Ia Mafuta Atu i le Atua

E Silasila i Mea Lelei o i se Tagata

1 TUPU 14:13

“E SUʻESUʻE e Ieova loto uma lava, e silafia foʻi e ia o mafaufauga ma faanaunauga uma.” (1 Nofoaiga a Tupu 28:9) O na upu faagaeeina e tatou te matuā talisapaia ai le loloto o le naunau mai o Ieova iā i tatou. E saʻili e Ieova se mea e lelei i o tatou loto e ui ina tatou lē lelei atoatoa. E manino mai lenei mea i ana upu o loo i le 1 Tupu 14:13, e faatatau iā Avia.

Na ola aʻe Avia i se aiga leaga. O lona tamā o Ierepoamo, o le taʻitaʻi o ituaiga na liliu ese mai le upu moni.a Na fuafua e Ieova e matuā tafiesea le aiga o Ierepoamo, “e pei ona tafiesea e se tasi o otaota.” (1 Tupu 14:10) Peitaʻi, na faatonuina e Ieova e na o Avia le suli o le aiga o Ierepoamo, o lē sa maʻi tigāina e tanuina aloaʻia.b Aiseā? Na fetalai le Atua: “Ua maua e Ieova le Atua o Isaraelu se mea lelei iā te ia i le aiga o Ierepoamo.” (1 Tupu 14:1, 12, 13) O le ā se mea ua taʻu mai e nei upu e uiga iā Avia?

E lē o taʻua i le Tusi Paia e faapea na avea Avia ma tagata tapuaʻi faamaoni a le Atua. Ae na iai sina mea lelei na iā te ia. O lenei mea lelei “ua maua e Ieova,” atonu sa faatatau i le tapuaʻiga iā te Ia. E manatu tusitala a le ʻau Rapi, na alu ane Avia i le malumalu i Ierusalema, ia po o lona aveesea foʻi o leoleo na faatulaga e lona tamā e taofi ai tagata Isaraelu mai le ō atu i Ierusalema.

E tatou te lē o iloa tonu le mea lelei na faia e Avia, ae na mataʻina lenā mea lelei. Muamua, sa faamaoni e fai. Sa “iā te ia” lenei mea lelei, o lona uiga sa i lona loto. Lona lua, sa mataʻina le lelei o lana mea na fai. Sa faaalia e Avia lenei mea lelei e ui lava sa nofo “i le aiga o Ierepoamo.” Na faapea mai se tagata tusitala: “E avatu se faamalō tele i alii o loo tumau lo latou lelei a o nonofo i nofoaga ma aiga leaga.” Na faapea mai se isi o le mea lelei na faia e Avia e ese le “mataʻina . . . , e pei o le feʻilafi o fetu i le pō pogisa ma le matagofie o arasi i se siʻomaga o laau e leai ni lau.”

E sili ona tāua upu o loo i le 1 Tupu 14:13, ona e tatou te aʻoaʻoina mai ai se mea matagofie e faatatau iā Ieova, i mea o loo ia saʻilia mai iā i tatou. Manatua foʻi, na “maua” se mea lelei iā Avia. E foliga mai na saʻiliʻili e Ieova le loto o Avia seʻia oo ina maua ai sina mea lelei. Pe a faatusatusa i lona aiga, na taʻua e se alii tusitala, o Avia o se penina tutasi i totonu o se “faaputuga maa.” Sa faatāua e Ieova lenei mea lelei, ma na ia tauia ai lenei suli e toʻatasi o lenei aiga leaga, i le faaalia i ai o le alofa mutimutivale.

Pe e lē faalaeiauina ai i tatou, ona e saʻili ma faatāua e Ieova se mea lelei iā i tatou e ui ina tatou lē lelei atoatoa? (Salamo 130:3) E uunaʻia ai i tatou faalatalata atu ai iā Ieova, o lē e saʻili i o tatou loto mo se mea lelei e tusa lava pe itiiti.

[Faaopoopoga i lalo]