E Mafai e Uiga Agalelei Ona Aveesea ai Faalogona Ootia

SA FAAALIA e se tinā matua ni uiga e lē faaleuō iā George ma Manon, o ni Molimau a Ieova se toʻalua i Holani, ina ua la talanoa atu iā te ia e faatatau i le tala lelei o le Malo. Na faamatalaina e lenei tinā, e lē gata ua maliliu ana tane e toʻalua, ae faapea foʻi ma lana tama tama, ma e maua foʻi o ia i le maʻi gugu. E ui lava sa iai le taimi na tau toʻa ai le tinā a o faagasolo le talanoaga, ae e leʻi faaalia lava e ia ni uiga faaleuō.

Peitaʻi, na faapea atu George iā Manon, pe a la toe foʻi e asi le tinā matua lea, ona ave lea o se teu fugālaau mo ia, auā ua tuua toʻatasi o ia ma iai faalogona ootia. Ina ua la faia faapea, na matuā faateʻia ai le tinā matua iā Rie. Peitaʻi, e leʻi talafeagai lea taimi mo ia, o lea na faia ai se fuafuaga ina ia toe asia o ia i se isi aso. Ina ua la toe asia o ia i le aso ua uma ona faatulagaina, e leʻi maua atu o ia i le fale. E ui i a la taumafaiga e asia o ia i le tele o taimi, ae e leʻi toe maua atu lava o ia. Na iʻu ina la manatu, e lē manaʻo le tinā lea e faia se talanoaga.

I se tasi aso, na iʻu ina toe maua atu e George le tinā matua o Rie i lona fale. Na ia faatoese iā George ona o lona lē iai i le fale i le aso sa tuu e faia ai le talanoaga, ma faapea atu sa taofia o ia i le falemaʻi. Na ia faapea mai: “E te lua iloa o le taimi lava na oulua tuua ai loʻu fale, na amata loa ona ou faitauina le Tusi Paia!” Na faia ai loa i le taimi lenā se talanoaga manaia, ma amataina ai se suʻesuʻega faale-Tusi Paia.

A o faaauau pea le suʻesuʻega faale-Tusi Paia a Rie, na amata ona suia ona uiga mai i se tagata na lofitūina i faalogona ootia, e avea o se tinā e laumata ataata, toe agalelei. E ui e lē fealuaʻi o ia i le tele o taimi, ae na vave ona ia faailoa atu ona talitonuga fou i so o se tasi e asia o ia. E ui lava e leʻi mafai ona ia auai i taimi uma i sauniga a le faapotopotoga ona o lona tulaga tau i le soifua mālōlōina, ae na avea o se fiafiaga mo ia le asiasi atu o uso ma tuafāfine. O le aso lava na atoa ai le 82 o ona tausaga, na ia auai ai foʻi i se fonotaga matagaluega, ma faailogaina lona tuuina atu i le Atua e ala i le papatisoga.

Ina ua maliu Rie i ni nai masina mulimuli ane ina ua uma lona papatisoga, sa maua ai se solo na ia tusiaina. I lenā solo, na ia faamatalaina ai le leai o se fiafia e maua e se tagata matua ae tuua toʻatasi, ma faamamafa ai le tāua o le faaalia o le agalelei. Ua faapea mai Manon: “Ina ua ou faitau i lenā solo, na matuā pāʻia ai lava loʻu loto, ma ua ou matuā fiafia lava ona o le fesoasoani a Ieova, i le auala na ma faaalia ai le agalelei i lenā tinā matua.”

Ioe, o le faaaʻoaʻoga lelei a Ieova ua uunaʻia ai i tatou e faaalia atu na uiga o le alofa ma le agalelei. (Efe. 5:1, 2) O le a fua tele mai la tatou faiva, a o tatou ʻfaailoa atu i tatou o ni auauna a le Atua, i le agalelei.’—2 Kori. 6:4, 6.