Po o Aso Faamanatu Uma e Fiafia i ai le Atua?

E finagalo Ieova ia tatou maua le fiafia i le olaga, ma e finagalo foʻi e faamanatuina mea na tatou fiafia ai. Ae po o aso faamanatu ma aso mālōlō uma lava e fiafia i ai o ia? E faapefea ona faailoa atu lo tatou alofa iā Ieova i lenei mataupu?

1. Aiseā e lē fiafia ai Ieova i le tele o aso faamanatu?

Atonu o le a faateʻia oe i le iloaina, o le tele o aso faamanatu e lē faavae mai i aʻoaʻoga a le Tusi Paia, ae e tupuga mai i faiga faapaupau. O na aso faamanatu e fesootaʻi atu i lotu sesē. E ono fesootaʻi atu foʻi i faiga faaagaga, pe faavae mai foʻi i le talitonuga e ola pea le agaga o le tagata pe a oti. O nisi aso faamanatu e māfua mai i faiga faanuupō, po o talitonuga i le atua o le laki. (Isaia 65:11) Na lapataʻia e Ieova ona tagata tapuaʻi: “Ia outou vavaeese . . . ma aua tou te toe papaʻi atu i se mea e lē mamā.”​—2 Korinito 6:17.a

2. O ā faalogona o Ieova i aso faamanatu e soona faamamaluina ai tagata?

Ua lapataʻia i tatou e Ieova, ina ia aua nei lolo atu i le mailei o le tuu atu o le “faatuatuaga i tagata.” (Faitau le Ieremia 17:5.) O nisi aso faamanatu e faamamaluina ai taʻitaʻi o malo po o fitafita. O nisi tagata e latou te faamanatuina le fuʻa a le atunuu po o le tutoʻatasi. (1 Ioane 5:21) O lo o faamanatu fo’i e isi vaega faaupufai po o isi faalapotopotoga. O ā faalogona o Ieova pe a tatou soona faamamaluina tagata po o faalapotopotoga, aemaise lava i latou e faalauiloaina manatu e feteenaʻi ma Lona finagalo?

3. O ā māfuaaga e lē taliaina ai aso faamanatu?

E taʻusalaina e le Tusi Paia le ʻinu tele, patī lē taupulea, ma tauvaga o inuga ʻava.’ (1 Peteru 4:3) O nisi aso faamanatu e faaalia ai e tagata le amio lē pulea, ma faia ai amioga lē mamā. Ina ia faaauau ona avea ma uō a Ieova, e manaʻomia ona tatou taumamao mai na amioga lē mamā.

SAʻILIʻILI ATILI

4. Teena aso faamanatu e lē faamamaluina ai Ieova

Faitau le Efeso 5:10, ona talanoa lea i fesili nei:

• O le ā e tatau ona tatou faamautinoa, pe a filifili pe auai i se aso faamanatu?

• O ā aso faamanatu e taatele i lou vaipanoa?

• Pe e te manatu e faafiafiaina Ieova i na aso faamanatu?

Mo se faataʻitaʻiga, pe sa e mafaufau po o le ā le silafaga a le Atua i aso fanau? E lē o taʻua i le Tusi Paia se auauna a Ieova na faamanatu sona aso fanau, ae o loo faamauina ai aso fanau o ni tagata se toʻalua e lē auauna iā te Ia. Faitau le Kenese 40:20-22 ma le Mataio 14:6-10, ona talanoa lea i fesili nei:

• O le ā se mea e tutusa ai aso fanau nei e lua?

• Pe a fua i nei tala, o ā faalogona o Ieova i aso fanau?

Ae atonu e te ono taumānatu pea, ʻO le ā la le silafaga a Ieova pe a ou auai i se aso fanau, po o se isi aso faamanatu e lē faale-Tusi Paia?’ Faitau le Esoto 32:1-8, ona , faaali lea o le VITIŌ, ma talanoa i fesili nei:

VITIŌ: Aso Mālōlō ma Aso Faamanatu e Inosia e le Atua (5:07)

• Aiseā e manaʻomia ai ona tatou faamautinoa po o ā mea e talia e Ieova?

• E faapefea ona tatou faia faapea?

E faapefea ona iloa se aso faamanatu e lē fiafia i ai le Atua?

• Pe e faavae mai i aʻoaʻoga a le Tusi Paia? Ina ia iloa, iloilo po o fea na tupuga mai ai.

• Po o soona faamamaluina ai tagata, faalapotopotoga, po o atunuu? E na o Ieova lava e tatou te faamamaluina, ma maufaatuatuaina o ia e na te foʻia faafitauli o lenei lalolagi.

• Pe e feteenaʻi ma tapulaa a le Tusi Paia? E manaʻomia ona tatou tumau i le mamā tau amio.

5. Fesoasoani i isi e faaaloalogia ou talitonuga

VITIŌ: Faamatala Atu ma le Faautauta Ou Talitonuga (2:01)

Faitau le Mataio 7:12, ona talanoa lea i fesili nei:

• Pe a fua i lenei mau, pe e tatau ona e fai atu i ou aiga lē talitonu, e lē mafai ona latou faamanatuina se aso mālōlō?

• E faapefea ona e faamautinoa atu i lou aiga e te alofa ma talisapaia i latou, e ui e te lē auai faatasi ma i latou i lenā aso faamanatu?

6. E finagalo Ieova ia tatou fiafia

E finagalo Ieova ia tatou maua se taimi e fiafia faatasi ai ma o tatou aiga ma uō. Faitau le Failauga 8:15, ona talanoa lea i le fesili lenei:

• E faapefea ona faailoa mai i lenei mau, e finagalo Ieova ia tatou fiafia?

E finagalo Ieova ia fiafia ona tagata ma maua le taimi e olioli faatasi ai. Faaali le VITIŌ, ma mātau le faamaoniga o lenā manatu i a tatou tauaofiaga faavaomalo.

VITIŌ: Faaalia o le Agaga Talimālō i Tauaofiaga Faavaomalo (5:40)

Faitau le Kalatia 6:10, ona talanoa lea i fesili nei:

• Pe e manaʻomia ona tatou faamanatuina aso mālōlō, ina ia ʻfaia ai mea lelei’ i isi?

• O le ā le ituaiga foaʻi e te fiafia ai, o le foaʻi atu ona o se aso faamanatu, po o le foaʻi atu ona o lou lava manaʻo?

• E toʻatele Molimau a Ieova e latou te faia ni faatasiga faapitoa mo a latou fanau i nisi taimi, pe saunia foʻi ni meaalofa mo i latou. Pe afai e iai sau fanau, o ā ni mea e mafai ona e faia mo i latou?

AOTELEGA

E finagalo Ieova ia tatou maua se taimi e fiafia faatasi ai ma aiga ma uō. Ae e finagalo foʻi e tatou te ʻalofia aso faamanatu e lē finagalo malie i ai.

Fesili Autalu

• O ā fesili e mafai ona tatou fesili ifo ai, e iloa ai le silafaga a Ieova i se aso faamanatu?

• E faapefea ona tatou fesoasoani i aiga ma uō, ina ia malamalama i a tatou faaiʻuga e faatatau i aso faamanatu?

• E faapefea ona e iloa e finagalo Ieova ia tatou maua le fiafia?

MANATU FAAOPOOPO

Iloilo nisi o aso mālōlō e lē faamanatuina e Kerisiano.

“Aiseā e Lē Faamanatuina ai e Molimau a Ieova Nisi Aso Faamanatu?” (Mataupu i le jw.org)

Mātau māfuaaga e fā e matou te talitonu ai, e lē fiafia le Atua i le faamanatuina o aso fanau.

“Aiseā e Lē Faamanatuina ai e Molimau a Ieova Aso Fanau?” (Mataupu i le jw.org)

Mātau pe faapefea e le fanau iti e alolofa iā Ieova, ona faafiafiaina o ia i taimi o aso faamanatu.

E Tāua Oe iā Ieova (11:35)

E faitau miliona Kerisiano ua filifili e lē faamanatuina le Kerisimasi. O ā o latou manatu i a latou filifiliga?

“Ua Maua se Mea e Sili Atu” (Le Olomatamata, Tesema 1, 2012)