Ua Tusia le Suafa i Fale i le Vanu

ST. MORITZ. Pe e te masani i lenā igoa? Atonu, auā o se nofoaga e lauiloa i le lalolagi mo faigāmālōlōga i le vanu laugatasi o Engadine, i Suisilani. Ae o St. Moritz o se tasi lea o māfuaaga e fiafia ai tagata e ō atu i lenei vanu matagofie, e siʻomia i atumauga e toʻa ai le kiona, i saute i sasaʻe o Suisilani e lata i Italia. O loo iai foʻi i inā le Fanua Faasao o Suisilani, e matagofie i le vaai lea e tele ai laau ma meaola eseese, e viia ai Lē silisili na faia mea, o Ieova. (Sala. 148:7-10) Ae e faapena foʻi se faiga masani o loo iai pea, na amata mai i le ogatotonu o le senituri lona 17.

Atonu e te fiafia i se vaaiga e uigaese i le tele o fale o loo iai i lenei vanu. E masani ona vaaia le suafa o le Atua o tusia i le pito i luma o fale, e pei o luga aʻe o le faitotoʻa pito i luma. I senituri ua mavae, sa masani ona teuteu puipui o fale i ni tusitusiga, a lē vali ua osiosi i le simā pe vane i maa o le fale. O le ata lenei o se fale i le nuu o Bever. O le faaliliuga lenei o upu o loo tusia ai: “O le tausaga e 1715. O Ieova o le amataga, o Ieova foʻi o le gataaga. E mafaia mea uma ona o le Atua, e leai se mea e mafai e aunoa ma ia.” Ioe, e faalua ona taʻua le suafa o le Atua i lenei tusitusiga tuai.

E faapena foʻi se tusitusiga e sili atu ona tuai i le nuu o Madulain. E faapea le tusitusiga: “Salamo e 127. Afai e lē atiina aʻe e Ieova le fale, e galulue fua i latou o ē atiina aʻe. Lucius Rumedius. O le tausaga e 1654.”

Aiseā ua tusia ai le suafa o le Atua i fale o tagata i lenei vanu? I taimi o le Toefuataʻiga o Lotu, na lomia ai le Tusi Paia i se gagana faa-Latina e taʻu o le Romansh, lea sa tautatala ai tagata na nonofo i le vanu o Engadine. O le uluaʻi tusi lea na faaliliuina i lenā gagana. Ona o le fiafia i mea na latou faitau ai i le Afioga a le Atua, na tusia ai e le toʻatele o tagata o le nuu i puipui o o latou fale, e lē gata o o latou igoa ae o mau foʻi o le Tusi Paia, lea e taʻua ai le suafa o le Atua.

E oo mai lava i aso nei, o loo faalauiloa atu pea le suafa o Ieova ma viiviia o ia e ala i nei tusitusiga, e ui ua tele senituri talu ona tusia i fale o tagata. E mafai e tagata o ia nuu ma ē asiasi mai i lenei vanu, ona iloa atili lenei Atua ofoofogia o Ieova, e ala i le asiasi atu i se isi fale o loo taʻua ai lona suafa, o le Maota mo Sauniga a Molimau a Ieova i Bever.

[Ē Ana le Ata i le itulau 7]

© Stähli Rolf A/age fotostock