Talitonuga 5: O Maria le Tinā o le Atua

O fea e tupuaga mai ai lea aʻoaʻoga? “Na amata ona uunaʻia le faamamaluina o le tinā o le Atua ina ua liulotu le toʻatele o tagata faapaupau. . . . O nei tagata liulotu, e faitau afe tausaga o iai o latou talitonuga faapaupau e faatatau i le atua fafine, o le ‘tinā sili’ ma le ‘taupou paia.’”—The New Encyclopædia Britannica (1988), Tusi 16, itulau 326 ma le 327.

O le ā le tala a le Tusi Paia? “O le a tō oe, ma e fanauina se tama tane, e te faaigoa iā te ia o Iesu. E sili o ia, e taʻua foʻi o le Alo o le Silisili ese. . . . O le mea lea e taʻua ai le tama paia, o le Alo o le Atua.”—O upu faasisipa e ā matou; Luka 1:31-35.

Ua faamanino mai e lenā mau o le Tusi Paia, o Maria, o le tinā o le “Alo o le Atua,” ae lē o le tinā o le Atua. Pe faamata e mafai ona ia tauave i lona manava Lē e ‘lē ofi i le lagi’? (1 Tupu 8:27) E aunoa ma se faamatalaga faapena a Maria. Ae ua māfua ona fenuminumiaʻi po ai tonu Maria, ona o le aʻoaʻoga o le Tasitolu. I le 431 T.A. na taʻu ai Maria o le “Tinā o le Atua” (faa-Eleni, Theotokos, o lona uiga “o lē na fanauina le Atua”) i le Fono i Efeso, ma na amata ai ona tapuaʻi tagata iā Maria. Na faia lea fono i le aai o Efeso, ma e faitau senituri o avea ma autū o le tapuaʻiga i tupua e faamanatu ai Atemisa, le atua fafine o le uluola o meatotō ma le fanautama.

O lea, e tele vala o le tapuaʻiga i le faatusa o Atemisa, lē na “paʻu ifo mai le lagi,” sa avea ma vala o le tapuaʻiga iā Maria, e iai solo po o polosēsio. (Galuega 19:35) O se isi foʻi faiga na ofi mai i talitonuga faa-Kerisiano, o le tapuaʻi lea i le faatusa o Maria ma isi.

Faatusatusa mau nei: Mataio 13:53-56; Mareko 3:31-35; Luka 11:27, 28

LE AʻOAʻOGA MONI:

O Maria, o le tinā o le Alo o le Atua ae lē o le tinā o le Atua. O le aʻoaʻoga o le Tasitolu na tupuga mai ai le tapuaʻiga iā Maria o ia o le Tinā o le Atua