LESONA 58
Tumau Faamaoni iā Ieova
E maumauaʻi Kerisiano moni e ʻalofia so o se mea po o so o se tasi e taofia i latou, mai i le tapuaʻi atu iā Ieova. E mautinoa o ou lagona foʻi na. E tāua iā Ieova lou faamaoni. (Faitau le 1 Nofoaiga a Tupu 28:9.) O ā ni tulaga e ono tofotofoina ai lou faamaoni iā te ia, ma e faapefea ona e fesagaʻia na tulaga?
1. E faapefea ona tofotofoina e isi lo tatou faamaoni iā Ieova?
O le a taumafai nisi tagata e taofia i tatou mai i le auauna iā Ieova. O ai e ono faia lenā gaoioiga leaga? Ua faasalalau atu e nisi ua tuua le upu moni faamatalaga pepelo e faatatau i le faalapotopotoga a le Atua, ina ia faaleagaina ai lo tatou faatuatua. E taʻua i latou o ē ua liliuese mai i le upu moni. E faasalalau atu foʻi e nisi taʻitaʻi lotu faamatalaga sesē e faatatau iā i tatou, ina ia uunaʻia ai nisi e tuua le upu moni. O se lamatiaga foʻi lo tatou finau ma se tagata tetee, faitau i a latou tusi po o faamatalaga i luga o a latou tuatusi i le initaneti, pe matamata foʻi i a latou vitiō. Na fetalai Iesu e faatatau iā i latou e taumafai e faavaivaia isi mai i le auauna faamaoni iā Ieova e faapea: “Tuu ai pea i latou. Auā o i latou o taʻitaʻi tauaso. Afai e taʻitaʻi e le tauaso le isi tauaso, e paʻuʻū uma i laʻua i le lua.”—Mataio 15:14.
2. O ā filifiliga e ono tofotofoina ai lo tatou faamaoni iā Ieova?
O le alofa mo Ieova o le a uunaʻia ai i tatou e ʻalofia le faia o sa tatou vaega, i so o se mea e fesootaʻi atu i lotu sesē. E lē tatau la ona tatou talia se galuega, se faalapotopotoga, po o se isi lava mea e iai sona sootaga i lotu sesē. Ua lapataʻi mai Ieova: “Lou nuu e, ia outou ō ese mai iā [Papelonia le Aai Tele].”—Faaaliga 18:2, 4.
SAʻILIʻILI ATILI
Mātau pe faapefea ona e ʻalofia le faatagaina o se tasi e faavaivaia lou faamaoni iā Ieova, ma le auala e te faaalia ai le faamaoni e ala i le vavaeese mai iā Papelonia le Aai Tele.
3. Faaeteete i aʻoaʻo pepelo
O le ā le auala e tatou te tali atu ai pe a tatou faalogo i faamatalaga lē lelei e faatatau i le faalapotopotoga a Ieova? Faitau le Faataoto 14:15, ona talanoa lea i le fesili lenei:
Aiseā e lē tatau ai ona tatou talitonu i mea uma e tatou te faalogo i ai?
Faitau le 2 Ioane 9-11, ona talanoa lea i fesili nei:
O le ā le auala e tatau ona tatou feutagaʻi ai ma tagata ua liliuese mai i le upu moni?
E tusa pe tatou te lē talanoa tuusaʻo i tagata ua liliuese, ae e ono faapefea ona tatou aafia i a latou aʻoaʻoga?
O ā faalogona o Ieova pe a tatou talitonu i faamatalaga lē lelei e faatatau iā te ia, po o lana faalapotopotoga?
4. Ia faamaoni pea i le Atua pe a faia e se tasi se agasala
Pe a tatou iloa ua faia e se tasi i le faapotopotoga se agasala matuiā, o le ā e tatau ona tatou faia? Iloilo se mataupu silisili mai i le Tulafono a le Atua na tuu atu iā Isaraelu anamua. Faitau le Levitiko 5:1.
E pei ona taʻua i lenei mau, pe a tatou iloa ua faia e se tasi se agasala matuiā, e tatau ona tatou faailoa atu i toeaina. Peitaʻi, a o leʻi faia faapea, o se gaoioiga agalelei lo tatou talanoa muamua i le tagata fai mea sesē, ina ia faailoa atu i toeaina lana agasala. Pe afai e na te lē faia faapea, o lo tatou faamaoni la iā Ieova e uunaʻia ai i tatou e faailoa atu i toeaina mea ua tatou iloa. E faapefea i lenā gaoioiga ona faaalia ai lo tatou faamaoni . . .
iā Ieova le Atua?
i le tagata fai mea sesē?
i isi o le faapotopotoga?
Pe a tupu se faafitauli i se isi uso, ia fesoasoani i ai!
5. Vavaeese mai iā Papelonia le Aai Tele
Faitau le Luka 4:8 ma le Faaaliga 18:4, 5, ona talanoa lea i fesili nei:
Po o lesitala lava loʻu igoa o se sui auai o se lotu sesē?
Po o oʻu auai i se faalapotopotoga e iai sona sootaga i se lotu?
Pe e iai se vala o laʻu galuega e lagolagoina ai lotu sesē?
Pe e iai ni vala o loʻu olaga e manaʻomia ona ou vavaeese ai mai lotu sesē?
Pe afai o le ioe laʻu tali i se tasi o nei fesili, o ā suiga e tatau ona ou faia?
Po o le ā lava le tulaga, ia faia se filifiliga e te maua ai se lotofuatiaifo mamā ma faaalia ai lou faamaoni iā Ieova.
O le ā e te faia pe a talosagaina oe e foaʻi sau meaalofa mo se fuafuaga faalelotu?
UA FAAPEA MAI NISI: “Ou te fia iloa faamatalaga a tagata ua liliuese e faatatau i Molimau a Ieova, ina ia iloa ai le auala e tali atu ai e puipuia le upu moni.”
Pe e atamai lenā gaoioiga? Aiseā?
AOTELEGA
Ina ia tumau faamaoni iā Ieova, e tatau ona tatou ʻalofia le faifaimea faatasi ma i latou e taumafai e faasesēina i tatou.
Fesili Autalu
Aiseā e lē tatau ai ona tatou faalogo i manatu o tagata ua liliuese mai i le upu moni?
O le ā e tatau ona tatou faia pe a tatou iloa ua faia e se uso se agasala matuiā?
E faapefea ona tatou usitaʻia le lapataʻiga e ō ese mai i lotu sesē?
MANATU FAAOPOOPO
Le auala e te tali atu ai pe a faasalalau e nisi ni faamatalaga sesē e faatatau i Molimau a Ieova.
“Po Ua E Maua Faamatalaga Moni?” (Le Olomatamata, Aokuso 2018)
E faapefea ona e iloa se faalapotopotoga, po o nisi mea o loo lagolagoina Papelonia le Aai Tele?
“Ia Pisi Pea i le Faaiʻuga ʻo Aso e Gata Ai’” (Le Olomatamata, Oketopa 2019, palakalafa 16-18)
O le ā ua faia e nisi tagata tetee ina ia faavaivaia ai lo tatou faatuatua?
Faitau i le tala “Na Ou Saʻilia le Atua Talu Ona Ou Laʻitiiti,” e faatatau i se faifeʻau Sinitō na ia motusia ana sootaga uma ma lotu sesē.
“E Mafai e le Tusi Paia Ona Suia Olaga” (Le Olomatamata, Iulai 1, 2011)