Pe e Iai se Tasi o Faafofoga i Tatalo?

“Sa masani ona ou lē mautonu pe e iai moni se Atua, ae o nisi taimi ou te tatalo pea i ai. Ou te leʻi mautinoa po o faafofoga mai se tasi, ae ou te taʻutino atu na ou moomoo talosia o iai se tasi o faafofoga mai. Sa leai soʻu fiafia ma e leʻi iai se fuafuaga o loʻu olaga. Ou te leʻi fia talitonu i le Atua, ona sa ou manatu e na o tagata faatauvaa e talitonu iā te ia.”—PATRICIA,a AIALANI.

PE E tutusa ou lagona ma Patricia? Pe e te tatalo pea, e ui lava e te lē mautonu pe e iai moni lava se Atua? Afai o lea, e lē na o oe la o loo iai na lagona. Mātau manatu o loo mulimuli mai.

◼ I se suʻesuʻega na faia i tagata e toʻa 2,200 i Peretania, e 22 pasene o i latou e talitonu e iai se Atua na foafoaina le lalolagi, ma o loo faafofoga mai i tatalo. Ae e 55 pasene na faapea mai, e iai lava taimi e tatalo ai.

◼ I se suʻesuʻega i tagata e toʻa 10,000 mai i konitineta e fā, ua faaalia ai e toetoe 30 pasene e tatalo pea, e ui ina latou faapea mai e leai se Atua.

Aiseā e Latou te lē Mautonu Ai?

Ua faapea mai se tamāloa i Egelani e igoa iā Aleni: “Sa ou lē talitonu i le Atua, ona na ou manatu na faatūina lotu ina ia pulea tagata ma maua ai tupe. E lē gata i lea, sa ou mafaufau, pe afai e iai se Atua, semanū e lē tele le lē faamasinotonu. Peitaʻi, o nisi taimi ou te nofonofo ai ma ou talanoa i ʻse tasi e lē o vaaia.’ Ou te fesili ifo foʻi iā te aʻu lava, ʻNa faapefea ona ou iai i inei?’”

E tofu tagata uma e iai na ituaiga o lagona, ma māfuaaga e lē mautonu ai pe e faafofogaina a tatou tatalo. E masani ona faateteleina le lē mautonu ona o le lē maua o ni tali i fesili e pei o nei:

◼ Pe e iai Sē na foafoaina mea uma?

◼ Aiseā e masani ai ona avea lotu ma taaʻiga leaga?

◼ Aiseā ua lē taofia ai e le Atua puapuaga?

Pe e lē faalaeiauina ea oe e tatalo, pe afai e te iloa tali o nei fesili?

[Faaopoopoga i lalo]