Le Auala E te Malamalama ai i le Tusi Paia

2. Faitau ma se Mafaufau e Fetālaʻi

Pe na taʻu atu e sau uō iā te oe ni mea e lē lelei e uiga i se tasi e te leʻi feiloaʻi muamua lava i ai? Ae ina ua e feiloaʻi i ai, pe na avea tala a lau uō ma mea e aafia ai lau faaiʻuga saʻo e faatatau i lenā tagata ma ona uiga lelei? E mafai ona tupu se mea faapena i le Tusi Paia.

NA LAPATAʻI mai le aposetolo o Paulo e ono tupu se mea faapena, pe a tatou lē faitauina le Tusi Paia ma se mafaufau e fetālaʻi. Na tusi Paulo e faatatau i nisi tagata Iutaia i ona aso e faapea: “Ua ou molimau iā i latou, ua latou maelega i le Atua; ae e lē tusa ai ma le iloa lelei o le Atua.”—Roma 10:2.

O nisi o na tagata Iutaia i le uluaʻi senituri, e leʻi lotomalilie e talia le mea moni, o Iesu o le Mesia e ui lava ina faailoa manino mai i le Tusi Paia. Sa fetaui iā Iesu faamatalaga uma i Tusitusiga Eperu e faatatau i le Mesia, ma valoaga uma na faataunuuina iā te ia. O le maumaututū i o latou manatu ua leva ona iai, na lē maua ai e le toʻatele o tagata Iutaia le malamalamaga o le Afioga a le Atua.

O le ā e tatou te aʻoaʻoina mai i le faamatalaga a le Tusi Paia e uiga i lenā mea na tupu? E tāua ona faitau le Tusi Paia ma se mafaufau e fetālaʻi. O le lē fetālaʻi ma le maumaututū i ona lava manatu, e lē mafai ai ona malamalama le tagata faitau i upu moni o le Tusi Paia.

O se faaaʻoaʻoga, na faamatala e se polofesa e suʻesuʻe i mea tau lotu i Karolina i Mātū i Amerika, le Tusi Paia e faapea, o “se tusi na tusia e tagata, ma o manatu o loo iai o manatu o tagata, o le tele lava o na manatu eseese, e lē o aumaia ai ni faamatalaga saʻo e maufaatuatuaina e uiga i le olaga.” Pe a faitau e se tasi le Tusi Paia e faapea o “se tusi na tusia e tagata,” atonu o le a ia teena ai taʻiala ma mataupu silisili e lē talafeagai ma ona manatu.

I le faaeseesega, ua faalaeiauina i tatou e suʻesuʻe ma le filigā le Tusi Paia. Ua faapea mai le Tusi Paia e faatatau i tagata Perea i aso o Paulo: “Ua latou taliaina le upu ma le fiafia tele, ua latou matuā iloiloina Tusitusiga Paia i aso taʻitasi pe e moni nei mea.” (Galuega 17:11) I le pei o na tagata Perea, atonu e manaʻomia ona aveese manatu faaituʻau po o le faitio, e punitia ai lou malamalama i le Tusi Paia. Ia faitau le Afioga a le Atua ma se mafaufau e fetālaʻi, ma naunau e iloa Lē e Ana le feʻau faaoso fiafia o loo iai.