LESONA 28
Ia Faaalia le Talisapaia o Mea ua Faia e Ieova ma Iesu mo Oe
O ā ou faalogona pe a avatu e sau uō se meaalofa matagofie iā te oe? E mautinoa lou fiafia ma faailoa atu i lau uō lou talisapaia o lenā meaalofa. Na saunia e Ieova ma Iesu se meaalofa silisili mo i tatou. O le ā lenā meaalofa, ma e faapefea ona faailoa atu lo tatou talisapaia?
1. O le ā se auala e faaalia ai lo tatou talisapaia o mea ua faia e le Atua ma Keriso mo i tatou?
Ua folafola mai i le Tusi Paia o le a maua e “tagata uma e faatuatua iā [Iesu],” le ola e faavavau. (Ioane 3:16) O le ā e uiga i ai le faaalia o le faatuatua? E tele mea e aofia ai nai lo le tau ina talitonu iā Iesu. E faaalia foʻi lo tatou faatuatua e ala i filifiliga ma gaoioiga e tatou te faia. (Iakopo 2:17) Pe a tatou faaalia le faatuatua e ala i upu ma gaoioiga, o le a faamalosia ai la tatou faiā ma Iesu ma lona Tamā o Ieova.—Faitau le Ioane 14:21.
2. O le ā le sauniga faapitoa e faaalia ai lo tatou talisapaia o mea na faia e Ieova ma Iesu?
I le afiafi a o leʻi maliu Iesu, na ia taʻu atu i ona soo le auala e latou te faaalia ai le talisapaia o lana taulaga togiola. Na ia faavae se faamanatuga faapitoa lea e taʻua i le Tusi Paia o “le Talisuaga Afiafi a le Alii,” po o le Faamanatuga o le maliu o Keriso. (1 Korinito 11:20) Na faatulaga e Iesu lenei faamanatuga ina ia manatua ai e ona aposetolo ma Kerisiano moni uma lava, na ia ofoina mai lona ola mo i tatou. Na poloaʻi mai Iesu: “Ia faia pea lenei mea e fai ma faamanatuga iā te aʻu.” (Luka 22:19) Pe a e auai i le Faamanatuga, e faaalia ai lou matuā talisapaia o le alofa tele o Ieova ma Iesu mo i tatou.
SAʻILIʻILI ATILI
Iloilo nisi auala e faaalia ai le talisapaia o le alofa na faaalia e Ieova ma Iesu, ma le tāua o le Faamanatuga o le maliu o Keriso.
3. O le lototalisapaia e uunaʻia ai i tatou e gaoioi
Seʻi faapea ua e malemo ae ua faasaoina e se tasi lou ola. Pe o le a galo iā oe le gaoioiga na faia e lenā tagata? Pe o le a e saʻili ni auala e faailoa atu ai lou talisapaia o le gaoioiga na ia faia?
O loo tatou nofo aitalafu iā Ieova. Faitau le 1 Ioane 4:8-10, ona talanoa lea i fesili nei:
Aiseā na avea ai le taulaga togiola a Iesu o se meaalofa faapitoa?
O ā ni ou faalogona i mea na faia e Ieova ma Iesu mo oe?
E faapefea ona tatou faaalia le talisapaia o le gaoioiga na faia e Ieova ma Iesu mo i tatou? Faitau le 2 Korinito 5:15 ma le 1 Ioane 4:11; 5:3. Talanoa i le fesili lenei pe a uma ona faitau mau taʻitasi:
E tusa ai o le mau, o le ā e tatou te faia e faailoa atu ai lo tatou lotofaafetai?
4. Faaaʻoaʻo iā Iesu
O se isi auala e faaalia ai lo tatou lototalisapaia, o le faaaʻoaʻo lea iā Iesu. Faitau le 1 Peteru 2:21, ona talanoa lea i le fesili lenei:
E faapefea ona e mulimulituʻi i tulaga aao o Iesu?
Na fiafia Iesu i le Afioga a le Atua, talaʻi atu le tala lelei, ma fesoasoani i isi
5. Auai i le Faamanatuga o le maliu o Keriso
Ina ia iloa mea na fai i le uluaʻi Talisuaga Afiafi a le Alii, faitau le Luka 22:14, 19, 20, ona talanoa lea i fesili nei:
O ā mea na fai i le Talisuaga Afiafi a le Alii?
O le ā e faaata mai e le areto ma le uaina?—Tagaʻi i fuaiupu 19 ma le 20.
Na finagalo Iesu e faamanatu pea e ona soo le Talisuaga Afiafi a le Alii i tausaga taʻitasi, e fai ma faamanatuga o le aso na maliu ai. O le māfuaaga lenā e faapotopoto ai Molimau a Ieova i tausaga taʻitasi e faamanatu le maliu o Iesu, i le auala na ia faatonuina mai. Ina ia iloa atili e faatatau i lenei sauniga tāua, faaali le VITIŌ. Pe a māeʻa, ona talanoa lea i le fesili lenei:
O ā mea e faia i le Faamanatuga?
E iai ni mea o loo faaata mai e le areto ma le uaina. O le areto e faaata mai ai le tino lelei atoatoa o Iesu lea na ofo atu o se taulaga mo i tatou. O le uaina e faaata mai ai lona toto
UA FAAPEA MAI NISI: “E na o le pau lava le mea e manaʻomia ona e faia e faasaoina ai oe, o le talitonu iā Iesu.”
E faapefea ona e faaaogā le Ioane 3:16 ma le Iakopo 2:17, e faailoa atu ai e iai isi gaoioiga e manaʻomia?
AOTELEGA
E faailoa atu lo tatou talisapaia o le gaoioiga na faia e Iesu mo i tatou, e ala i le faaalia o le faatuatua iā te ia, ma auai i le Faamanatuga o lona maliu.
Fesili Autalu
O le ā le uiga o le faaalia o le faatuatua iā Iesu?
E faapefea ona e faailoa atu lou talisapaia o le gaoioiga na faia e Ieova ma Iesu mo oe?
Aiseā e tāua ai lou auai i le Faamanatuga o le maliu o Keriso?
MANATU FAAOPOOPO
O le ā e uunaʻia tatou e fai ona o le maliu o Keriso?
Aʻoaʻo atili le uiga o le faatuatua, ma pe faapefea ona tatou faaalia.
“Ia Faaalia Lou Faatuatua i Folafolaga a Ieova” (Le Olomatamata, Oketopa 2016)
I le tala “Ua Lelei Oʻu Faalogona, ma Fiafia Loʻu Olaga,” mātau le auala na faaleleia ai le olaga o se fafine, ina ua malamalama i le aogā o le taulaga togiola a Keriso mo ia.
“E Mafai e le Tusi Paia Ona Suia Olaga” (Le Olomatamata, Aokuso 1, 2011)
Iloilo le māfuaaga e lē toʻatele ai i latou e aai ma inu i le Faamanatuga.