Pe e Tatau Ona Tatou Fefefe iā Satani?

E pei ona lē vaaia le kaponi monookesaita, e faapena foʻi ona lē vaaia Satani, ma e mataʻutia tele. Peitaʻi, e lē o tuulafoaʻia i tatou e le Atua. E te lē fefe iā Satani pe afai e te faaaogā sauniuniga ua saunia mai e le Atua.

Le malosi e filifili ai. Ua faapea mai le Iakopo 4:7: “Ia tetee atu i le Tiapolo, ona sola ese ai lea o ia mai iā te outou.” E ui lava e malosi Satani, ae e lē mafai ona ia faamalosia oe e faia mea e te lē manaʻo e fai. E fai lava lau filifiliga. Ua taʻua i le 1 Peteru 5:9: “A ia outou tutumau e tetee atu iā te ia [le Tiapolo], ma ia mausalī lo outou faatuatua.” Ia manatua, na alu ese Satani ina ua teena e Iesu ana faaosoosoga e tolu. (Mataio 4:11) E mafai foʻi la ona e filifili e teena taumafaiga a Satani.

Faauōga ma le Atua. Ua faalaeiau i tatou e le Iakopo 4:8 ia “mafuta vavalalata atu i le Atua.” Ua valaaulia i tatou e Ieova ia atiaʻe se faauōga vavalalata ma ia. E faapefea ona e atiaʻe lenā faauōga? O le auala sili e amata ai, o le suʻesuʻe i le Tusi Paia e faatatau iā te ia. (Ioane 17:3) O mea e te aʻoaʻoina e faatatau iā Ieova o le a uunaʻia ai oe e alofa atu iā te ia ma faia lona finagalo. (1 Ioane 5:3) E faapefea ona tali mai lou Tamā i le lagi, a o e mafuta vavalalata atu iā te ia? Ua faapea mai le Iakopo: “Ona mafuta vavalalata mai lea o [Ieova] iā te outou.”

Ua folafola mai se puipuiga. Ua taʻua i le Faataoto 18:10: “O le suafa o Ieova o le ʻolo malosi lea. E sola atu i ai o lē e amiotonu ma maua ai le puipuiga.” E lē tatau ona manatu i le suafa o le Atua o se tapui e puipuia ai. Nai lo lea, o i latou e faatuatua moni i le suafa o Ieova, e mafai ona valaau atu iā te ia mo se puipuiga i so o se taimi.

O se faaaʻoaʻoga mai i le Tusi Paia. Ua taʻu mai i le Galuega 19:19 nisi o faamatalaga e uiga iā i latou na avea ma Kerisiano i Efeso: “E toʻatele i latou o ē na faia faiga faaagaga, ua faaputuputu faatasi a latou tusi, ma susunu ai i le afi i luma o tagata uma. Ua latou faitauina foʻi le tau ma iloa ai, e tusa ma le lima sefulu afe tupe siliva.”a Na susunu e Kerisiano so o se mea e fesootaʻi atu i faiga faaagaga e tusa lava po o le ā le taugatā. Maʻeu le lelei o lenā faaaʻoaʻoga mo i tatou. Ua taatele i le lalolagi faiga faataulāitu ma faiga faaagaga. E oo lava i mea e foliga mai e lelei ae e fesootaʻi atu i faiga faaagaga, e mafai lava ona aafia ai i tatou i temoni. E tāua tele le lafoaʻia o na mea e tusa lava pe taugatā.​—Teuteronome 18:10-12.

E 50 tausaga e leʻi talitonu ai Rogelio lea na taʻua i le uluaʻi mataupu o lenei lomiga, e iai se Tiapolo. Peitaʻi na ia toe iloilo ona manatu. Aiseā? Na ia faapea mai: “O le taimi muamua lea i loʻu olaga ua maua ai saʻu Tusi Paia. O le aʻoaʻoga mai i le Tusi Paia na ou talitonu ai e iai moni le Tiapolo. O lenā aʻoaʻoga ua puipuia ai aʻu mai i le aafia i ana mailei.”

Pe e te moomoo i se aso o le a lē toe iai Satani? Ioe. Ua taʻu mai i le Tusi Paia, e iai se taimi i le lumanaʻi o le a lafo ai i le “lepa afi ma le teiō” le Tiapolo, o lē o loo faasesēina le toʻatele. (Faaaliga 20:10) O le mea moni e lē mafai ona faaumatia se foafoaga agaga i le afi ma le teiō. O lea, o le afi ua faaata mai ai le faaumatiaga e faavavau. O le a lē toe iai Satani e faavavau. Maʻeu se taimi fiafia mo tagata e alolofa i le Atua!

Ia faaauau ona e suʻesuʻeina mea uma e faatatau iā Ieova ma ona ala i le taimi lenei.b Maʻeu le matagofie pe a mafaufau i se taimi o le a mafai ona tatou faapea atu ai: “Ua leai se Satani!”