Pe e Mafai Ona Fesoasoani le Tusi Paia iā te Oe e Onosaʻia ai Suiga Ogaoga o le Tau?

Po o oe o se tasi mai i le faitau miliona o ē ua aafia i suiga ogaoga o le tau? E eseese uma tulaga leaga o le tau ma ona aafiaga. O afā ma asiosio e mafai ona faapogaia ai matagi malolosi ma lologa. O timuga mamafa e māfua ai eleele solo, ma e mafai e matagi malolosi ona faapogaia le emo o uila ma amata ai mū tetele. E tutusa lelei le leaga o aafiaga o lāmala, o le matuā ova o le vevela, ma le tetele o le kiona.

I le tele o vaipanoa o le lalolagi, ua matuā faatupulaʻia ma faateteleina suiga ogaoga o le tau. Ua lipotia mai e le International Federation of Red Cross and Red Crescent Societies e faapea, “O loo faatupulaʻia pea le fuainumera o tagata e aafia i mala faalenatura, ona o le faateteleina o lologa, matagi malolosi ma lāmala. O le iʻuga, ua toʻatele tagata ua maliliu, o isi ua faigatā le tausiga o aiga, ma o le faitau miliona ua leai ni fale e nonofo ai i tausaga taʻitasi.”

Pe a tutupu nei mea, e mafatia tagata e lē gata i le itu faaletino ae faapea le itu taufaalogona. Atonu e latou te mafatia ona o le leiloloa o a latou meafaitino, leai ni fale, po o le maliu foʻi o sē e pele iā i latou.

Pe afai o e mafatia ona o suiga ogaoga o le tau, e mafai ona fesoasoani le Tusi Paia iā te oe. Ua saunia mai i le Tusi Paia faamāfanafanaga, le faamoemoe, ma fautuaga aogā lea ua fesoasoani i le toʻatele o ē na aafia i suiga ogaoga o le tau. (Roma 15:4) E mafai foʻi ona taliina ai le fesili tāua o loo tuufesili ai le toʻatele: Aiseā ua faataga ai e le Atua lenei mea e tupu? Po o ia faasalaina aʻu?

O suiga ogaoga o le tau i aso nei e lē o se faasalaga mai i le Atua

O loo aʻoaʻo i le Tusi Paia e lē o le Atua e māfua ai mafatiaga o loo fesagaʻia e tagata. Ua faamautinoa mai i le Tusi Paia, “e lē mafai ona faaosoosoina le Atua i mea leaga. E lē faaosooso atu foʻi o ia i se tasi.” (Iakopo 1:13) O lona uiga, e lē o ia e māfua ai suiga ogaoga o le tau o loo fesagaʻia e tagata i aso nei.

O loo faamauina i le Tusi Paia, na faaaogā e le Atua malosiaga faalenatura e faasala ai tagata amioleaga. Ae o na mea na tutupu e lē pei o le tulaga leaga o le tau i aso nei, lea e oo mai e aunoa ma ni lapataʻiga, ma e aafia uma ai tagata lelei ma tagata leaga. I se faaeseesega, ua faaalia i le Tusi Paia e puipuia i taimi uma e le Atua tagata e lē sala, aumaia lapataʻiga a o leʻi oo mai se mala, ma faamatala mai māfuaaga ua ia faia ai faapea. O se faaaʻoaʻoga, na fetalai le Atua i le māfuaaga na ia aumaia ai le Lolo i le lalolagi i aso o Noa, na ia muaʻi aumaia lapataʻiga a o leʻi taitai ona ia faaoo mai le Lolo, ma na ia puipuia foʻi Noa ma lona aiga.—Kenese 6:13; 2 Peteru 2:5.

Ina ia e malamalama atili i le māfuaaga e iloa ai o mala faalenatura i aso nei e lē o se faasalaga mai i le Atua, tagaʻi i le mataupu, “What Does the Bible Say About Natural Disasters?”

E manatu mamafa le Atua i ē e aafia ona o suiga ogaoga o le tau

Ua faailoa mai i le Tusi Paia o Ieovaa o le Atua e manatu mamafa ma tigā alofa. Seʻi mātau nisi o fuaiupu faamāfanafanaloto nei.

• Isaia 63:9: “Na mafatia [le Atua] i taimi o o latou mafatiaga.”

  Uiga: E matuā faanoanoa Ieova pe a ia silasila mai i tagata o loo mafatia.

• 1 Peteru 5:7: “O loo manatu mamafa mai o ia iā te outou.”

  Uiga: E manatu mamafa mai Ieova i lou lelei.

O le manatu mamafa ma le tigā alofa o Ieova e uunaʻia ai o ia e gaoioi. E na te saunia faamāfanafanaga e ala i fautuaga aogā mai i le Tusi Paia, ma le faamoemoe mautinoa i le lumanaʻi, lea o le a aunoa ma mala faalenatura ona o suiga ogaoga o le tau.—2 Korinito 1:3, 4.

Pe a lē toe avea suiga ogaoga o le tau ma faafitauli

O loo faailoa mai i le Tusi Paia le folafolaga a Ieova, e na te “avatu iā te outou se lumanaʻi ma se faamoemoe.” (Ieremia 29:11) O lona finagalo ia olioli tagata uma i le lalolagi parataiso, e aunoa ma le fefefe i aafiaga o le tau.—Kenese 1:28; 2:15; Isaia 32:18.

O le a aumaia e le Atua lenā lumanaʻi e ala mai i lona Malo, o se pulega faalelagi lea ua pule ai Iesu. (Mataio 6:10) Na iai iā Iesu le atamai ma le mana e taofia ai mala faalenatura. A o iai Iesu i le lalolagi, na ia faaalia mai lona mana e pulea ai le tau. (Mareko 4:37-41) O le a pule foʻi o ia ma le malamalama ma le atamai, e ala i le aʻoaʻo o tagata i auala e puipuia ai le siʻosiʻomaga ma ia aua neʻi faaleagaina. (Isaia 11:2) Pe a pule Iesu, o le a lē toe mafatia tagata i suiga ogaoga o le tau.

Atonu e te taumānatu, ʻO afea o le a faaaogā ai e Iesu lona mana e pulea ai le tau?’ Ina ia tali lenā fesili, tagaʻi i le mataupu “O Afea o le a Pule ai le Malo o le Atua i le Lalolagi?”

Fesagaʻia suiga ogaoga o le tau i aso nei

E fesoasoani iā te oe fautuaga i le Tusi Paia a o leʻi tupu, a o tupu, ma pe a māeʻa se mala ona o suiga ogaoga o le tau.

• 

  A o leʻi tupu se mala: Ia sauni e vave gaoioi.

  Manatu o le Tusi Paia: “O lē ua iai le utaga mamao e na te iloa atu le mala ma lafi ai, a o lē ua leai se poto masani e alu atu pea o ia ma malaia ai i āuga leaga.”—Faataoto 22:3.

  Uiga: Ia mataala i ni lamatiaga e ono tulaʻi mai i lou vaipanoa ina ia e vave gaoioi ai ma puipuia lou aiga.

  Mea na tupu: “I le aso na matou sosola ese mai ai i se mū tele, na matou lava tapena. Na iai a matou ato o loo iai mea manaʻomia mo faalavelave faafuaseʻi. Na iai a matou fualaau. Na iai foʻi o matou lavalava. Na matuā lē mautonu le toʻatele o tagata, ma na lē mafai ona toe mafaufau lelei. Ae na iai mea uma na matou manaʻomia, ma o le mea lenā na ou lotofaafetai ai!”—Tamara, Kalifonia, Amerika.

• 

  A o tupu se mala: Ia uaʻi atu i mea e sili ona tāua.

  Manatu o le Tusi Paia: “Aua e lē ola se tasi i le tele o ana mea ua iā te ia.”—Luka 12:15.

  Uiga: E sili atu ona tāua le ola nai lo o meafaitino.

  Mea na tupu: “Ina ua faaleagaina e le afā malosi o Lawinb le matou fale, na lē mafai ona ou toe mafaufau lelei po o le ā laʻu mea e fai. Ae e tasi le mea na ou faia, o loʻu tatalo faatauanau iā Ieova le Atua. Na ou iloa ai, e na o meafaitino ua leiloloa ae e leai se ola o se tasi o i matou ua maʻimau ai.”—Leslie, Filipaina.

• 

  Pe a māeʻa se mala: Ia mafaufau i le asō, ma aua le popole i le aso a taeao.

  Manatu o le Tusi Paia: “Ia aua neʻi outou popole mo le aso a taeao, auā e iai foʻi popolega o le aso a taeao.”—Mataio 6:34.

  Uiga: Aua le soona popole i faafitauli i le lumanaʻi.

  Mea na tupu: “Ina ua lolovaia lo matou fale i le afā malosi o Irma, e tele filifiliga na tatau ona ou faia, ma na matuā ou popole ai lava. Na ou taumafai e faatatau fautuaga mai i le Tusi Paia, ia mafaufau i le asō ae aua le soona popole i le aso a taeao. Na ou iloa ai, o le fesoasoani a Ieova na mafai ai ona ou onosaʻia nei tulaga, e sili atu nai lo o mea na ou mafaufau i ai.”—Sally, Florida, Amerika.

Mo nisi fautuaga aogā, tagaʻi i le mataupu “Pe a Tupu se Mala—Mea e Mafai Ona Fai.”