LESONA 36
Ia Faamaoni i Mea Uma
E tatou te mananaʻo uma i ni uō e faamaoni. E faatalitalia foʻi e Ieova ana uō ia faamaoni. Peitaʻi, e lē faigofie ona maua lenei mea i se lalolagi ua tumu i tagata e lē faamaoni. O ā aogā o le faamaoni i mea uma?
1. O le ā le māfuaaga sili ona tāua e tatau ai ona faamaoni?
Pe a tatou faamaoni i isi, e faailoa atu ai iā Ieova e tatou te alolofa ma faaaloalo iā te ia. Manatua, e silafia e Ieova mea uma e tatou te mafaufau i ai ma faia. (Eperu 4:13) O le a faafiafiaina o ia pe a silasila mai o loo tatou faamaoni. Ua faapea mai lana Afioga: “Auā e inosia e Ieova le tagata taufaaʻoleʻole, ae e mafuta vavalalata atu o Ia i ē ua amio saʻo.”—Faataoto 3:32.
2. O ā nisi auala e tatou te faaalia ai le faamaoni i aso taʻitasi?
E finagalo Ieova ia taʻitasi i tatou ma “tautatala i le mea moni o le tasi i le isi.” (Sakaria 8:16, 17) O le ā lona uiga? Pe a talanoa ma o tatou aiga, tagata e faigaluega faatasi, o tatou uso ma tuafafine Kerisiano, po o tagata maualuluga o le malo, e lē tatau ona tatou pepelo pe taʻu atu ni faamatalaga sesē. O tagata faamaoni, e latou te lē gāoi pe taufaavalea i isi. (Faitau le Faataoto 24:28 ma le Efeso 4:28.) E latou te totogi atu lafoga ma tupe e tatau ona latou totogiina. (Roma 13:5-7) O nei auala, e faaalia ai ua tatou “faia mea uma ma le faamaoni.”—Eperu 13:18.
3. O ā aogā o le faamaoni?
Pe a iai so tatou talaaga faamaoni, o le a talitonuina i tatou e isi. O le a tatou saosaolaumea i le saogalemu ma le māfana o le faapotopotoga, e pei o se aiga alofa. O le a tatou maua ai se lotofuatiaifo mamā. O lo tatou faamaoni foʻi, o le a ʻfaamamaluina ai aʻoaʻoga a le Atua lo tatou Faaola,’ ma tosina mai ai isi i le tapuaʻiga moni.—Tito 2:10.
SAʻILIʻILI ATILI
Mātau pe faapefea i le faamaoni ona aafia ai Ieova ma oe lava, ma pe faapefea ona e faaalia le faamaoni i vala eseese o le olaga.
4. O le faamaoni e faafiafiaina ai Ieova
Faitau le Salamo 44:21 ma le Malaki 3:16, ona talanoa lea i fesili nei:
Aiseā e lē atamai ai le nanā o le mea moni?
O ā faalogona o Ieova pe a tatou filifili e taʻu le mea moni, e tusa pe e faigatā?
Pe a taʻu atu e le fanau le mea moni, o le a fiafia o latou mātua. Pe a tatou taʻu atu le mea moni, o le a faafiafiaina ai Ieova
5. Ia faamaoni i taimi uma
E manatu le toʻatele o tagata e lē o taimi uma e aogā ai le faamaoni. Peitaʻi, mātau pe aiseā e tatau ai ona tatou faamaoni i taimi uma. Faaali le VITIŌ.
Faitau le Eperu 13:18, ma talanoa pe faapefea ona faaalia le faamaoni . . .
i o tatou aiga.
i galuega po o le aʻoga.
i isi tulaga.
6. Tatou te maua aogā pe a faaalia le faamaoni
O le faaalia o le faamaoni e iʻu atu ai i nisi faafitauli. Ae a o faagasolo taimi, o le a tatou maua ai aogā. Faitau le Salamo 34:12-16, ona talanoa lea i le fesili lenei:
E faapefea ona faaleleia lou olaga pe a faaalia le faamaoni?
A. Pe a faamaoni le tane ma le avā, o le a faamalosia le la faaipoipoga
E. O tagata faigaluega faamaoni, e maufaatuatuaina e le pule
I. O tagatānuu faamaoni, e latou te maua se talaaga lelei i le vaaiga a tagata maualuluga o le malo
UA FAAPEA MAI NISI: “E lē afāina pepelo lāiti.”
Aiseā e te talitonu ai e inosia e Ieova pepelo uma?
AOTELEGA
E finagalo Ieova e faaalia e ana uō le faamaoni i a latou faamatalaga ma gaoioiga uma.
Fesili Autalu
O ā nisi auala e faaalia ai le faamaoni?
Aiseā e lē atamai ai le nanā o le mea moni?
Aiseā e te manaʻo ai e faamaoni i taimi uma?
MANATU FAAOPOOPO
E faapefea ona aʻoaʻo e mātua a latou fanau ina ia faaalia le faamaoni?
O ā aogā e maua pe a tausisi i a tatou folafolaga?
Pe e tatau ona tatou totogi atu lafoga, tusa lava pe lē o faaaogāina tatau?
“Lafoga—Pe e Tatau Ona Tatou Totogiina?” (Le Olomatamata, Setema 1, 2011)
O le ā na uunaʻia ai se tamāloa lē faamaoni e suia lona olaga ma faaalia le faamaoni?
“Ua Ou Iloa e Alofa Mutimutivale ma Lotofaamagalo Ieova” (Le Olomatamata, Me 1, 2015)