afai e leʻi māeʻa ona ia suʻesuʻeina le tusi Se Olaga Fiafia e Faavavau!, e tatau i toeaina ona faia ni fuafuaga mo se tasi e fesoasoani iā te ia ina ia faia ai faapea. E tatau i toeaina ona avatu le faamālō i le tele o taimi. E masani lava, e lava se fautuaga po o se manatu se tasi pe lua.