Tala o Mea na Tutupu Mai i le Tusi Tausaga 2011

ESTONIA

Itulau 215, palakalafa 1-2

TOE FESOOTAʻI MA LE “TINĀ”

E ui ina faigatā fesootaʻiga ma tagata i atunuu na pulea e faiga malo faa-komunisi, ae e leʻi mafai ai ona taofia le susulu atu o le malamalama o upu moni o le Tusi Paia. O le tele o tausaga, sa faaaogā ai e uso lomiga tuai. Peitaʻi, a o faaaunuua i Siberia, sa mafai ai e Molimau Estonia ona feiloaʻi atu i uso mai i isi vaega o le Soviet Union. Ina ua toe foʻi atu i Estonia, sa faaauau ai pea ona maua se sootaga ma nei uso mai i le Soviet Union, ma toe maua ai meaʻai fou faaleagaga mai i lea taimi i lea taimi. Mo se faataʻitaʻiga, na amata mai i le 1956, na latou faafesootaʻia ai Ivan Dziabko ma isi mai i Ukraine, ma na maua ai lomiga mai iā i latou. Peitaʻi, o na ituaiga fesootaʻiga e leʻi faigofie ma e faatapulaa foʻi lomiga na maua mai ai. Sa iai se isi mea na manaʻomia, ma e leʻi umi ae faamanuia loa e Ieova taumafaiga maelega a uso.

I le taʻitaʻiga a le Vaega Pule, na saunia ai e le lālā i Finilani ni fuafuaga e fesoasoani ai i o latou uso i Estonia i se auala maopoopo. O Vilho Eloranta, o lē na galue o se paeonia i Estonia i vaitausaga o le 1930, na tofia e faafesootaʻia uso i inā. I lana uluaʻi malaga i Estonia i le amatamataga o le vaitausaga o le 1960, na mafai ona ia faafesootaʻia ia Fanny Hietala. Ina ua mavae lenā, e toʻatele uso Finilani ua faafoliga atu o ni turisi, ma ua avea ma auala e maua ai lomiga ma fesootaʻiga. Na iʻu ina maua ai e uso i Estonia fesootaʻiga ma le “Tinā,” e pei ona latou faaigoa muamua ai le faalapotopotoga a Molimau a Ieova. Sa mafai ona latou auina mai lipoti o le auaunaga, ma maua foʻi lomiga e ala i tamaʻi mea puʻeata (microfilm). Peitaʻi, o lenei faatulagaga e matuā faia ma le faaeteete ma le faautauta, pe e na o le faalua i le faatolu i le tausaga ona faia nei fesootaʻiga.

Itulau 221, palakalafa e 3 e oo i le itulau 222, palakalafa e 5

O SE ASIASIGA I LE PAKA NA FAALAEIAUINA AI

Na fai e le Vaega Pule le fuafuaga mo se tasi o o latou sui, o Lloyd Barry faatasi ai ma Viv Mouritz mai i le lālā i Finilani e feiloaʻi ma Adolf Kose o lē na faamaopoopoina le galuega i Estonia. Na latou feiloaʻi i le paka o Leningrad (lea ua faaigoa nei iā St. Petersburg).

Na taʻua e le Uso o Mouritz e uiga i lenei feiloaʻiga faalilolilo: “I le taimi muamua, sa faatalatū le uso o Kose e tautala atu i la latou fono faalilolilo, ma sa taumafai e pupuni ona foliga i se nusipepa. A o faaauau le talanoaga, ua amata ona tuu ifo i lalo le nusipepa ma talanoa lelei mai Adolf.”

Na taʻua e le uso o Barry e faapea: “Na teena e le uso le valaaulia e matou te faitaumafataga faatasi, ma na faapea mai o ia, e sili ona talanoa mataupu e manaʻomia ona taatia ai lea faapea.”

Ina ua faaali atu e Adolf lona manatu mamafa i sauāga ogaoga ma faasāsāga i Molimau i le Soviet Union, sa avatu e le uso o Moritz ma Barry le tele o manatu e faalaeiauina ai. Na la faapea atu, “O loo tele foʻi tofotofoga i isi atunuu. E foliga mai e faigofie, ae sili atu ona mataʻutia! E sili atu ona tele tofotofoga e oo iā i matou nai lo o le atunuu o Kose, ma e toʻatele ua tuua le upu moni i atunuu e lē o faasāina ai le galuega talaʻi.”

Na talafeagai lelei le taimi o le asiasiga, ma na faamalosia faaleagaga ai le uso o Kose. Na faatoʻā iloa mulimuli ane e le uso o lea sa ia talanoa i se sui o le Vaega Pule, ma na fiafia o ia e faamatala atu nei faalaeiauga mai i le faapotopotoga a Ieova, i tagata uma o loo tumau pea ona faamaoni i lalo o pulega sauā.

Na tusi mulimuli ane le uso o Barry, “E matou te alolofa tele i o matou uso o loo pulea e le Soviet Union. O se fiafiaga le feiloaʻi i le uso o Kose, ma e manatua pea lana faatalofa ma lana fusi mulimuli a o matou faamavae, ma o se faamavaega talafeagai lea mo se feiloaʻiga fiafia.”