Ia Amanaʻia le Matafaioi a Keriso i le Faatulagaga a le Atua

“NA FOAFOAINA e le Atua le lagi ma le lalolagi i le amataga,” ma o mea uma na ia faia sa “matuā lelei lava.” (Kene. 1:1, 31) Na ia foafoaina le tagata ma ni faamoemoe matagofie mo le lumanaʻi. Peitaʻi o le fouvalega i Etena, ua taofia ai i se taimi lē tumau le tulaga fiafia o le fanau a tagata. E ui i lea, e lē o suia ai le finagalo o Ieova mo le lalolagi faapea ma tagata. Ua faailoa mai e le Atua o le a iai se laveaʻiga mo le fanau usiusitaʻi a Atamu. O le a toe faafoʻisia le tapuaʻiga moni, ma o le a faaumatia e le Atua lē o loo leaga ma ana galuega leaga uma. (Kene. 3:15) O le a “matuā lelei lava” le tulaga o mea e pei ona sa iai i le amataga. O le a faataunuuina e Ieova nei mea e ala i lona Alo, o Iesu Keriso. (1 Ioa. 3:8) O lea, e tatau ona tatou amanaʻia le matafaioi a Keriso i le faatulagaga a le Atua.​—Galu. 4:12; Fili. 2:9, 11.

LE MATAFAIOI A KERISO

² Pe a tatou manatunatu i le matafaioi a Keriso i le faatulagaga a le Atua, e tatou te amanaʻia ai e eseese vala o lana matafaioi. O loo auauna Iesu o Lē e togiolaina le fanau a tagata, o le Ositaulaga Sili, o le Ulu o le faapotopotoga Kerisiano, ma i le taimi lenei o le Tupu o le Malo o le Atua. O le manatunatu loloto i nei matafaioi, e atili faateleina ai lo tatou talisapaia o faatulagaga a le Atua, ma faalolotoina ai lo tatou alofa mo Keriso Iesu. O loo faamatalaina mai i le Tusi Paia nisi o matafaioi eseese a Iesu.

³ A o faagasolo le faiva a Keriso i le lalolagi, na manino mai ai o le a maua e tagata usiusitaʻi se leleiga ma le Atua e ala iā te ia. (Ioa. 14:6) I le avea ai ma Lē e togiolaina tagata, na foaʻi atu ai e Iesu o ia lava o se togiola e sui aʻi tagata e toʻatele. (Mata. 20:28) E tele atu la mea na faia e Iesu, nai lo o le tau ina avea ma faaaʻoaʻoga o amioga e finagalo i ai le Atua. Ua faaautū iā te ia le galueaʻiina ma le faataunuuina o le finagalo o Ieova mo le fanau a tagata. O Iesu foʻi e na o le pau lea o le auala e mafai ai ona tatou maua se leleiga ma le Atua. (Galu. 5:31; 2 Kori. 5:18, 19) O le maliu faataulaga o Iesu ma lona toetū, ua tatala ai le avanoa mo tagata usiusitaʻi e maua faamanuiaga e faavavau, i lalo o le pulega a le Malo o le Atua i le lagi.

⁴ I le avea ai o Iesu ma Ositaulaga Sili, ua mafai ona ia “tigā alofa faatasi ma i tatou i o tatou vaivaiga,” ma fai ma togisala mo agasala a ona soo tuuina atu o loo i le lalolagi. Na taʻua e Paulo: “Auā o lo tatou ositaulaga sili, o lē e mafai ona tigā alofa faatasi ma i tatou i o tatou vaivaiga, ma sa tofotofoina o ia i mea uma lava e pei o i tatou, a ua leai se agasala ua iā te ia.” Ona faalaeiauina lea e Paulo o ē e faaalia le faatuatua iā Iesu Keriso, e faaaogā atoatoa lenei faatulagaga ina ia maua ai se leleiga ma le Atua, e ala i lona faapea atu: “O le mea lea, seʻi o tatou faalatalata atu ma le saʻolotoga e tautatala atu ai i le nofoālii o le agalelei faifua, ina ia tatou maua ai le alofa mutimutivale ma le agalelei faifua o le Atua e fesoasoani mai i le taimi e tatau ai.”​—Epe. 4:14-16; 1 Ioa. 2:2.

⁵ O Iesu foʻi o le Ulu o le faapotopotoga Kerisiano. E pei o ona soo i le uluaʻi senituri, e faapena foʻi ona tatou lē manaʻomia se tagata e fai ma o tatou taʻitaʻi i aso nei. O loo saunia mai e Iesu le taʻitaʻiga e ala mai i le agaga paia ma leoleo mamoe fesoasoani agavaa, o ē e tali atu iā te ia ma lona Tamā i le auala e latou te tausia ai le lafu a le Atua. (Epe. 13:17; 1 Pete. 5:2, 3) Na fetalai faavaloaga Ieova e faatatau iā Iesu e faapea: “Faauta! Ua ou avatu o ia e fai ma molimau i nuu, e fai foʻi ma taʻitaʻi ma taʻitaʻiʻau i nuu.” (Isa. 55:4) Na faamautinoa e Iesu le faataunuuina o lenei valoaga ina ua ia fetalai atu i ona soo: “Aua foʻi neʻi taʻua outou o ʻtaʻitaʻi,’ auā e toʻatasi lo outou Taʻitaʻi o le Keriso lea.”​—Mata. 23:10.

⁶ Ina ia faaalia lona finagalo ma lona lotomalie e fesoasoani iā i tatou, ua faasafua mai ai e Iesu lana valaaulia: “Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou. Auā e avegofie laʻu amo, ma e māmā foʻi laʻu avega.” (Mata. 11:28-30) O le faatonutonuina e Iesu o mataupu i totonu o le faapotopotoga Kerisiano i se auala agamalu ma faafouina ai i tatou, ua ia faamaonia ai le avea o ia “o le leoleo mamoe lelei” o loo faataʻitaʻi i lona Tamā i le lagi o Ieova le Atua.​—Ioa. 10:11; Isa. 40:11.

⁷ I lana uluaʻi tusi i Kerisiano i Korinito, na faamatala atu ai e Paulo se isi vala o le matafaioi a Iesu Keriso e faapea: “E tatau ona pule o ia o se tupu seʻia tuuina e le Atua fili uma i lalo o ona vae. Ae peitaʻi, pe a tuuina i lalo o mea uma iā te ia, ona tuuina i lalo foʻi lea e le Alo o ia lava i Lē na tuuina i lalo o mea uma iā te ia, ina ia pule aoao le Atua i le aoao o mea.” (1 Kori. 15:25, 28) A o leʻi afio mai Iesu i le lalolagi, na avea o ia ma “tufuga poto” a le Atua, o le ulumatua o foafoaga uma. (Faata. 8:22-31) Ina ua auina mai o ia e le Atua i le lalolagi, na ia faia Lona finagalo i taimi uma. Na ia onosaia le tofotofoga aupito sili e mafai ona oo i se tagata, o le fasiotia lea. Na maliu o ia a o faamaoni pea i lona Tamā. (Ioa. 4:34; 15:10) Ona o le faamaoni pea o lona Alo seʻia oo i le oti, na faatūina ai e le Atua o ia i le lagi ma tuuina atu iā te ia le aiā e avea ai ma Tupu o le Malo i le lagi. (Galu. 2:32-36) O lenā faaeaga ua ia maua ai se tofiga mataʻina mai i le Atua, e taʻitaʻia ai le mano ni mano o foafoaga agaga malolosi, i le aveesea o pulega a tagata ma tafiesea atoatoa le amioleaga mai lo tatou lalolagi. (Faata. 2:21, 22; 2 Tesa. 1:6-9; Faaa. 19:11-21; 20:1-3) Pe a māeʻa lenā, e na o le Malo o le Atua i le lagi o le a pulea le lalolagi aoao i lalo o le taʻitaʻiga a Keriso.​—Faaa. 11:15.

LE UIGA O LE AMANAʻIAINA O LE MATAFAIOI A IESU

⁸ O Iesu Keriso e lelei atoatoa, ma o ia o lo tatou Faaaʻoaʻo. Ua tofia o ia e tausia i tatou. Ina ia tatou maua aogā mai i le tausiga alofa ma le leoleoga malu a Iesu, e tatau ona tatou tutumau ma le faamaoni iā Ieova, ma piiama atu pea i lana faalapotopotoga o loo agaʻigaʻi i luma.

⁹ Na amanaʻia atoatoa e soo o Iesu i le uluaʻi senituri le matafaioi a Keriso i le faatulagaga a le Atua. Na latou faia lenei mea e ala i le galulue faatasi ma le autasi, i lalo o le taʻitaʻiga a lo latou ulu o Keriso. Na latou gauaʻi foʻi i lana taʻitaʻiga, lea e ala mai i le agaga paia. (Galu. 15:12-21) Na taʻua e Paulo le tulaga autasi na iai le faapotopotoga o Kerisiano faauuina, ina ua ia tusi: “Ia tautatala i le mea moni, ma ia tatou tutupu aʻe i le alofa iā te ia i mea uma, o le ulu lava ia, o Keriso lea. O ia ua fesootaʻi lelei ai le tino atoa, ma ua faia ina ia felagolagomaʻi sooga uma, ina ia maua ai le mea e manaʻomia e tusa ma galuega talafeagai a itutino taʻitasi, ua faia ina ia tupu aʻe ai le tino, ma atiina aʻe ai o ia lava i le alofa.”​—Efe. 4:15, 16.

¹⁰ Pe a felagolagomaʻi sui taʻitasi o le faapotopotoga, ma galulue ma le lotogatasi i lalo o le taʻitaʻiga a lo latou ulu o Keriso, o le a tuputupu aʻe ma māfana le alofa, auā “o le fusi lea e atoatoa ona autasi ai.”​—Ioa. 10:16; Kolo. 3:14; 1 Kori. 12:14-26.

¹¹ O mea ua tutupu i le lalolagi lea ua faataunuuina ai valoaga o le Tusi Paia, ua matuā faamaonia ai le tuuina atu iā Iesu Keriso o le pule i le Malo talu mai le 1914. Ua pule nei o ia i totonu o ona fili. (Sala. 2:1-12; 110:1, 2) O le ā le uiga o lenei mea mo ē o loo ola i le lalolagi i aso nei? Ua toe o se aga ona gaoioi lea o Iesu i lana matafaioi o le Tupu o tupu ma le Alii o alii, e faaoo mai le faasalaga a le Atua i ona fili. (Faaa. 11:15; 12:10; 19:16) Pe a māeʻa lenā, ona faataunuuina loa lea o le folafolaga a Ieova i se laveaʻiga mo i latou o loo i le itu taumatau e finagalo malie i ai Keriso, e pei ona sa faalauiloa mai e Ieova i le amataga ina ua fouvale le tagata. (Mata. 25:34) Maʻeu lo tatou fiafia i le amanaʻiaina o le matafaioi a Keriso i le faatulagaga a le Atua! Tau ina ia tatou autasi pea i le faataunuuina o le faiva i le lalolagi aoao, i lalo o le taʻitaʻiga a Keriso a o faagasolo nei aso e gata ai.