Ia Maua Aogā i le Gauaʻi i le Faatulagaga a le Atua mo le Tulaga Ulu

O LE gauaʻi i le Atua, o le Pule Silisili Ese i le aoao o mea, e matuā tāua ina ia faamaopoopoina ai i tatou e faia le finagalo o Ieova. E tatou te amanaʻia le tulaga ulu o lona Alo i le faapotopotoga Kerisiano, ma mulimuli foʻi i le mataupu silisili o le tulaga ulu i isi vala o le soifuaga. O le gauaʻi i le faatulagaga a le Atua i le tulaga ulu, o le a maua ai e tagata uma o loo aofia ai aogā.

² O le gauaʻi atu i le tulaga pule ua faatulagaina, na muaʻi faailoa mai i tagata i le faatoʻaga o Etena. O lenei faatulagaga o loo faailoa mai i poloaʻiga a le Atua i le Kenese 1:28 ma le 2:16, 17. Sa tatau ona usitaʻi atu manu i tagata, ae sa tatau ona gauaʻi atu Atamu ma Eva i le finagalo ma le pule a le Atua. O le usiusitaʻi i le pule a le Atua, e iʻu atu ai i le filemu ma le sologa lelei o mea. Na toe faamatilatila mulimuli mai lenei mataupu silisili o le tulaga ulu i le 1 Korinito 11:3. Na tusi le aposetolo o Paulo: “Ou te manaʻo ina ia outou iloa, o le ulu o tane taʻitoʻatasi uma o Keriso; o le ulu o le fafine o le tane; a o le ulu o Keriso o le Atua.” Ua faaalia mai i lenei faatulagaga mo le tulaga ulu, e lē manaʻomia ona gauaʻi atu Ieova i se isi, ae e tatau i foafoaga uma lava ona gauaʻi atu i ē ua fai ma o latou ulu i lenei faatulagaga.

³ O le toʻatele o tagata i aso nei, ua lē amanaʻia pe usitaʻia le mataupu silisili o le tulaga ulu. Aiseā? Na amata mai le faafitauli i Etena ina ua filifili ma le loto i ai mātua o tagata uma, e vavae ese i laʻua lava mai i le gauaʻi atu i le tulaga ulu silisili ese o le Atua. (Kene. 3:4, 5) Peitaʻi, e la te leʻi maua ai se saʻolotoga e sili atu. Nai lo o lea, na la nofo toʻilalo ai i le pule a se foafoaga agaga leaga, o Satani le Tiapolo. O le uluaʻi fouvalega, na vavaeesea ai le fanau a tagata mai i le Atua. (Kolo. 1:21) O le iʻuga, e toetoe o tagata uma i aso nei o loo tumau pea ona nofo toʻilalo i le pule a lē o loo leaga.​—1 Ioa. 5:19.

⁴ E ala i le aʻoaʻoina ma gaoioi e tusa ai ma le upu moni o le Afioga a le Atua, ua tatou ō ese mai ai i taaʻiga a Satani. I le avea ai ma Molimau tuuina atu ma papatisoina, ua tatou talia Ieova o lo tatou Pule Silisili Ese i o tatou olaga. E tatou te ioe faatasi ma le tupu o Tavita o lē na amanaʻia Ieova o ia o lē “e silisili i mea uma lava.” (1 No. 29:11) E tatou te taʻutino atu ma le lotomaulalo e faapea: “Ia iloa o Ieova o le Atua ia. O ia na faia i tatou, ae e lē o i tatou lava. O i tatou o lona nuu ma le lafu mamoe ua ia fafagaina.” (Sala. 100:3) E tatou te amanaʻia e silisili ese Ieova ma ua alagatatau ona tatou gauaʻi atoatoa atu iā te ia, auā o ia na foafoaina mea uma lava. (Faaa. 4:11) I le avea ai o i tatou o ni faifeʻau a le Atua moni, e tatou te mulimuli iā Iesu Keriso o lē na saunia mai le faaaʻoaʻoga lelei atoatoa, o le gauaʻi atu i le Atua.

⁵ O le ā na aʻoaʻoina e Iesu mai i mea na puapuagatia ai a o iai i le lalolagi? Ua faapea mai le Eperu 5:8: “E ui lava o ia o le Alo, ae na ia aʻoaʻoina le usiusitaʻi mai i mea na puapuaga ai o ia.” O le mea moni sa tumau ma le faamaoni Iesu i lona Tamā i le lagi, e ui lava sa ia fesagaʻia faigatā. E na te leʻi faia lava se mea i lona lava loto. E leʻi tautala atu foʻi e tusa ma ona manatu, pe saʻili sona lava viiga. (Ioa. 5:19, 30; 6:38; 7:16-18) A o faagasolo lana faiva, na ia maua le fiafia i le faia o le finagalo o lona Tamā, e ui lava sa ia fesagaʻia ai teteega ma sauāga. (Ioa. 15:20) E ui i nei tulaga, sa gauaʻi pea Iesu i le Atua. Sa “faamaulalo” e Iesu o ia lava, seʻia oo lava i lona ʻoti i le laau na faapuapuagatia ai.’ E tele auala sa tauia ai lona gauaʻi atoatoa iā Ieova, ma na iʻu atu ai i le faaolataga e faavavau mo le fanau a tagata, faaeaina o ia, ma le faamamaluina ai o lona Tamā.​—Fili. 2:5-11; Epe. 5:9.

VALA ESEESE O LE GAUAʻI I LE FAATULAGAGA A LE ATUA MO LE TULAGA ULU

⁶ Pe a tatou gauaʻi i le Atua e ala i le faia o lona finagalo, e tatou te sao mai ai i le tele o popolega ma lagona tigā, lea e feagai ma i latou e mumusu e gauaʻi atu i le pule silisili ese a Ieova. O loo saʻilia pea i tatou e lo tatou fili o Satani, ina ia ʻaina i tatou. O le a laveaʻia i tatou mai i lē o loo leaga, pe a tatou tetee atu iā te ia ma faamaulalo i tatou i luma o Ieova, e ala i le lotomalilie e gauaʻi atu.​—Mata. 6:10, 13; 1 Pete. 5:6-9.

⁷ I le faapotopotoga Kerisiano, e tatou te amanaʻia le tulaga ulu o Keriso faapea le pule ua ia tuuina atu i “le pologa faamaoni ma le faautauta.” O le faia faapea, e aafia ai o tatou uiga faaalia ma le auala e tatou te feutagaʻi ai ma isi. O le gauaʻi atu i faatulagaga a le Atua i le faapotopotoga, e uunaʻia ai i tatou e usiusitaʻi i le Afioga a le Atua i vala uma o la tatou tapuaʻiga. E aofia ai i lenei usiusitaʻi la tatou faiva, le auai i sauniga ma faia ai se sao, le va feagai ai ma toeaina, ma le lagolagosua i faatulagaga a le faalapotopotoga.​—Mata. 24:45-47; 28:19, 20; Epe. 10:24, 25; 13:7, 17.

⁸ O le gauaʻi i le Atua e saosaolaumea i lo tatou mauaina o le filemu ma le saogalemu, faapea le maopoopo lelei o le faapotopotoga Kerisiano. O loo faaatagia e auauna a Ieova o loo faia lona finagalo ona uiga. (1 Kori. 14:33, 40) Ona o mea ua tatou tofo i ai i le faalapotopotoga a Ieova, ua talitutusa ai o tatou faalogona ma faalogona o le tupu o Tavita. Ina ua ia mātauina le eseesega o auauna a Ieova ma tagata amioleaga, na ia faapea atu ma le fiafia: ʻE fiafia le nuu e fai Ieova ma o latou Atua!’​—Sala. 144:15.

⁹ I le faatulagaga o le faaipoipoga ma totonu o le aiga, “o le ulu o le fafine o le tane.” I le taimi e tasi e gauaʻi atu tane iā Keriso, ae o le ulu o Keriso o le Atua. (1 Kori. 11:3) E tatau i avā ona gauaʻi atu i a latou tane, ae gauaʻi atu le fanau i o latou mātua. (Efe. 5:22-24; 6:1) Pe a mulimuli sui taʻitoʻatasi o le aiga i le mataupu silisili o le tulaga ulu, o le a iʻu ai i le filemu.

¹⁰ E tatau i le tane ona faatino lona tulaga ulu i se auala alofa, i le faataʻitaʻi atu iā Keriso. (Efe. 5:25-29) Pe afai e na te lē faaaogāsesē pe lafoaʻia lona tulaga ulu, o le a fiafia lana avā ma lana fanau e gauaʻi atu iā te ia. O le matafaioi a le avā o le avea lea o se fesoasoani i le tane, po o sē e talafeagai lelei ma ia. (Kene. 2:18) O lona onosaʻi i le lagolagoina ma faaalia le faaaloalo i lana tane, e lē gata o le a alofagia ai o ia e lana tane ae o le a viia ai foʻi le Atua. (1 Pete. 3:1-4) Pe a mulimuli tane ma avā i le fautuaga a le Tusi Paia e faatatau i le tulaga ulu, ua latou faataatia se faaaʻoaʻoga mo le fanau i le faaalia o le gauaʻi i le Atua.

¹¹ O le gauaʻi i le Atua e aafia ai foʻi le auala e tatou te manatu ai “i faipule silisili,” lea “ua faatagaina e le Atua e pule i o latou tulaga eseese.” (Roma 13:1-7) Ona o Kerisiano o ni tagatānuu e usiusitaʻi i tulafono, e latou te totogiina ai lafoga lea e ʻtotogi atu ai mea a Kaisara iā Kaisara, a o mea a le Atua ia avatu i le Atua.’ (Mata. 22:21) E faaopoopo atu i lenā, o faatulagaga mo le galueaʻiina o le oganuu i le talaʻiga, e ōgatusa ma tulafono e faatapulaa ai le faaaogāina o faamatalaga e faatatau i se tasi. O le gauaʻi atu ma usiusitaʻi i mea uma i pulega ua faatulaga mai, e lē feteenaʻi ma tulafono amiotonu a Ieova, ua mafai ai ona taulaʻi atu a tatou taumafaiga ma lo tatou malosi i le galuega talaʻi.​—Mare. 13:10; Galu. 5:29.

¹² O le gauaʻi atu i le Atua ma lana faatulagaga mo le tulaga ulu, e aafia ai vala uma o le olaga. Ona o le faatuatua, o le a tatou vāai ai i le taimi o le a gauaʻi atu ai le fanau uma a tagata iā Ieova le Atua. (1 Kori. 15:27, 28) E mautinoa o ē e talia ma le fiafia le pule silisili ese a Ieova, ma faaauau ona gauaʻi atu iā te ia e oo i le faavavau, o le a faamanuiaina i latou e Ieova ma maua lona finagalo malie.