Faaleleia o o Tatou Tomai i le Faiva—Toleni Tagata Aʻoga ia Atiaʻe ni Masaniga Lelei i le Faia o Suʻesuʻega Loloto

Māfuaaga e Tāua Ai: Ina ia matua faaleagaga se tagata aʻoga o le Tusi Paia, e lē tatau ona fafagaina lona mafaufau ma lona loto e tau lava o aʻoaʻoga faavae o le Afioga a le Atua. (Epe. 5:12–6:1) O le faia o suʻesuʻega loloto e manaʻomia ai ni taumafaiga. E aofia ai le faafesootaʻi o ni manatu fou ua tatou aʻoaʻoina i manatu ua leva ona tatou iloa, ma ia iloa le aogā. (Faata. 2:1-6) O le iloaina o le auala e faia ai suʻesuʻega loloto, e mafai ai e se tagata aʻoga ona tali ni fesili faale-Tusi Paia e faaaogā ai a tatou lomiga. O a latou taumafaiga maumauaʻi e faatatau mea ua latou aʻoaʻoina, o le a faaauupegaina ai i latou e tumau e tusa po o ā faigatā e latou te fesagaʻia o ni Kerisiano.—Luka 6:47, 48.

Le Auala e Fai Ai:

Ia faamatilatila atu le tāua o le saʻili mo le fesoasoani a Ieova e ala i le tatalo a o leʻi faia ana suʻesuʻega.—Ioa. 14:26; 1 Kori. 2:10.
Faalaeiau lau tagata aʻoga mai lava i le amataga, ina ia sauni muamua a o leʻi faia lana suʻesuʻega faale-Tusi Paia. Ia faaali atu lau kopi o le lomiga o loo oulua suʻesuʻeina, ma faasino i ai le auala e vase ai na o upu po o fuaitau tāua.
Ia fai i lau tagata aʻoga e tali mai i ana lava upu. ʻAlofia le fai faafesili ma tali o le suʻesuʻega, ma iʻu ai i le tau ina faitau saʻo mai e le tagata le tali mai i le tusi.
Faalaeiau lau tagata aʻoga e faitau se vaega o le Tusi Paia i aso taʻitasi. Faasino i ai le faasologa mo le faitauina o le Tusi Paia o loo i le jw.org po o Le Olomatamata Aokuso 1, 2009, itulau 15-18, lea o loo faaalia mai ai se auala aogā e faitau ai le Tusi Paia. O le atiaʻe o le masaniga e faitau le Tusi Paia i aso taʻitasi e manaʻomia ai ni taumafaiga maumauaʻi, ae o le a matuā tauia na taumafaiga.—Sala. 1:2, 3.
Faasino i lau tagata aʻoga le auala e faaaogā ai le Watchtower Library po o le Lomiga Faale-Tusi Paia I LE INITANETI, ina ia maua ai tali mo fesili faale-Tusi Paia. Fesoasoani iā te ia, ia iloa le faapuupuuga o igoa o lomiga ia e masani ona faaaogā i sauniga.

Faataʻitaʻi a o Faagasolo le Masina:

Pe a māeʻa ona talanoa ni palakalafa i lalo o se tamaʻi ulutala, pe i se mataupu foʻi, ia fai i lau tagata aʻoga e autalu mai i ni nai fuaiupu manatu ua ia aʻoaʻoina. Pe afai e leai sau tagata aʻoga, ia faataʻitaʻi ona e autaluina i ni nai fuaiupu se vaega o se mau po o se palakalafa o Le Olomatamata, ina ia faaleleia atili ai lou malamalama i mea o loo e faitauina.