O Lesona Tatou te Aʻoaʻoina Mai iā Iesu

Le Auala e Maua ai le Fiafia

E faapefea ona maua le fiafia?

▪ Na taʻua e Iesu le fiafia i uluaʻi upu o lana lauga taʻutaʻua. Na fetalai o ia: “E fiafia o ē e naunau i mea faaleagaga.” (Mataio 5:3) O le ā le uiga o lana fetalaiga? Aiseā e tatou te naunau ai i mea faaleagaga?

Ina ia ola, e tatau ona tatou mānava, feinu ma aai e pei o meaola. Ae ina ia fiafia, ua iā i tatou se faanaunauga e lē o iai i meaola, o le faanaunauga ia malamalama i le māfuaaga e tatou te ola ai. E na o Lē na faia le ola e mafai ona faamalieina lenā manaʻoga. O lea na fetalai ai Iesu: “E lē na o meaʻai e ola ai le tagata, ae o afioga uma e tulei mai i le fofoga o Ieova.” (Mataio 4:4) E fiafia ē e naunau i mea faaleagaga auā e mafuta vavalalata i latou iā Ieova “le Atua fiafia,” ma e na te avatu iā i latou le faamoemoe lea e tāua ina ia ola fiafia ai.—1 Timoteo 1:11.

O ā faamanuiaga na taʻua e Iesu?

▪ Na fetalai Iesu: “E fiafia o ē e agamalu, auā e fai mo latou tofi le lalolagi.” (Mataio 5:5) Na avatu e Iesu le faamoemoe i tagata e ala i le faamālōlō o maʻi ma toe faatutū ē ua maliliu. Na afio mai foʻi o ia ma se feʻau o le faamoemoe. Na ia faamatala mai: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) O le a olioli i le ola e faavavau i le lalolagi ē e usiusitaʻi i le Atua. Seʻi manatu i le manaia o le ola faatasi ma ē e agamalu ma lē toe ola matutua! E lētioa ona taʻua i le Afioga a le Atua: “Ia olioli i le faamoemoe.” (Roma 12:12) Na taʻua foʻi e Iesu le auala e maua ai le fiafia i le taimi nei.

O ā aʻoaʻoga a Iesu e uiga i se olaga fiafia?

▪ Na aumai e Iesu fautuaga aogā i mataupu e pei o le va feagai o tagata, faaipoipoga, lotomaulalo, ma le vaaiga saʻo e uiga i meafaitino. (Mataio 5:21-32; 6:1-5, 19-34) E fesoasoani le mulimuli i fautuaga a Iesu e maua ai le fiafia.

O le limafoaʻi e maua ai le fiafia. (Galuega 20:35) O se faaaʻoaʻoga, na fetalai Iesu: “A e faia se taumafataga, ona valaaulia lea o ē e matitiva, o ē e pipili, o ē e pipiʻo o latou vae, ma ē e tauaso; ma o le a e fiafia ai, auā e lē mafai ona latou toe totogi mai iā te oe.” (Luka 14:13, 14) E maua le fiafia pe a e faia mea e fiafia ai isi, ae lē o le faia o mea e faafiafia ai oe lava.

O le ā le puna sili o le fiafia?

▪ E maua le fiafia pe a e faia mea mo isi, ae e sili ona e fiafia pe a faia mea mo le Atua. E sili le fiafia e maua mai i le faia o mea mo le Atua, i lo o le fiafia o mātua e mitamita ma alolofa i a latou fanau. E manino lenei tulaga i le mea na tupu i le aso na aʻoaʻo atu ai Iesu i tagata. “Ona alaga mai lea o se fafine mai i le motu o tagata ma faapea mai iā te ia: ‘Amuia le manava na e fanau mai ai ma susu na e susu ai!’ A ua ia fetalai atu: ‘E leai, Amuia i latou e faalogo i le afioga a le Atua ma tausi i ai!’”—Luka 11:27, 28.

Na maua e Iesu le faamalieina ma le fiafia i le faia o le finagalo o lona Tamā i le lagi. E finagalo le Atua ia faalogo tagata i le faamoemoe o le ola e faavavau. Ina ua uma ona faamatala atu lenei faamoemoe i se tagata fiafia, na fetalai atu Iesu: “O laʻu meaʻai, o le faia lea o le finagalo o lē na auina mai aʻu.” (Ioane 4:13, 14, 34) E mafai foʻi ona e tofo i le fiafia i le faia o se mea e faafiafia ai le Atua, e ala i le taʻu atu o upu moni o le Tusi Paia i isi.

Mo nisi faamatalaga, tagaʻi i le mataupu 1 o lenei tusi, O ā Aʻoaʻoga Moni a le Tusi Paia? lomia e Molimau a Ieova.

[Ata i le itulau 16]

E maua le fiafia moni pe a faamalie lo tatou faanaunauga ia malamalama i le māfuaaga ua tatou ola ai