Ia Mataala i Mailei a le Tiapolo!

ʻIa ō ese mai i le mailei a le Tiapolo.’—2 TIMO. 2:26.

O LE Ā LAU TALI?

Pe afai ma au masani le faitioina o isi, o le ā e tatau ona e faia?

O le ā e tatou te aʻoaʻoina mai i faaaʻoaʻoga a Pilato ma Peteru?

E faapefea ona e ʻalofia faalogona o le nofosala naʻuā?

1, 2. O ā mailei a le Tiapolo o le a iloiloina i lenei mataupu?

O LOO taumafai Satani e maileia auauna a Ieova. E lē fasiotia i tatou e Satani e pei ona faia e se tagata tuli manu. Ae o lona sini autū, ia puʻeolaina le tagata ina ia faia le mea e loto i ai.—Faitau le 2 Timoteo 2:24-26.

² E faaaogā e se tagata tuli manu mailei eseese e puʻeolaina ai se manu. E taumafai o ia e tataʻi se manu i le nofoaga o loo iai le matāsele, po o le faaaogāina foʻi o se mailei iloagatā. E faapena mailei ua faaaogā e le Tiapolo e puʻeola ai auauna a le Atua. Ina ia ʻalofia le tupu o lenā mea, e tatau ona mataala ma utagia faailoilo e iloa ai ua tatou lalata atu i mailei a Satani. I lenei mataupu o le a iloiloina ai, pe faapefea ona leoleo i tatou faasaga i mailei e tolu a le Tiapolo, (1) o le lē puleaina o le tautala, (2) o le fefe ma omiga mai aumea, ma le (3) o lagona nofosala naʻuā. I le mataupu o le a sosoo mai o le a iloiloina ai isi mailei e lua a Satani.

IA TINEIA LE AFI

3, 4. O le ā e tupu pe a lē puleaina le laulaufaiva? Aumai se faataʻitaʻiga.

³ Ina ia faataape manu mai mea o loo lalafi ai, e susunu e nisi tagata tuli manu se vaega o le togāvao, ona latou puʻea lea o manu a o taumafai e sosola ese. I se uiga faafaatusa, e manaʻo le Tiapolo e faatupu faafitauli e pei o se afi i le faapotopotoga. Ona ia tataʻi ese lea o uso ma tuafafine mai se nofoaga saogalemu, agaʻi atu i se nofoaga e puʻea ai. E mafai ona tatou galulue faatasi ma le Tiapolo e aunoa ma lo tatou iloaina, ma maileia ai i tatou.

⁴ Na faatusa e le soo o Iakopo le laulaufaiva i se afi. (Faitau le Iakopo 3:6-8.) A lē puleaina le laulaufaiva, e mafai ona tatou amataina se afi faafaatusa i le faapotopotoga. E faapefea? Seʻi mafaufau i le faataʻitaʻiga lenei: Na faasilasila le avea o se tasi o tuafafine ma paeonia sauatoa. Ina ua māeʻa le sauniga, ona talanoa lea o ni tuafāfine se toʻalua e faatatau i le faasilasilaga. Na fiafia le isi i le paeonia fou, ma le faamoemoe o le a taulau manuia. Ae na fesiligia e le isi le uunaʻiga ua paeonia ai, ma manatu e fia matamuamua le paeonia fou. O lē fea o i laʻua e te fia uō i ai? E faigofie ona iloa po o ai o i laʻua ua amataina le afi i le faapotopotoga.

5. E faapefea ona tineia le afi o le lē pulea o le tautala?

⁵ E faapefea ona tineia le afi, o le lē pulea o le tautala? Na fetalai Iesu: “O le tele o mea i le loto e tautala mai ai le gutu.” (Mata. 12:34) O lea, o le laasaga muamua, o le iloilo lea o o tatou loto. Ia ʻalofia faalogona lē lelei lea e mapuna mai ai upu faatigā. O se faataʻitaʻiga, pe afai o aapa atu se uso i nisi o faaeaga, pe e tatou te fesiligia le uunaʻiga ua ia faia ai faapea? Pe afai e masani ona tatou fesiligia uunaʻiga e fai ai le auaunaga a isi, ia manatua, na fesiligia foʻi e le Tiapolo uunaʻiga a le auauna faamaoni o Iopu. (Iopu 1:9-11) Nai lo o le masalosalo vale, e lelei ona iloilo po o le ā le māfuaaga o lo tatou faitioina o lea uso. Pe e iai se māfuaaga lelei e māfua ai ona tatou mafaufau faapena? Po ua aafia o tatou loto i le agaga lē alofa o nei aso e gata ai?—2 Timo. 3:1-4.

6, 7. (a) O ā nisi o māfuaaga e tatou te faitioina ai isi? (e) E faapefea ona tatou tali atu pe a upuleagaina i tatou?

⁶ O se tasi o māfuaaga e faitioina ai isi, ona e tatou te fia matamuamua. O le iʻuga, o le a tatou taumafai ai e sii i tatou i luga, ma vaai maulalo ai i isi. Po o le taumafai foʻi e faia ni faamolemolega, e ʻalofia ai le faia o mea e tatau ona tatou faia. Po o le ā lava le māfuaaga, o le faamaualuga, matauʻa, po o le lē mautonu, e na o iʻuga leaga lava e oo i ai.

⁷ Atonu e tatou te manatu e saʻo lo tatou faitioina o se isi. O se faaaʻoaʻoga, atonu ua tigā o tatou loto ona o le lē pulea o le tautala a lenā tagata. Afai o le tulaga lenā, o le fetuiaʻi e lē foʻia ai. O le faia faapea e na o le faaopoopo ai o fafie i le afi, ma ua e gaoioi ai e tusa ma le manaʻo o le Tiapolo, ae e lē o le finagalo o le Atua. (2 Timo. 2:26) Nai lo o lea, e tatau ona tatou faataʻitaʻi iā Iesu. Ina ua upuleagaina o ia, “e leʻi toe fai atu e ia ni upu leaga,” ae “na ia tuuina atu pea o ia lava i lē e faamasinotonu.” (1 Pete. 2:21-23) Sa mautinoa e Iesu, o le a taulima e Ieova mea i lana lava auala ma lana taimi atofaina. E tatau ona faapena lo tatou faatuatuaina o le Atua. Pe a tatou faia faamatalaga agalelei ma faalaeiauina ai isi, o le a fesoasoani ai e faatumauina le filemu ma le autasi i le faapotopotoga.—Faitau le Efeso 4:1-3.

SOSOLA ESE MAI LE MAILEI O LE FEFE MA OMIGA MAI I AUMEA

8, 9. Aiseā na faasalaina ai e Pilato Iesu?

⁸ Pe a mau se manu i se matāsele, e lē mafai ona ia toe pulea ana gaoioiga. I se tulaga talitutusa, o se tasi ua lolo atu i le fefe ma omiga mai aumea, ua ia faataga isi e puleaina isi meafai i lona olaga. (Faitau le Faataoto 29:25.) O lea, seʻi o tatou iloiloina faaaʻoaʻoga a ni tamāloloa se toʻalua na fefefe i omiga mai i isi, ma vaai po o le ā e tatou te aʻoaʻoina mai mea na tutupu iā i laʻua.

⁹ Na iloa e le Kovana o Roma o Ponotio Pilato o Iesu o se tagata e lē sala, ma e leʻi manaʻo o ia e oo se mea leaga iā Iesu. Na faapea atu Pilato e faatatau iā Iesu, “e leai se mea ua faia e ia ua tatau ai ona oti.” E ui i lea, na faasala e Pilato Iesu i le oti. Aiseā? Ona sa ia lolo atu i omiga mai i tagata. (Luka 23:15, 21-25) Na latou faamalosia Pilato e fai le mea na latou mananaʻo ai, e ala i le alalaga atu e faapea, “afai e te faasaʻolotoina lenei tagata, e lē o oe o se uō a Kaisara.” (Ioa. 19:12) Na ono popole Pilato neʻi leiloa lona tulaga po o lona ola foʻi, pe a ia lagolagoina le itu a Keriso. O lea, na ia lolo atu ma faia le mea na manaʻo ai le Tiapolo.

10. O le ā le māfuaaga na faafitia ai e Peteru Iesu?

¹⁰ O le aposetolo o Peteru o se tasi o aumea vavalalata a Iesu. Na ia faailoa atu i le lautele o Iesu o le Mesia. (Mata. 16:16) Na tumau faamaoni pea Peteru, e ui na tuua e isi soo Iesu ona o le lē malamalama i Ana fetalaiga. (Ioa. 6:66-69) E lē gata i lea, ina ua ō mai fili e puʻe Iesu, na faaaogā e Peteru le pelu e puipuia ai lona Matai. (Ioa. 18:10, 11) Ae mulimuli ane, na ia faafitia Iesu ona o le fefe i tagata. I se taimi puupuu lava, na puʻea faamanu i ofaga ai le aposetolo i le mailei o le fefe i tagata, ma taofia ai o ia mai le faia o se gaoioiga lototele.—Mata. 26:74, 75.

11. O ā omiga e tatou te ono fesagaʻia?

¹¹ E tatau i Kerisiano uma ona teena omiga o le faia o mea e inosia e Ieova. E uunaʻia i tatou e isi ia lē faamaoni, po o le faia foʻi o amioga lē mamā. E feagai le fanau aʻoga ma uunaʻiga mai isi tamaiti ina ia kopi i taimi o suʻega, matamata i ata o faiga matagā tau feusuaʻiga, ulaula, faaaogā fualaau faasāina, inuina o le ʻava malosi, po o le faia foʻi o amioga lē mamā. O lea, o le ā e fesoasoani iā i tatou e ʻalofia le mailei o le fefe i tagata, ma omiga o le faia o mea e inosia e Ieova?

12. Aiseā na lolo atu ai Pilato ma Peteru i le fefe ma omiga mai tagata?

¹² O lea, seʻi o tatou vaai pe aiseā na lolo atu ai Pilato ma Peteru i le fefe ma omiga mai tagata. E ui sa itiiti le iloa o Pilato e faatatau iā Iesu, ae na ia iloa o Iesu o se tagata e lē sala, ma e lē o ia foʻi o se tagata faatauvaa. Peitaʻi e leʻi lotomaulalo ma alofa Pilato i le Atua moni. Na faigofie ona puʻeolaina o ia e le Tiapolo. Na iā Peteru le poto saʻo ma le alofa i le Atua. Ae na iai taimi, e leʻi faamaulalo ai, ma iloa mea e gata mai ai lona mafai, sa fefe, ma lolo atu i omiga. Ina ua latalata ina puʻea Iesu, na faapea mai Peteru: “E tusa pe e tuua oe e i latou uma, ae ou te lē tuua lava oe.” (Mare. 14:29) Pe ana faatuatua Peteru i le Atua e pei o le faisalamo, semanū e lava saunia o ia mo tofotofoga na ia fesagaʻia mulimuli ane. Sa pese le faisalamo e faapea: “O loo ʻau Ieova ma aʻu; ou te lē fefe lava. O le ā se mea e mafai ona faia e tagata iā te aʻu?” (Sala. 118:6) I le pō mulimuli o le soifuaga o Iesu i le lalolagi, na ia ave ai Peteru ma isi aposetolo e toʻalua i le faatoʻaga o Ketesemane. Nai lo o le mataala, na tautulemomoe pea Peteru ma isi aposetolo. Na fafagu e Iesu i latou ma faapea atu: “Ia faaauau ona outou mataala ma tatalo, ina neʻi outou lolo atu i faaosoosoga.” (Mare. 14:38) Peitaʻi, na toe moe Peteru, ma mulimuli ane lolo atu i le fefe ma omiga mai tagata.

13. E faapefea ona tatou teena omiga e faia se mea sesē?

¹³ E tatou te aʻoaʻoina mai se isi lesona tāua mai le faaaʻoaʻoga a Pilato ma Peteru: E fesoasoani le iai o le poto saʻo, lotomaulalo, faamaulalo, alofa i le Atua, ma le mataʻu iā Ieova nai lo o tagata, i le teenaina o omiga. A faavae lo tatou faatuatua i le poto saʻo, o le a tatou lototetele ai e tautatala atu ma le maumauaʻi e faatatau i o tatou talitonuga. E fesoasoani lenā e teena ai omiga ma faatoʻilaloina ai le fefe i tagata. Peitaʻi, e lē tatau ona tatou mautinoa naʻuā. Nai lo o lea, e tatau ona tatou lotomaulalo ma malamalama, e tatou te manaʻomia le mana o le Atua e teena ai omiga. Ia tatou tatalo mo le agaga paia, ma ia uunaʻia i tatou e le alofa mo Ieova, ina ia faasilisilia ai lona suafa ma ana tapulaa. E lē gata i lea, a o leʻi feagai ma tofotofoga e tatau ona tatou nofosauni. O se faataʻitaʻiga, o le muaʻi sauniuni ma le tatalo, e mafai ona fesoasoani i a tatou fanau ina ia tali atu ma le uigā, pe a uunaʻia i latou e isi tamaiti i le aʻoga e faia se mea sesē.—2 Kori. 13:7.a

ʻALOFIA LE MAILEI E NUTIPALA AI

14. O le ā o loo taumafai Satani e faatalitonuina ai i tatou?

¹⁴ O le isi ituaiga o mailei, o le faatautau lea o se ogālaau telē po o se maa mamafa i le auala e masani ona uia e se manu. E lāvea le manu i le uaea o loo nonoa i le maa po o le ogālaau, ona paʻū ifo lea o le maa po o le ogālaau i luga o le manu. O lagona nofosala naʻuā, e mafai ona avea ma avega mamafatū e mafatia ai. Pe a mafaufau i se mea sesē sa faia i le taimi ua teʻa, e ono oo ai iā i tatou le lagona nutimomoia. (Faitau le Salamo 38:3-5, 8.) E taumafai Satani e faatalitonu i tatou, e lē mafai ona tatou maua le alofa mutimutivale o Ieova, ma ua lē mafai foʻi ona tatou ausia ana tapulaa.

15, 16. E faapefea ona ʻalofia le mailei o le lolo atu i faalogona o le nofosala naʻuā?

¹⁵ E faapefea ona ʻalofia le mailei e nutipalaina ai? Pe afai ua e faia se agasala matuiā, ia gaoioi nei loa e toe faaleleia le lua faiā ma Ieova. Ia faafesootaʻi toeaina ma talosaga mo se fesoasoani. (Iako. 5:14-16) Ia fai le mea e te mafaia e toe faasaʻo ai lau mea sesē. (2 Kori. 7:11) Pe a maua ni faasaʻoga, aua le lotovaivai ai. O faasaʻoga, o se faailoga o le alofa o Ieova iā te oe. (Epe. 12:6) Ia maumauaʻi ma galue malosi e aua neʻi toe faia gaoioiga na māfua ai ona e faia le agasala. Ina ua e salamō ma e liliuese mai, ia faatuatua i le taulaga togiola a Iesu e mafai ona faamagaloina au agasala.—1 Ioa. 4:9, 14.

¹⁶ E faaauau pea ona iai faalogona nofosala i nisi, e ui ua faamagaloina a latou agasala. Pe afai o lou tulaga lenā, ia manatua na faamagaloina e Ieova Peteru ma isi aposetolo, ona o lo latou tuua o Lona Atalii pele i le taimi na ia matuā manaʻomia ai i latou. Na faamagalo foʻi e Ieova le tamāloa na faateʻaina ma le faapotopotoga, ona o amioga lē mamā tau feusuaʻiga matagā, ina ua salamō. (1 Kori. 5:1-5; 2 Kori. 2:6-8) O loo taʻua i le Tusi Paia na faamagalo e le Atua ē na faia agasala matuiā ina ua salamō.—2 No. 33:2, 10-13; 1 Kori. 6:9-11.

17. O le ā e mafai ona faia e le togiola?

¹⁷ O le a faamagalo ma faagalo e Ieova au agasala na faia i le taimi ua teʻa, pe afai e te salamō moni ma talia lona alofa mutimutivale. Aua neʻi e mafaufau e lē mafai e le taulaga togiola a Iesu ona faamagaloina au agasala. O le faia faapea e iʻu ai i le puʻeolaina o oe i le mailei a Satani. E taumafai Satani e faatalitonu oe, e lē mafai e le togiola ona magalo ai au agasala. Peitaʻi o le taulaga togiola e mafai ona faamagaloina ai agasala a i latou ua salamō. (Faata. 24:16) O le faatuatua i le togiola e mafai ona aveesea ai mai iā i tatou le avega mamafa o le nofosala naʻuā. E maua ai foʻi le malosi e tatou te auauna ai i le Atua ma o tatou lotoatoa, mafaufau ma le ola atoa.—Mata. 22:37.

E TATOU TE LĒ VĀLEA I TOGAFITI A SATANI

18. E faapefea ona ʻalofia mailei a le Tiapolo?

¹⁸ E lē popole Satani po o lē fea mailei e puʻea ai i tatou, o le mea e tāua iā te ia o le puʻeina o i tatou. E mafai ona ʻalofia le faasesēina o i tatou, ona e tatou te mataalia i mailei a Satani. (2 Kori. 2:10, 11) E lē mafai ona puʻea i tatou i ana matāsele, po o mailei, pe afai e tatou te tatalo mo le atamai e feagai ai ma tofotofoga. Na tusi Iakopo: “Pe afai ua leai se atamai i se tasi o outou, inā ōle atu pea ia i le Atua, auā o ia na te foaʻi tele mai ma le lē toe taʻutaʻua, ona foaʻiina mai lea iā te ia.” (Iako. 1:5) E manaʻomia ona tatou gaoioi e ōgatusa ma a tatou tatalo, e ala i le faia e lē aunoa o suʻesuʻega totino ma faatatau i o tatou olaga le Afioga a le Atua. Ua saunia e le pologa faamaoni lomiga e fesoasoani ina ia malamalama ai i mailei a Satani, ma fesoasoani ai iā i tatou e ʻalofia na mailei.

19, 20. Aiseā e tatau ai ona tatou ʻinoʻino i le leaga?

¹⁹ O le tatalo ma le suʻesuʻeina o le Tusi Paia, ua fesoasoani iā i tatou ina ia naunau i le faia o mea lelei. Peitaʻi, e tāua foʻi ona tatou atiaʻe le ʻinoʻino i le leaga. (Sala. 97:10) E mafai ona tatou ʻalofia le tuliloaina o faanaunauga manatu faapito, e ala i le manatunatu loloto i ona iʻuga. (Iako. 1:14, 15) Pe a aʻoaʻoina i tatou ina ia ʻinoʻino i le leaga, ae matuā naunau i le faia o mea lelei, o le a lē mafai ai e maunu a Satani ona faatosina i tatou.

²⁰ Maʻeu lo tatou lotofaafetai ona o le fesoasoani a Ieova, ua lē mafai ai ona faasesēina i tatou e Satani. Ua laveaʻia i tatou e Ieova “mai i lē o loo leaga,” e ala i Lona agaga, o lana Afioga ma le faalapotopotoga. (Mata. 6:13) I le mataupu o loo sosoo mai, o le a tatou aʻoaʻoina ai pe faapefea ona ʻalofia isi mailei e lua a le Tiapolo, lea ua taulau manuia ai i le puʻeolaina o auauna a le Atua.

[Faaopoopoga i lalo]

[Ata i le itulau 21]

O le lē pulea o le tautala e mafai ona faapogaia ai faafitauli i le faapotopotoga

[Ata i le itulau 24]

E mafai ona aveesea le avega mamafa o faalogona nofosala naʻuā