Ia Faaaʻoaʻo i le ʻAuperofeta—Sefanaia
1. O le ā le tulaga o le malo o Iuta i le taimi na avea ai Sefanaia ma perofeta, ma e faapefea ona tatou faaaʻoaʻo i lenei perofeta?
1 I le ogatotonu o le senituri lona 7 T.L.M., na taatele ai le tapuaʻiga faa-Paala i Iuta. Ua tagatavaleina le tupu leaga o Amone ae avea lona atalii talavou o Iosia ma Tupu. (2 Nofo. 33:21–34:1) I lenā taimi, na faatulaʻi ai loa e Ieova Sefanaia e faailoa atu lana feʻau faafaamasinoga. E ui lava o Sefanaia o se sui o le aigātupu, ae na te leʻi taofia le faailoaina atu o le feʻau mai iā Ieova e faatatau i mea leaga na faia e le malo o Iuta. (Sefa. 1:1; 3:1-4) I se tulaga tutusa, e tatou te fia faaaʻoaʻo i le lototele o Sefanaia ma ia lē faatagaina o tatou sootaga faaleaiga, e taofia ai le faia o le mea saʻo e ōgatusa ma le tapuaʻiga iā Ieova. (Mata. 10:34-37) O le ā le feʻau na faailoa atu e Sefanaia, ma o le ā na iʻu i ai?
2. O ā gaoioiga e ao ona tatou faia ina ia sao mai ai i le aso o le toʻasā o Ieova?
2 Ia Saʻili iā Ieova: E na o Ieova e mafai ona ia faasaoina i tatou taʻitoʻatasi mai i le aso o lona toʻasā. O le mea lea, na pulunaunauina ai e Sefanaia tagata o Iuta e saʻili atu iā Ieova, ia saʻili lana amiotonu, ia saʻili le agamalu a o maua pea le taimi. (Sefa. 2:2, 3) E faapena foʻi o tatou aso. I le pei o Sefanaia, e tatou te saʻili atu iā Ieova ma faalaeiau foʻi isi tagata ia faia faapea, ma maumauaʻi e aua nei liliu ese mai i le ʻmulimuli atu iā Ieova.’ (Sefa. 1:6) E tatou te saʻili pea iā Ieova e ala i le suʻesuʻeina o lana Afioga ma tatalo mo lana taʻitaʻiga. E tatou te saʻili le amiotonu e ala i le ola i se olaga mamā. E tatou te saʻili le agamalu e ala i le atiaʻe o le uiga gauaʻi, ma nofosauni e usitaʻia taʻiala mai i le faalapotopotoga a Ieova.
3. Aiseā e tāua ai le faatumauina pea o se vaaiga saʻo i le faiva?
3 Iʻuga Lelei: Na iai nisi o tagata i Iuta na talilelei mai i le feʻau faafaamasinoga lea na faailoa atu e Sefanaia, e aofia ai Iosia o se talavou na saʻili iā Ieova mai lava i lona laʻitiiti. Na mulimuli ane lepetia e Iosia mea na faaaogā i ifogatupua uma na iai i Iuta. (2 Nofo. 34:2-5) I aso nei, e iai nisi fatu o le Malo e lūlūina i tafatafa o le auala, o nisi i le mea papa, o nisi i le vaotuitui, ae o nisi foʻi fatu na lūlūina i le eleele lelei ma fua mai. (Mata. 13:18-23) E mautinoa le faaauau o le fesoasoani a Ieova iā tatou taumafaiga, pe a tatou pisi pea e faasalalau atu fatu o le Malo.—Sala. 126:6.
4. Aiseā e ao ai ona ʻtatou faatalitali pea iā Ieova’?
4 O nisi i Iuta na manatu e lē taitai oo mai le toʻasā o Ieova. Peitaʻi, na faamautinoa atu e Ieova iā i latou ua latalata mai lona aso tele. (Sefa. 1:12, 14) E na o i latou e sulufaʻi atu iā te ia e faasaoina. (Sefa. 3:12, 17) ʻA o tatou faatalitali atu pea iā Ieova’, seʻi o tatou olioli i le galulue ma le autasi ma isi uso tapuaʻi.—Sefa. 3:8, 9.