“Ua Ma Maua le Mesia”!

Pe tusa ma le 400 tausaga mulimuli ane talu ona māeʻa ona tusia le tusi mulimuli o Tusitusiga Eperu, ae faataunuuina le valoaga a Mika e faatatau i le Mesia: Na fanau Iesu i Peteleema. Pe ā ma le 30 tausaga mulimuli ane i le 29 T.A., ae faataunuuina le vaega muamua o le valoaga a Tanielu e faatatau i le afio mai o le Mesia. Na papatisoina Iesu ma na faauuina o ia e le Atua i le agaga paia. O lea, na taunuu lava le valoaga e faatatau i le Mesia po o le Fanau.

I lenā lava taimi, na amata ai loa le faiva a Iesu i le ʻfolafolaina atu lea o le tala lelei o le malo o le Atua.’ (Luka 8:1) E pei lava ona valoia, o Iesu o sē e agalelei, agamalu ma naunau moni lava i isi. Na pāʻia loto o tagata i le auala alofa na ia aʻoaʻo atu ai, ma na ia faamālōlōina tagata sa aafia i “faamaʻi eseese uma,” e faaalia ai sa faatasi Ieova ma ia. (Mataio 4:23) O le mea mautinoa ina ua lolofi atu tagata iā Iesu, na latou talitonu ua latou maua le Mesia.​—Ioane 1:41.

Na valoia e Iesu a o leʻi oo i le taimi e pule atoatoa ai lona Malo, o le a iai taua, mafuiʻe ma le tele o isi faigatā i le lalolagi. O lea na ia timaʻi mai ai ina “ia faaauau ona mataala.”​—Mareko 13:37.

O Iesu o se tagata e lelei atoatoa ma na ia tumau ma le faamaoni i le Atua. Peitaʻi na fasiotia o ia e ona fili. O lea, o le maliu o Iesu ua avea lea ma taulaga lelei atoatoa e toe maua mai ai le ola e faavavau lea na melea iā Atamu ma Eva.

O le maliu foʻi o Iesu ua faataunuuina ai valoaga, e pei o le toe faatūina e le Atua o Iesu i le tolu aso mulimuli ane ai o se foafoaga agaga e malosi. Ona faaali lea o Iesu i ona soo e silia ma le 500. A o leʻi afio o ia i le lagi, na ia poloaʻia ai ona soo ina ia folafola atu le tala lelei e faatatau iā te ia ma lona Malo i “tagata o nuu uma lava.” (Mataio 28:19) Na faapefea ona latou faia ma le māeʻaeʻa lenei galuega?

​—Faavae mai i le Mataio, Mareko, Luka, Ioane, 1 Korinito.