Na Faapefea Ona Tatou Iai i Lenei Tulaga?

O loo faamatalaina mai i le tusi muamua o le Tusi Paia le tusi o Kenese, le foafoaina o mea uma: “Na foafoaina e le Atua le lagi ma le lalolagi i le amataga.” (Kenese 1:1) Ina ua māeʻa ona faia e le Atua o laau ma meaola, ona ia foafoaina lea o le uluaʻi ulugalii o Atamu ma Eva. E ese i laʻua mai i meaola, auā e mafai ona laʻua faaatagia uiga o le Atua, e aofia ai le saʻolotoga e filifili ai. O lea, e la te selesele lava i āuga o a laʻua gaoioiga. Pe ana la usitaʻia faatonuga a le Atua, semanū e iai sa la vaega i le fuafuaga a le Atua i le avea ma uluaʻi mātua, e olioli i se olaga filemu ma lelei atoatoa i le lalolagi e faavavau.

Peitaʻi, na maua e se tasi o agelu le avanoa e faasesēina ai tagata, ma faataunuu ai ona faanaunauga manatu faapito. Na avea o ia ma Satani po o “Lē e tetee.” Na ia tautala atu e ala i se gata ma faasesēina ai Eva e faapea, e na te lē manaʻomia le taʻitaʻiga a le Atua. Na motusia le faiā a Atamu ma Eva ma le Atua, ona ua la usiusitaʻi iā Satani. O le sesē o le filifiliga na la faia, na la melea ai le ola e faavavau ma tuufaasolo mai ai iā i tatou le agasala, le tulaga lē lelei atoatoa faapea le oti.

E leʻi umi ae folafola mai e le Atua o le a ia toe faaleleia lea tulaga, ma saunia mai se auala e toe maua ai e i latou na tupuga mai iā Atamu le ola e faavavau. Na valoia e le Atua o le a iai le “fanau”—se tagata faapitoa—o le a faaumatia aʻiaʻi Satani, ma tafiesea mafatiaga ua faapogaia e Satani, Atamu ma Eva. (Kenese 3:15) O ai o loo faasino atu i ai lenā “fanau”? O le a iloa mulimuli ane le tali o lenā fesili.

Na taumafai pea Satani e taofia le faataunuuina e le Atua o lana fuafuaga. Na sosolo pei se afi le agasala ma le amioleaga. O lea na filifili ai loa le Atua e aumaia se lolo e faaumatia ai i latou. Na ia faatonuina le tagata amiotonu o Noa ina ia fausia se vaa e faasaoina ai o ia ma lona aiga, faatasi ai ma manu sa faatonuina e ave i le vaa.

Ina ua mavae le tausaga talu le Lolo, ona ulufafo ai lea o Noa ma lona aiga mai le vaa ma ō atu i se lalolagi ua faamamāina. Peitaʻi, e leʻi aliaʻe mai lava le “fanau”.

​—Faavae mai le Kenese mataupu 1-11; Iuta 6, 14, 15; Faaaliga 12:9.