Talitonuga 4: O Le Atua o le Tasitolu

O fea e tupuga mai ai lea aʻoaʻoga? “Atonu e iai se manatu o le aʻoaʻoga o le Tasitolu o se talitonuga na faatoʻā iai i le senituri lona fā. I se isi itu, e moni lea manatu . . . O le talitonuga e ‘tasi le Atua i Peresona e tolu’ sa leʻi mausalī lelei, ma sa leʻi fesootaʻi lelei atu i le olaga faa-Kerisiano ma lona faatuatuaga, a o leʻi oo i le iʻuga o le senituri lona fā.”—New Catholic Encyclopedia (1967), Tusi 14, itulau 299.

“Na feiloaʻi le Fono i Naisia iā Me 20, 325 [T.A.]. Sa taʻitaʻifono ai Konesetatino, ma sa ia faatautaia ma le malosi le talanoaga ma faatūina . . . le manatu tāua e faaalia ai le talitonuga na faalauiloa e le fono e uiga i le faiā a Keriso ma le Atua, ‘o sē e tino e tasi ma le Tamā.’ . . . E ui ina lē ioe i ai le toʻatele, ae na sainia e epikopō uma le iʻugāfono ona o le matataʻu i le emeperoa, seʻi vaganā ai epikopō e toʻalua.”—Encyclopædia Britannica (1970), Tusi 6, itulau 386.

O le ā le tala a le Tusi Paia? “Ua tumu Setefano i le Agaga Paia, ua pulatoʻa i le lagi ua iloa atu le pupula o le Atua, ma Iesu o loo tū i le itu taumatau o le Atua, ona fai atu lea, ‘Faauta, ua ou iloa le lagi ua avanoa, ma le Atalii o le tagata o loo tū i le itu taumatau o le Atua.’”—Galuega 7:55, 56, O le Tusi Paia Samoa (Lomiga 1969).

O le ā ua iloa mai i lea vaaiga? Ina ua faatumulia Setefano i le mana o le Atua, ona ia iloa atu lea o Iesu o loo “tū i le itu taumatau o le Atua.” O lea, e leʻi avea Iesu o se Atua ina ua toe tū mai ma afio i le lagi, ae o se peresona agaga e ese mai le Atua. E lē o taʻua e faapea e iai se peresona lona tolu o loo i tafatafa o le Atua. E ui i taumafaiga e suʻe mau o le Tusi Paia e lagolago ai le Tasitolu, na faapea mai le patele o Marie-Émile Boismard i lana tusi À l’aube du christianisme—La naissance des dogmes (Ina ua Amata le Faa-Kerisiano—Le Amataga o Talitonuga): “E lē maua i le Feagaiga Fou . . . le faaupuga e tasi le Atua ae tolu ona peresona.”

Na uunaʻia lea talitonuga e Konesetatino ina ia taofi ai le fefinauaʻi o le Lotu i le senituri lona fā. Ae ua lāgā ai se isi fesili: O Maria lea na fanaua Iesu, po o ia o le “Tinā o le Atua”?

Faatusatusa mau nei: Mataio 26:39; Ioane 14:28; 1 Korinito 15:27, 28; Kolose 1:15, 16

LE AʻOAʻOGA MONI:

Faatoʻā aliaʻe mai le aʻoaʻoga o le Tasitolu i le faaiʻuga o le senituri lona fā

[Ata i le itulau 7]

[Ē Ana le Ata i le itulau 7]

Museo Bardini, Florence