Le Auala ua Faailoa Mai ai Folafolaga Alofa a Lē na Foafoaina i Tatou

Talu mai le foafoaina o tagata, na fesootaʻi mai Lē na foafoaina i tatou e ala i agelu ma perofeta. E faaopoopo atu i lenā, na ia filifili e tusia i se tusi lana feʻau ma ana folafolaga. O nei folafolaga mai i le Atua e aafia ai lou lumanaʻi. O fea e te maua ai folafolaga a le Atua i aso nei?

O loo maua i le Afioga a le Atua lana feʻau mo i tatou. (2 Timoteo 3:16) E faapefea ona faaaogā e le Atua perofeta e tusia lana feʻau? (2 Peteru 1:21) Na tuuina e le Atua ona manatu i mafaufau o tusitala. I se tulaga talitutusa, pe a faaaogā e se tagata faipisinisi le failautusi e tusia lana tusi, e taʻua lava lenā tusi o le tusi a le tagata faipisinisi ae e lē o le failautusi. O lea, e ui na faaaogā e le Atua ni tane e tusia lana feʻau, ae o ia o Lē e ana Tusitusiga Paia.

UA MAUA LE AFIOGA A LE ATUA I LE TELE O ATUNUU

E ese le tāua o le feʻau a le Atua, ma o le mea lenā e na te faamautinoa ai ua mafai e nuu uma, ituaiga uma ma gagana uma ona aʻoaʻoina e faatatau i lenā feʻau. (Faaaliga 14:6) Ua mafai ona maua Tusitusiga Paia atoa pe i ni vaega i le silia ma le 3,000 gagana e ala i le faamanuia a le Atua, ma e sili atu lona faaliliuina nai lo o se isi lava tusi i le lalolagi.