Talisapaia le Meaalofa o le Ola

E tele mea mananaia e mafai ona tatou maua ai le fiafia i le olaga. E tusa pe tatou te fesagaʻia faafitauli, ae e mafai lava ona maua le fiafia i isi vala o le olaga. E faapefea ona faailoa atu lo tatou talisapaia o le meaalofa o le ola? O le ā le māfuaaga sili ona tāua e tatou te faia ai faapea?

1. Aiseā e tatau ai ona tatou talisapaia le ola?

E tatau ona tatou talisapaia le ola, ona o se meaalofa mai i lo tatou Tamā alofa o Ieova. O ia o le “puna o le ola,” ma na ia foafoaina meafaiola uma. (Salamo 36:9) “O ia lava ua foaʻi maia i tagata uma le ola, ma le mānava, ma mea uma lava.” (Galuega 17:25, 28) E foaʻi mai e Ieova mea tatou te manaʻomia ina ia faatumauina ai le ola. Ae sili atu i lenā, ua ia faamautinoa foʻi ua tatou maua le olioli i mea ua ia foaʻi mai.​—Faitau le Galuega 14:17.

2. E faapefea ona faailoa atu iā Ieova, e tatou te talisapaia le meaalofa o le ola?

Na tausia oe e Ieova mai lava i le taimi na e iai i le manava o lou tinā. Na faagaeeina Tavita e tatalo atu i le Atua ma faapea atu: “Na silasila mai lava ou fofoga a o afuafua aʻu.” (Salamo 139:16) E tāua iā Ieova lou ola. (Faitau le Mataio 10:29-31.) E matuā tigā lona finagalo pe a faia ma le loto iai e se tasi se gaoioiga e fasiotia ai se isi, pe pule foʻi i lona lava ola.a (Esoto 20:13) E faapena foʻi pe a tuu o tatou ola i se tulaga lamatia, pe lē usitaʻia lapataʻiga e puipuia ai o tatou ola po o ola o isi. Pe a faatāua o tatou ola ma manatu mamafa i soifua o isi, e faaalia ai lo tatou talisapaia o le meaalofa matagofie o le ola.

SAʻILIʻILI ATILI

3. Ia tausia lelei lou soifua mālōlōina

E faaaogā e Kerisiano ua tuuina atu iā Ieova vala uma o o latou olaga, e auauna atu ai iā te ia. E tai pei ua ofo atu o latou tino o se taulaga i le Atua. Faitau le Roma 12:1, 2, ona talanoa lea i fesili nei:

• O le ā e tatau ona uunaʻia ai oe e tausia lelei lou soifua mālōlōina?

• O ā nisi auala e te faia ai faapea?

4. Ia manatu mamafa i le saogalemu o tagata uma

Ua faalaeiauina i tatou e le Tusi Paia e ʻalofia gaoioiga e lamatia ai le ola. Faaali le VITIŌ ma mātau nisi o mea e mafai ona e faia mo le saogalemu.

VITIŌ: Ia Gaoioi ma le Saogalemu (8:34)

Faitau le Faataoto 22:3, ma talanoa auala e maua ai e tagata uma le saogalemu . . .

• i le aiga.

• i le galuega.

• pe a taaalo i taaloga.

• pe a malaga i se taavale po se isi auala o femalagaaʻiga.

5. Faatāua le ola o se tamaitiiti e leʻi fanau mai

Na faamatala mai e Tavita le fiafia o Ieova i le tuputupu aʻe o le tino o se tamaitiiti a o iai i le manava o lona tinā. Faitau le Salamo 139:13-17, ona talanoa lea i le fesili lenei:

• I le silafaga a Ieova, pe faatoʻā amata le ola o se tagata i le taimi e fanau mai ai, po o le taimi e maʻitaga ai le tinā?

Na tuuina atu e Ieova iā Isaraelu se tulafono e puipuia ai tinā ma a latou pepe e leʻi fananau mai. Faitau le Esoto 21:22, 23, ona talanoa lea i fesili nei:

• O le ā le silafaga a Ieova i se tagata na māfua ai se faalavelave ma maliu faafuaseʻi ai se pepe e leʻi fanau mai?

• O ā faalogona o Ieova i se tasi e na te fasiotia ma le loto i ai se pepe e leʻi fanau mai?b

• O ā ou faalogona e faatatau i le silafaga a Ieova?

Faaali le VITIŌ.

VITIŌ: Ia Vaai i le Ola e Pei Ona Silasila i ai le Atua (5:00)

E oo lava i se tasi e iloa lelei le tāua o le ola, e iai le taimi e ono manatu ai e na o le faapaʻū tama lava le tali o lona faafitauli. Faitau le Isaia 41:10, ona talanoa lea i fesili nei:

• Pe a tofotofoina se tinā e faia le faapaʻū tama, o ai e tatau ona saʻili atu i ai mo se fesoasoani? Aiseā?

AOTELEGA

Ua aʻoaʻoina i tatou e le Tusi Paia ina ia alofa, faaaloalo ma puipuia le meaalofa a Ieova o le ola. E aofia ai o tatou ola ma ola o isi.

Fesili Autalu

• Aiseā e tāua ai iā Ieova le ola?

• O ā faalogona o Ieova i se tasi na te fasiotia ma le loto i ai se isi tagata?

• Aiseā e te talisapaia ai le meaalofa o le ola?

MANATU FAAOPOOPO

E faapefea ona tatou faafetai atu iā Ieova mo le meaalofa o le ola?

Pese 141​—O se Vavega, le Ola (2:41)

Mātau le tali o le fesili, Pe o le a faamagalo e le Atua se tasi na faia le faapaʻū tama?

“O le ā le Manatu o le Tusi Paia e Faatatau i le Faapaʻū Tama?” (Mataupu i le jw.org)

Iloilo pe faapefea i le iloaina o le silafaga a le Atua e faatatau i le ola, ona aafia ai le auala e filifili ai a tatou faafiafiaga.

“Pe Tatau Ona E Taalo i ʻTaaloga e Lamatia ai le Ola’?” (Mataupu o le Ala Mai!)

E faapefea ona fesoasoani le Tusi Paia i se tasi ua mafaufau e pule i le ola?

“Ua Ou Fia Oti​—Pe e Mafai Ona Fesoasoani Mai le Tusi Paia pe a Ou Mafaufau e Pule i le Ola?” (Mataupu i le jw.org)