LESONA 34
E Faapefea Ona Faailoa Atu lo Tatou Alofa mo Ieova?
Po ua sili atu lou alofa i le Atua i le taimi lenei, nai lo le taimi na amata ai ona e suʻesuʻeina le Tusi Paia? Pe e te manaʻo e faaauau pea ona faamalosia lau faiā ma ia? Afai o lea, ia manatua o le tele o lou alofa mo Ieova, o le tele foʻi lenā o le a ia faaalia mai ai lona alofa ma tausia oe. E faapefea ona e faailoa atu e te alofa iā te ia?
1. E faapefea ona faailoa atu iā Ieova e tatou te alolofa iā te ia?
E faaalia lo tatou alolofa iā Ieova e ala i le usiusitaʻi iā te ia. (Faitau le 1 Ioane 5:3.) E na te lē faamalosia se tasi e usiusitaʻi atu iā te ia. Nai lo lea, ua ia tuu mai iā i tatou taʻitoʻatasi le avanoa e filifili ai pe usiusitaʻi iā te ia pe leai. Aiseā? E finagalo Ieova ia tatou “usiusitaʻi ma o [tatou] loto.” (Roma 6:17) O lona uiga, e finagalo o ia ina ia e usiusitaʻi ona o lou alofa iā te ia, ae lē ona o se mea e tatau ona e faia. O le a fesoasoani le Vaega 3 ma le 4 o lenei tusi iā te oe, e faailoa atu lou alofa mo Ieova e ala i le faafiafiaina o ia, ae ʻalofia mea e lē fiafia i ai lona finagalo.
2. Aiseā e avea ai o se luʻi le faailoa atu o lo tatou alofa mo Ieova?
“E tele puapuaga o le tagata amiotonu.” (Salamo 34:19) E tatou te tauivi uma ma lo tatou tulaga lē lelei atoatoa. E tatou te ono fesagaʻia foʻi faafitauli tau tamaoaiga, faiga lē tonu ma isi tulaga faigatā. Pe a tatou fesagaʻia faafitauli, e ono faigatā ona tatou faia mea e finagalo i ai Ieova, ma faigofie ai ona uia le ala sesē. Ae pe a e faia mea e finagalo i ai Ieova, e faaalia ai e sili atu lou alofa iā te ia nai lo o se isi lava mea. Ua faamaonia atu ai foʻi lou faamaoni iā te ia. O le iʻuga, o le a ia faamaoni foʻi iā te oe, ma e na te lē tuua lava oe.—Faitau le Salamo 4:3.
SAʻILIʻILI ATILI
Iloilo pe aiseā e tāua ai iā Ieova lou usiusitaʻi, ma o le ā e fesoasoani iā te oe ina ia tumau faamaoni ai iā te ia.
3. O se mataupu e te aafia ai foʻi
O loo taʻua i le tusi o Iopu, na faia e Satani se tuuaʻiga e lē gata na faatatau iā Iopu, ae ua aofia ai ma tagata uma e mananaʻo e auauna iā Ieova. Faitau le Iopu 1:1, 6–2:10, ona talanoa lea i fesili nei:
Pe a fua i le tuuaʻiga a Satani, aiseā na usitaʻi ai Iopu iā Ieova?—Tagaʻi i le Iopu 1:9-11.
O le ā le manatu o Satani i tagata uma, e aofia ai ma oe?—Tagaʻi i le Iopu 2:4.
Faitau le Iopu 27:5e, ona talanoa lea i le fesili lenei:
Na faapefea ona faamaonia e Iopu lona alofa moni iā Ieova?
Na faamaonia atu e Iopu lona alofa iā Ieova e ala i le tumau ma le faamaoni iā te ia
E tatou te faamaonia atu lo tatou alofa iā Ieova, e ala i le tumau ma le faamaoni iā te ia
4. Ia faafiafia le finagalo o Ieova
Faitau le Faataoto 27:11, ona talanoa lea i fesili nei:
O ā faalogona o Ieova pe a e atamai ma usiusitaʻi iā te ia? Aiseā?
5. E mafai ona e faamaoni iā Ieova
O lo tatou alofa mo Ieova e uunaʻia ai i tatou e faailoa atu i isi e faatatau iā te ia. O lo tatou faamaoni e uunaʻia ai i tatou e faia faapea e tusa lava pe e lē faigofie. Faaali le VITIŌ, ona talanoa lea i fesili nei:
Pe e faigatā ona e talanoa atu i isi e faatatau iā Ieova?
I le vitiō, o le ā na fesoasoani iā Grayson e foʻia ai lona fefe?
E faigofie ona tatou faamaoni iā Ieova pe a tatou fiafia i mea e fiafia i ai o ia, ae ʻinoʻino i mea e na te inosia. Faitau le Salamo 97:10, ona talanoa lea i fesili nei:
E tusa ai ma mea ua e aʻoaʻoina, o ā mea e fiafia i ai le finagalo o Ieova? O ā mea e na te inosia?
E faapefea ona e fiafia i le lelei ae ʻinoʻino i le leaga?
6. E tatou te maua aogā pe a usiusitaʻi iā Ieova
O le usiusitaʻi iā Ieova o se mea e sili ona lelei. Faitau le Isaia 48:17, 18, ona talanoa lea i fesili nei:
Pe e te talitonu, e silafia e Ieova le mea sili ona lelei mo i tatou? Aiseā?
Ua faapefea ona e maua aogā i lou suʻesuʻeina o le Tusi Paia, ma le iloaina o le Atua moni o Ieova?
UA FAAPEA MAI NISI: “E lē afāina i le Atua aʻu gaoioiga.”
O le ā se mau e te faaaogāina e faailoa atu ai, e aafia faalogona o Ieova i a tatou gaoioiga?
AOTELEGA
E mafai ona e faailoa atu lou alofa mo Ieova e ala i le usiusitaʻi, ma tumau faamaoni iā te ia e tusa pe e te fesagaʻia luʻi.
Fesili Autalu
O le ā na e aʻoaʻoina mai i le faaaʻoaʻoga a Iopu?
E faapefea ona faamaonia atu e te alofa iā Ieova?
O le ā e fesoasoani iā te oe e tumau faamaoni ai iā Ieova?
MANATU FAAOPOOPO
Iloilo pe faapefea ona e faamaoni iā Ieova, ma le faapotopotoga.
Aʻoaʻo atili e faatatau i le tuuaʻiga a Satani i tagata.
“Na Taofimau Iopu i Lona Faamaoni” (O le ā le Feʻau o loo i le Tusi Paia? vaega 6)
Iloilo le auala e faailoa atu ai e talavou lo latou alolofa iā Ieova.
E faapefea ona tumau faamaoni se talavou i le Atua, e tusa pe feagai ma omiga mai i isi talavou?