LESONA 17

E Faapeʻī Uiga o Iesu?

Maua le Lomiga Lolomi

A o tatou iloiloina fetalaiga a Iesu ma mea na ia faia a o iai i le lalolagi, e tatou te iloa ai uiga e mafai ona tatou tosina vavalalata atu ai iā te ia, ma lona Tamā o Ieova. O ā nisi o nei uiga? E faapefea ona tatou faaaʻoaʻo iā Iesu i le auala e tatou te ola ai?

1. O ā auala e pei ai Iesu o lona Tamā?

A o iai Iesu i le lagi, na vaavaai atu i lona Tamā alofa, ma aʻoaʻoina mai ai le tele o mea mo le faitau piliona o tausaga. O le iʻuga, o ona mafaufauga, faalogona ma gaoioiga, ua pei lava o lona Tamā. (Faitau le Ioane 5:19.) O le mea moni, sa faaatagia atoatoa mai e Iesu uiga o lona Tamā, ma ia faapea mai: “O lē ua vaai mai iā te aʻu, ua vaai foʻi o ia i le Tamā.” (Ioane 14:9) O lou aʻoaʻoina o uiga o Iesu, o le a mafai ai ona e iloa atili e faatatau iā Ieova. Mo se faataʻitaʻiga, o le alofa mutimutivale o Iesu i tagata, ua faaalia mai ai le alofa mutimutivale o Ieova iā te oe.

2. Na faapefea ona faailoa mai e Iesu e alofa iā Ieova?

Na fetalai Iesu: “Ina ia iloa e le lalolagi ou te alofa i le Tamā, o lea ua ou faia ai mea e pei lava ona poloaʻiina ai aʻu e le Tamā e fai.” (Ioane 14:31) A o iai i le lalolagi, sa faaalia e Iesu le matuā alofa i lona Tamā, e ala i le usiusitaʻi iā te ia e tusa lava pe faigatā ona faia faapea. Sa fiafia foʻi Iesu e talanoa e faatatau i lona Tamā, ma fesoasoani i isi ia atiaʻe se faiā ma Ia.—Ioane 14:23.

3. Na faapefea ona faaalia e Iesu e alofa i tagata?

Ua taʻua i le Tusi Paia, sa “matuā fiafia [Iesu] i le fanau a tagata.” (Faataoto 8:31) Na ia faaalia le alofa e ala i le faalaeiau ma fesoasoani atu ma le lē manatu faapito i tagata. O vavega na ia faia ua faailoa mai ai e lē gata e iā te ia le mana, ae e alofa mutimutivale foʻi. (Mareko 1:40-42) Na ia feutagaʻi ma tagata uma i se auala agalelei ma lē faailoga tagata. O ana fetalaiga na maua ai faalaeiauga, ma avatu ai se faamoemoe i tagata lotofaamaoni uma na naunau e faalogo iā te ia. Na lotomalie Iesu e faileagaina ma maliu ona o le alofa i tagata. Ae na sili atu lona alofa iā i latou o ē na mulimuli i ana aʻoaʻoga.—Faitau le Ioane 15:13, 14.

SAʻILIʻILI ATILI

Aʻoaʻo atili e faatatau i uiga o Iesu, ma iloilo pe faapefea ona tatou faaalia le alofa ma le limafoaʻi e pei ona ia faia.

4. E alofa Iesu i lona Tamā

Ua tatou aʻoaʻoina mai le faaaʻoaʻoga a Iesu le auala e faaalia ai lo tatou alofa i le Atua. Faitau le Luka 6:12 ma le Ioane 15:10; 17:26. Pe a uma ona faitau mau taʻitasi, ona talanoa lea i le fesili lenei:

E faapefea ona tatou faaaʻoaʻo iā Iesu i le faaalia o le alofa mo Ieova?

Jesus praying. — Sa alofa Iesu i lona Tamā i le lagi, ma sa ia talanoa atu iā te ia e lē aunoa i le tatalo

5. Na manatu mamafa Iesu i manaʻoga o tagata

Na faamuamua e Iesu manaʻoga o isi tagata nai lo o ia lava. E ui lava i lona lē lavā, ae na faaaogā lona taimi ma le malosi e fesoasoani ai i tagata. Faitau le Mareko 6:30-44, ona talanoa lea i fesili nei:

E tusa ai o le mau, o ā nisi auala na faaalia ai e Iesu lona manatu mamafa i tagata?—Tagaʻi i fuaiupu 31, 34, 41 ma le 42.
O le ā na uunaʻia Iesu e fesoasoani i tagata?—Tagaʻi i le fuaiupu 34.
Ona sa faaata mai e Iesu uiga o Ieova, o le ā la ua e aʻoaʻoina mai ai e faatatau iā Ieova?
O ā nisi auala e tatou te faaaʻoaʻo ai i le manatu mamafa o Iesu i isi?

O loo fafagaina faavavega e Iesu tagata e toʻatele i falaoa e lima ma iʻa e lua. Na tufatufa atu e ona soo meaʻai i tane, fafine ma tamaiti.

6. Na faaalia e Iesu le limafoaʻi

Sa faaalia e Iesu le limafoaʻi e ui lava e leʻi tele ni ana meafaitino, ma ua ia faalaeiauina foʻi i tatou e faia faapea. Faitau le Galuega 20:35, ona talanoa lea i le fesili lenei:

E tusa ai o le fetalaiga a Iesu, e faapefea ona tatou maua le fiafia?

Faaali le VITIŌ, ona talanoa lea i le fesili lenei:

VITIŌ: “E Sili le Fiafia e Maua i le Foaʻi Atu”—Vaaiga Puupuu (4:00)

O ā nisi auala e tatou te foaʻi atu ai, e tusa pe lē tele ni a tatou meafaitino?

E te silafia?

Ua aʻoaʻo i tatou e le Tusi Paia ina ia tatalo iā Ieova e ala atu i le suafa o Iesu. (Faitau le Ioane 16:23, 24.) O le faia faapea, e faaalia ai e tatou lotofaafetai i le fesoasoani a Iesu iā i tatou, ina ia avea ma uō a Ieova.

UA FAAPEA MAI NISI: “E lē manatu mamafa mai le Atua i o tatou mafatiaga.”

E faapefea ona faamaonia i gaoioiga a Iesu a o iai i le lalolagi, e manatu mamafa mai Ieova iā i tatou?

AOTELEGA

E alofa Iesu iā Ieova, ma e alofa foʻi i tagata. E pei lava Iesu o lona Tamā. O le tele la o lou iloa e faatatau iā Iesu, o le tele foʻi lenā o le a e iloa ai Ieova.