Aua le Faatuai e Papatiso

1. O ā nisi o māfuaaga lelei e ao ai ona e papatiso?

PE E te alofa iā Ieova le Atua o Lē e foaʻiina mai meaalofa lelei uma faapea lo tatou ola? Pe e te manaʻo e faailoa atu lou alofa iā te ia? O le auala sili e faia ai faapea, o le tuuina atu lea o oe iā Ieova, ma ia faailoa atu i isi lou tuuina atu e ala i le papatisoga i le vai. O nei laasaga e mafai ona avea ai oe ma vaega o le aiga o Ieova. O le iʻuga, o le a e maua ai se Tamā po o se Uō e tausia ma taʻitaʻia oe. (Sala. 73:24; Isa. 43:​1, 2) E lē gata i lea, o le tuuina atu ma le papatisoina e te maua ai foʻi le faamoemoe o le ola e faavavau.—1 Pete. 3:21.

2. O le ā o le a tatou iloiloina i lenei mataupu?

² Pe e iai se māfuaaga e te faatalatū ai e papatiso? Pe afai o lea, e lē na o oe e iai na faalogona? E faitau miliona foʻi isi na manaʻomia ona faia ni suiga i a latou amioga ma mafaufauga, ina ia agavaa ai mo le papatisoga. Ae ua latou maelega nei e auauna iā Ieova ma le olioli. O ā ni lesona e te aʻoaʻoina mai i nisi na papatisoina i le uluaʻi senituri? Seʻi o tatou iloiloina luʻi na latou fesagaʻia, faapea lesona e aʻoaʻoina mai i a latou faaaʻoaʻoga.

PAPATISOINA TAGATA SAMARIA

3. O ā ni luʻi atonu na faigatā ai i se tagata Samaria ona papatiso?

³ O tagata Samaria i aso o Iesu, sa iai la latou lava lotu i le itu i mātū o Iutaia. A o leʻi papatisoina la se tagata Samaria, sa tatau ona ia taliaina le Afioga atoa a le Atua. Na talitonu tagata Samaria e pau tusi na faagaeeina e le Atua, e na o tusi muamua e lima o le Tusi Paia lea e mai i le Kenese e oo i le Teuteronome, ma atonu e aofia ai foʻi le tusi o Iosua. E ui lea, na faatalitalia e tagata Samaria le oo mai o le Mesia, e fua i le folafolaga a le Atua o loo i le Teuteronome 18:​18, 19. (Ioa. 4:25) Ina ia agavaa e papatiso, na manaʻomia ona latou talia Iesu o le Mesia na folafolaina mai, ma o le “toʻatele o tagata Samaria” na faia faapea. (Ioa. 4:39) O nisi o i latou na manaʻomia foʻi ona liaʻieseina ni uiga faailoga tagata sa iai faasaga i tagata Iutaia.—Luka 9:​52-54.

4. E tusa ai ma le Galuega 8:​5, 6, 14, na faapefea ona tali atu nisi o tagata Samaria i le talaʻiga a Filipo?

⁴ O le ā na fesoasoani i tagata Samaria ina ia papatiso? Ina ua faailoa atu e le faievagelia o Filipo “le Keriso iā i latou,” e iai tagata Samaria ʻna taliaina le afioga a le Atua.’ (Faitau le Galuega 8:​5, 6, 14.) E ui o Filipo o se tagata Iutaia, ae e leʻi teena o ia e tagata Samaria. Atonu na latou manatua ni fuaiupu mai i le Penetatuka o loo faailoa mai ai e lē faailoga tagata le Atua. (Teu. 10:​17-19) Na latou uaʻi atu ma le “lotogatasi i mea ua fai mai ai Filipo” e faatatau i le Keriso. Na faia e Filipo le tele o vavega e pei o le faamālōlōina o ē mamaʻi ma le tutulieseina o temoni. (Galu. 8:7) O na mea na latou iloa ai o loo faatasi le Atua ma Filipo.

5. O ā ni lesona e tatou te aʻoaʻoina mai i tagata Samaria?

⁵ Na ono avea uiga faailoga tagata po o le lē malamalama i Afioga a le Atua, e taofia ai na tagata Samaria mai i le agaʻigaʻi i luma. Peitaʻi, e latou te leʻi faia faapea. E leʻi faatalatū tagata Samaria e papatiso ina ua latou talitonu, o loo aʻoaʻoina i latou e Filipo i upu moni. Ua faapea mai le Tusi Paia: “Ina ua latou talitonu iā Filipo, o lē ua folafola atu le tala lelei o le Malo o le Atua, ma le suafa o Iesu Keriso, ona papatisoina lea o tane ma fafine.” (Galu. 8:12) Pe e te talitonu o le Afioga a le Atua o le upu moni lea, ma ua faatoʻilaloina e le upu moni le faailoga tagata e ala i le faaalia o le alofa moni, lea e mātaulia ai Kerisiano moni? (Ioa. 13:35) Pe afai o lea, ia aua e te faatalatū e papatiso ma ia e mautinoa o le a faamanuia Ieova iā te oe.

6. O le ā e te aʻoaʻoina mai i le faaaʻoaʻoga a Ruben?

⁶ Na ola aʻe Ruben i se aiga Molimau a Ieova i Siamani. Peitaʻi, a o talavou na ia fesiligia ai pe e iai moni se Atua. O le ā na fesoasoani iā te ia e foʻia ai na masalosaloga? Talu ai e leʻi tele ni mea na ia iloa e faatatau i le soifua moni o le Atua, o lea na ia filifili ai e fai nisi ana saʻiliʻiliga. Na ia faapea mai: “Na fai nisi aʻu saʻiliʻiliga ina ia ou iloa ai nisi faamatalaga moni. E tele taimi na faia ai aʻu saʻiliʻiliga i le mataupu o le evolusione.” Na faitau Ruben i le tusi, Is There a Creator Who Cares About You? ma na telē le fesoasoani a lenā tusi iā te ia. Na ia faapea ifo: “O loo soifua moni lava Ieova!” Ina ua asiasi atu foʻi Ruben i le tatou ofisa ulu, na atili ai ona ia talisapaia le vavega o le iai o se ʻauuso autasi i le lalolagi aoao. Ina ua toe foʻi o ia i Siamani, na papatiso loa i le 17 o ona tausaga. Pe afai o loo e tau masalosalo pe fesiligia nisi o mea o loo e aʻoaʻoina, e lelei la ona fai ni au saʻiliʻiliga i a tatou lomiga. O le iai o le “poto saʻo,” e mafai ona liaʻiese ai ni masalosaloga. (Efe. 4:​13, 14) Pe a e faalogo foʻi i tala i le alofa ma le autasi o tagata o Ieova i isi vaega o le lalolagi, ma e vaai i lenā lava alofa i totonu o le faapotopotoga, o le a atili ai ona e talisapaia lo tatou ʻauuso i le lalolagi aoao.

PAPATISOINA SAULO O TASO

7. O ā ni manatu o Saulo na manaʻomia ona faasaʻo?

⁷ Ia mātau le faaaʻoaʻoga a Saulo o Taso. Sa malosi o ia i le lotu Iutaia ma na vaai tagata iā te ia o se tagata tāua. (Kala. 1:​13, 14; Fili. 3:5) Sa iai le taimi na manatu ai le toʻatele o tagata Iutaia i tagata Kerisiano o ni ē ua fulitua i le upu moni, ma na matuā sauāina ai e Saulo na Kerisiano. Na manatu Saulo sa ia faia le finagalo o le Atua. (Galu. 8:3; 9:​1, 2; 26:​9-11) Ina ia talia Iesu ma papatisoina o se Kerisiano, na tatau iā Saulo ona lotomalie e onosaia foʻi le feagai ai ma sauāga.

8. (a) O le ā na fesoasoani iā Saulo ina ia papatiso? (e) E tusa ai ma le Galuega 22:​12-16, na faapefea ona fesoasoani Anania iā Saulo? (Tagaʻi foʻi i le ata.)

⁸ O le ā na fesoasoani iā Saulo ina ia papatiso? Ina ua fetalai mai Iesu mai i le lagi iā Saulo, na suluia o ia e se malamalama ma tauaso ai. (Galu. 9:​3-9) E tolu aso o anapogi Saulo, ma e mautinoa sa manatunatu loloto i le mea na tupu iā te ia. Na iʻu ina talitonu Saulo o Iesu o le Mesia, ma o loo ola ona soo e tusa ai o le tapuaʻiga moni. E mautinoa na matuā mafatia Saulo i le faia o sona sao i le fasiotia o Setefano. (Galu. 22:20) Ina ua mavae aso e tolu, ona faalatalata atu lea ma le agalelei se soo e igoa iā Anania iā Saulo, ma toe faapupula ona mata, ma faalaeiau o ia ina ia papatiso e aunoa ma le faatuai. (Faitau le Galuega 22:​12-16.) Na talia ma le lotomaulalo e Saulo le fesoasoani a Anania, ma papatisoina loa.—Galu. 9:​17, 18.

9. O ā lesona e tatou te aʻoaʻoina mai iā Saulo?

⁹ E iai ni lesona e tatou te aʻoaʻoina mai iā Saulo. Na ono avea le faamaualuga po o le fefe i tagata, e taofia ai o ia mai i le papatisoina. Peitaʻi e na te leʻi faia faapea. Na lotomaulalo Saulo ma lotomalie e faia suiga i lona olaga, ina ia avea ai ma soo o Keriso. (Galu. 26:​14, 19) Na lotomalie e avea o se Kerisiano e ui na ia iloa o le a sauāina ai o ia. (Galu. 9:​15, 16; 20:​22, 23) Ina ua mavae lona papatisoga, na faaauau ona faalagolago iā Ieova ina ia fesoasoani iā te ia i taimi faigatā. (2 Kori. 4:​7-10) O le papatisoina o oe e avea o se Molimau a Ieova, e ono iʻu atu ai i le tofotofoina o lou faatuatua po o tulaga faigatā. Peitaʻi, e mafai ona e mautinoa e fesoasoani mai pea le Atua ma Keriso iā te oe.—Fili. 4:13.

10. E faapefea ona fesoasoani le faaaʻoaʻoga a Anna iā te oe?

¹⁰ Na ola aʻe Anna i se aiga Kurd i Europa i Sasaʻe. Ina ua uma ona papatiso lona tinā, na faataga ai e le tamā o Anna o ia ina ia faia sana suʻesuʻega faale-Tusi Paia i le 9 o ona tausaga. Peitaʻi, e leʻi fiafia ai nisi o ona tauaiga na latou nonofo faatasi, ona na latou manatu o se luma mo se tasi le tuua o le tapuaʻiga a o latou tuaa. Ina ua 12 tausaga o Anna, na ia talosaga ai i lona tamā mo se faatagaga ina ia papatiso ai. Na fia iloa e le tamā po o se filifiliga lea a Anna lava ia, pe na faamalosia o ia e se tasi. Ae na ia tali atu: “Ou te alofa iā Ieova.” O lea na faataga ai o ia e lona tamā e papatiso. Mulimuli ane, na faaauau pea ona faileagaina o ia e ona tauaiga. Na faapea atu se tasi o i latou iā te ia: “Sa sili ai ona e alu e te taa solo ma e ulaula nai lo o lou alu e te Molimau a Ieova.” O le ā na fesoasoani iā Anna? Na ia faapea mai: “Na fesoasoani mai Ieova ia ou tumau, ma na lagolagosua mai foʻi loʻu tinā ma loʻu tamā.” Na tusi foʻi i lalo e Anna taimi patino na ia tofo ai i le aao o Ieova i lona olaga. Na fai ma ana masani le manatunatu i na mea, ina ia faaauau ai pea ona ia manatua auala na fesoasoani ai Ieova iā te ia. Pe afai e te popole ina neʻi e feagai ma sauāga, ia manatua o le a fesoasoani foʻi Ieova iā te oe.—Epe. 13:6.

PAPATISOINA KONELIO

11. O ā ni tulaga na ono faatalatū ai Konelio e papatiso?

¹¹ O loo taʻua foʻi i le Tusi Paia le faaaʻoaʻoga a Konelio. O ia o le taʻitaʻiʻau na “taʻitaʻia ni fitafita e toʻa 100” i le ʻautau a Roma. (Galu. 10:​1, fpl.) E foliga mai la o ia o se tagata taualoa i lona vaipanoa ma i le ʻautau. Na masani ona “ia avatu le tele o meaalofa i tagata.” (Galu. 10:2) Na auina atu e Ieova le aposetolo o Peteru ina ia faailoa atu le tala lelei iā te ia. Pe na avea le tulaga o Konelio ma māfuaaga e faatuai ai ona ia papatiso?

12. O le ā na fesoasoani iā Konelio ina ia papatiso?

¹² O le ā na fesoasoani iā Konelio ina ia papatiso? Ua faapea mai le Tusi Paia, sa “tapuaʻi faatasi o ia ma lona aiga atoa i le Atua.” Sa tatalo atu foʻi Konelio i le Atua e lē aunoa. (Galu. 10:2) Ina ua faailoa atu e Peteru le tala lelei iā Konelio, na talia e ia le Keriso ma papatisoina loa. (Galu. 10:​47, 48) E lē taumatea na lotomalie Konelio e faia so o se suiga na manaʻomia, ina ia mafai ai ona tapuaʻi iā Ieova faatasi ma lona aiga.—Iosua 24:15; Galu. 10:​24, 33.

13. O ā lesona e tatou te aʻoaʻoina mai iā Konelio?

¹³ I le pei o Saulo, na ono avea le tulaga o Konelio ma māfuaaga e faatalatū ai e avea o se Kerisiano. Peitaʻi, e na te leʻi faia faapea. Pe e manaʻomia ona e faia ni suiga tetele ina ia e agavaa ai e papatiso? Pe afai o lea, e mafai ona avea Ieova ma ou Fesoasoani. O le a ia faamanuia i au taumafaiga maumauaʻi e faatatau mataupu silisili o le Tusi Paia i lou olaga, ina ia e auauna ai iā te ia.

14. E faapefea ona fesoasoani le faaaʻoaʻoga a Tsuyoshi iā te oe?

¹⁴ Na faia e Tsuyoshi mai i Iapani ni suiga tetele i lana galuega, ina ia agavaa ai e papatiso. O ia o le pule lua o le aʻoga i Ikenobo lea e faia ai teu fugālaau. Pe a lē mafai ona alu le pule aʻoga i se maliu, ona alu lea o Tsuyoshi, ma e masani ona faia ai ni faiga faaletapuaʻiga a le lotu Puta. Peitaʻi, ina ua ia aʻoaʻoina upu moni e faatatau i ē ua maliliu, na ia iloa ai e lē mafai ona ia papatiso pe afai e faaauau ona auai i na faiga faalotu. O lea na faia ai sana faaiʻuga e lē toe aafia i faiga faaletapuaʻiga a le lotu Puta, ma na ia faailoa atu loa i le pule aʻoga. (2 Kori. 6:​15, 16) O le ā le iʻuga? Na mafai ona faigaluega pea Tsuyoshi i lana galuega e aunoa ma le aafia i faiga faalotu. Na papatiso o ia pe ā ma le tausaga talu ona amata lana suʻesuʻega faale-Tusi Paia.a Pe afai e manaʻomia ona e faia ni suiga i lau galuega ina ia faafiafia ai Ieova, e mautinoa la o le a fesoasoani mai o ia e saunia mea e tausia ai oe ma lou aiga.—Sala. 127:2; Mata. 6:33.

PAPATISOINA TAGATA KORINITO

15. O ā ni luʻi atonu na faigatā ai i se tagata Korinito ona papatiso?

¹⁵ Na lauiloa Korinito anamua i le pupū i meafaitino ma le leai o ni tapulaa tauamio. O le toʻatele o tagata na nonofo ai i inā, na ola i ni olaga e lē ōgatusa ma tapulaa a le Atua. O lea, o le matuā tele lava o luʻi e fesagaʻia e se tasi sa nofo ai i inā, pe afai e fia auauna iā Ieova. Peitaʻi, ina ua asiasi atu Paulo i lenā aai ma talaʻi atu le tala lelei i le Keriso, ʻe toʻatele tagata Korinito na faalogo i le feʻau, sa talitonu ma papatisoina i latou.’ (Galu. 18:​7-11) O lea na faaali mai ai le Alii o Iesu Keriso iā Paulo ma faapea mai: “E toʻatele oʻu tagata i lenei aai.” Na faaauau loa ona talaʻi i inā Paulo mo le tausaga ma le ʻafa.

16. O le ā na fesoasoani i nisi o tagata Korinito ina ia manumalo mai i luʻi na ono taofia ai i latou mai i le papatisoina? (2 Korinito 10:​4, 5)

¹⁶ O le ā na fesoasoani i tagata Korinito ina ia papatiso? (Faitau le 2 Korinito 10:​4, 5.) Na fesoasoani le Afioga a le Atua ma le malosi o lona agaga paia, ina ia latou faia ai ni suiga tetele i o latou olaga. (Epe. 4:12) Na mafai e tagata Korinito na taliaina le tala lelei e faatatau i le Keriso, ona latou lafoaʻia masaniga e pei o le onā, gāoi, ma le faia o faiga faatalitane.—1 Kori. 6:​9-11.b

17. O le ā se lesona e tatou te aʻoaʻoina mai i tagata Korinito?

¹⁷ Ia mātau, e ui lava ua matuā mauaa i nisi o tagata Korinito a latou masaniga leaga, ae e leʻi mafaufau ai e faigatā ona avea i latou ma Kerisiano. Na latou galulue mamafa ina ia mafai ona latou iai i le ala vāitiiti, lea e tau atu i le ola e faavavau. (Mata. 7:​13, 14) Po o iai sau masaniga leaga o loo e taumafai e manumalo mai ai ina ia e papatiso? Ia aua e te faavaivai, ae ia ōle atu iā Ieova mo le fesoasoani a lona agaga paia, ina ia e teena ai le faanaunauga e faia le mea sesē.

18. E faapefea ona fesoasoani le faaaʻoaʻoga a Monika iā te oe?

¹⁸ Na galue mamafa Monika mai i Georgia e ʻalofia le tautala i upu lē mamā ma faafiafiaga lē talafeagai, ina ia agavaa ai e papatiso. Na ia faapea mai: “A o oʻu talavou, na ou maua le malosi e faia ai suiga e ala i le tatalo. Na silafia e Ieova na ou manaʻo e faia le mea saʻo, ma na ia fesoasoani mai pea ma taʻitaʻia aʻu.” Na papatiso Monika i le 16 o ona tausaga. Pe e iai ni au masaniga e manaʻomia ona e lafoaʻia, ina ia e auauna ai iā Ieova? Ia talosaga atu pea iā te ia mo le malosi e faia ai suiga, ona ia matuā foaʻi mai lea o lona agaga paia.—Ioa. 3:34.

O LE FAATUATUA E SIITIA AI MAUGA

19. O le ā e fesoasoani iā te oe ina ia foʻia luʻi e pei o ni mauga? (Tagaʻi foʻi i le ata.)

¹⁹ E tusa lava po o ā tulaga po o luʻi e faafaigatā ai ona e papatiso, ae ia e mautinoa e alofa Ieova iā te oe, ma e finagalo ia avea oe ma vaega o lona ʻauaiga. Na fetalai Iesu i nisi o ona soo i le uluaʻi senituri: “Afai e pei lo outou faatuatua o le fatu o le sinapi, tou te fai atu i lenei mauga, ʻIa siitia oe i o,’ ona siitia ai lea, ma e leai se mea tou te lē mafaia.” (Mata. 17:20) O i latou na fetalai atu i ai Iesu, e leʻi tele ni tausaga talu ona faatasi ma ia, ma na manaʻomia pea ona faamalosia lo latou faatuatua. Peitaʻi, na faamautinoa atu i ai e Iesu, pe afai e faaauau pea ona faamalosia lo latou faatuatua, o le a fesoasoani mai la Ieova e foʻia luʻi e pei o ni mauga. E mafai foʻi ona faia faapea e Ieova mo oe!

20. E faapefea ona fesoasoani iā te oe faaaʻoaʻoga a Kerisiano i le uluaʻi senituri ma aso nei?

²⁰ Pe afai e iai se luʻi po o se mea o loo e mātauina e faafaigatā ai ona e papatiso, ia vave ona e gaoioi e manumalo mai i lenā luʻi. Ia faamalosia ma faalaeiauina oe e faaaʻoaʻoga a Kerisiano i le uluaʻi senituri ma aso nei. Tau ina ia faalaeiauina ma uunaʻia oe e a latou faaaʻoaʻoga, ina ia tuuina atu oe iā Ieova ma papatisoina. O le filifiliga sili lea e mafai ona e faia!