Auala e 5
Ia Faamalie Ou Faanaunauga Faaleagaga
O LE Ā LE AʻOAʻOGA A LE TUSI PAIA? “E fiafia o ē e naunau i mea faaleagaga.”—Mataio 5:3.
AISEĀ E FAIGATĀ AI? E faitau afe lotu eseese ua iai, ma ua latou aʻoaʻo auala eseese e faamalie ai ou faanaunauga faaleagaga. E faapefea ona e iloa le lotu o loo aʻoaʻoina le upu moni ma faafiafia moni le Atua? Ua fai mai nisi tusitala lauiloa o le talitonu i le Atua ma tapuaʻi iā te ia, e lē talafeagai ma e faaleagaina ai. Ua aotele e le mekasini o le Maclean’s manatu o se tagata e lē talitonu i le Atua, e faapea: “Ua aʻoaʻo e lotu Kerisiano e iai se mea e sili atu i olaga o tagata i lo o na o mea o loo latou vāai, faalogo ma lagona, ma ua manatu ai e lē tāua lenei olaga, ma ua māfua ai faiga sauā.”
O LE Ā E TE FAIA? Iloilo faamaoniga e iloa ai e iai le Atua. (Roma 1:20; Eperu 3:4) Aua neʻi faavaivaia oe e se tasi mai i le saʻilia o tali o fesili tāua e pei o nei: Aiseā ua tatou ola mai ai? Pe e iai se isi olaga pe a mavae le oti? Aiseā ua tele ai puapuaga? O le ā e finagalo le Atua ou te faia? E tāua tele ona maua ni tali faamalieloto o na fesili, auā o le a e lotomalie ai pea.
Peitaʻi, aua e te vave talitonu i tala uma a tagata. Ua uunaʻia oe i le Tusi Paia ia “mafaufau lelei,” ina ia e faamaonia e oe lava mea e talia e le Atua. (Roma 12:1, 2) O le a tauia au taumafaiga. Pe afai e te suʻesuʻeina le Tusi Paia ma faatatauina ana fautuaga aogā, o le a e ʻalofia faafitauli, faaitiitia ou popolega, ma matuā olioli i le olaga. O lenā mea o se folafolaga mautinoa. E faitau miliona tagata mai i atunuu eseese ua maua aogā, ona o le aʻoaʻoina o le upu moni e uiga i le Atua ma lona finagalo. O se faaaʻoaʻoga, faitau i tala o olaga o tagata, i le itulau e 18 e oo i le 21 o lenei mekasini.
A o e maua aogā i le faatatauina o fautuaga atamai a le Tusi Paia, o le a atili ai ona e alofa i le Atua. E valaaulia oe ia suʻesuʻe le Tusi Paia ma Molimau a Ieova. Pe a e faia faapea, o le a e ioe i upu a Paulo: “E tele mea e maua mai le faamaoni i le Atua ma le lotomalie.”—1 Timoteo 6:6.
[Ata i le itulau 8]
Ia faamaonia e oe lava mea e talia e le Atua