Fesili Mai le ʻAufaitau

Ina ua taʻu atu e Satani iā Eva e lē oti pe a ʻai i le fua o le laau e iloa ai le lelei ma le leaga, pe na ia faailoa atu iā Eva le aʻoaʻoga ua taatele i aso nei, e faatatau i le ola pea o le agaga pe a oti le tagata?

E foliga mai e leai. E leʻi faapea atu le Tiapolo iā Eva, pe a ʻai i le fua o le laau e iloa ai le lelei ma le leaga, o le a oti lona tino ae e faaauau ona ola pea lona agaga i se isi nofoaga. E ala i se gata, na taʻu atu e Satani iā Eva pe a ʻai i le fua o le laau, o le a ʻlē oti o ia.’ Na uiga atu Satani, o le a faaauau pea ona ola Eva ma ia maua se olaga fiafia i le lalolagi, o se olaga e tutoʻatasi mai i le Atua.​—Kene. 2:17; 3:3-5.

Pe afai e leʻi amataina i Etena le aʻoaʻoga sesē lea ua aʻoaʻoina i aso nei, e faatatau i le ola pea o le agaga pe a oti le tagata, o anafea la na amata ai? E tatou te lē o mautinoa. Ae ua tatou mautinoa, na tafiesea lotu sesē uma i le Lolo i aso o Noa. E leʻi toe iai la nisi na sao mai i le Lolo e aʻoaʻoina aʻoaʻoga sesē, ona e na o Noa ma lona aiga na faasaoina, o tagata o le tapuaʻiga moni.

O lea, o le aʻoaʻoga o le ola pea o le agaga pe a oti i aso nei, atonu na amata ina ua uma le Lolo. Ina ua faafenuminumiaʻi e le Atua gagana i Papelu, ma faataapeapeina ai tagata “i le lalolagi atoa,” e mautinoa na latou ō ma aʻoaʻo atu le aʻoaʻoga, e iai se vaega o le tagata e ola pea pe a oti. (Kene. 11:8, 9) E tusa pe tatou te lē o mautinoa po o anafea na amata ai lenei aʻoaʻoga sesē, ae ua tatou mautinoa na māfua lenei aʻoaʻoga mai iā Satani le Tiapolo “le tamā o le pepelo,” ma o loo matuā fiafia i le vaai atu i le taatele o lenei aʻoaʻoga.​—Ioa. 8:44.