Jeremiya
38 Zvino Shefatiya mwanakomana waMetani, Gedhariya mwanakomana waPashuri, Jukari+ mwanakomana waSheremiya, naPashuri+ mwanakomana waMarikija vakanzwa mashoko akanga achitaurirwa vanhu vese naJeremiya, achiti: 2 “Zvanzi naJehovha, ‘Munhu anoramba ari muguta rino achaurayiwa nebakatwa, nenzara, nedenda.*+ Asi munhu achaenda kunozviisa mumaoko evaKadheya* acharamba achirarama uye achava neupenyu hwake* sechinhu chaapamba* uye achapona.’+ 3 Zvanzi naJehovha, ‘Guta rino richatoiswa mumaoko euto ramambo weBhabhironi, uye acharitora.’”+
4 Machinda akati kuna mambo: “Tapota, itai kuti murume uyu aurayiwe,+ nekuti mashoko iwayo aari kutaura ari kunetesa mauto* asara muguta rino nevanhu vese. Nekuti murume uyu haasi kuda kuti vanhu ava vave nerugare asi ari kuda kuti vawirwe nedambudziko.” 5 Mambo Zedhekiya akapindura kuti: “Ari mumaoko enyu, mambo haana zvaanogona kuita kuti akudzivisei.”
6 Saka vakatora Jeremiya, vakamukanda mumugodhi wemvura waMarikija mwanakomana wamambo, waiva muChivanze cheVarindi.+ Vakadzikisa Jeremiya netambo. Zvino mumugodhi macho makanga musina mvura, maingova nematope chete, uye Jeremiya akatanga kunyura mumatope acho.
7 Ebhedhi-mereki+ muItiopiya, uyo aiva mukuru wemuimba yamambo,* akanzwa kuti vakanga vaisa Jeremiya mumugodhi. Zvino mambo akanga akagara paGedhi raBhenjamini,+ 8 saka Ebhedhi-mereki akabuda muimba yamambo* akataura namambo, achiti: 9 “Ishe wangu mambo, varume ava vaitira muprofita Jeremiya zvakaipa! Vamukanda mumugodhi, uye achafira imomo nenzara, nekuti muguta hamusisina chingwa.”+
10 Mambo akabva arayira Ebhedhi-mereki muItiopiya, achiti: “Tora varume 30 muno, ubudise muprofita Jeremiya mumugodhi asati afa.” 11 Saka Ebhedhi-mereki akatora varume vacho, akapinda muimba yamambo,* akaenda munzvimbo iri pasi pemunochengeterwa pfuma,+ uye vakatora mamvemve nemachira akasakara imomo, vakazvidzikisira Jeremiya mumugodhi netambo. 12 Ebhedhi-mereki muItiopiya akabva ati kuna Jeremiya: “Ndapota, isa mamvemve nemachira akasakara muhapwa dzako wobva wazoisa tambo.” Jeremiya akaita saizvozvo, 13 uye vakadhonza Jeremiya netambo, vakamubudisa mumugodhi macho. Jeremiya akaramba ari muChivanze cheVarindi.+
14 Mambo Zedhekiya akaita kuti muprofita Jeremiya ashevedzwe kuti auye kwaaiva kusuo rechitatu, riri muimba yaJehovha, uye mambo akati kuna Jeremiya: “Pane zvandiri kuda kukubvunza. Usawana chaunondivanzira.” 15 Jeremiya akabva ati kuna Zedhekiya: “Kana ndikakuudzai, hamumboregi kundiuraya. Uye kana ndikakupai mazano, hamusi kuzonditeerera.” 16 Saka Mambo Zedhekiya akapika kuna Jeremiya vari vega, achiti: “NaJehovha mupenyu, akatipa upenyu huno, handikuurayi, uye handizokuisi mumaoko evarume ava vari kuda kukuuraya.”*
17 Jeremiya akabva ati kuna Zedhekiya: “Zvanzi naJehovha, Mwari wemauto, Mwari waIsraeri, ‘Kana mukazviisa mumaoko emachinda amambo weBhabhironi, muchapona* uye guta rino harizopiswi nemoto, uye imi neimba yenyu hamuzofi.+ 18 Asi kana mukarega kuzviisa mumaoko emachinda amambo weBhabhironi, guta rino richaiswa mumaoko evaKadheya, uye vacharipisa nemoto,+ uye hamuzopukunyuki mumaoko avo.’”+
19 Mambo Zedhekiya akabva ati kuna Jeremiya: “Ndiri kutya vaJudha vaya vakatizira kuvaKadheya, nekuti kana ndikaiswa mumaoko avo, vanogona kundiitira utsinye.” 20 Asi Jeremiya akati: “Hamuzoiswi mumaoko avo. Ndapota, teererai inzwi raJehovha pane zvandiri kukuudzai, uye zvichakufambirai zvakanaka, uye mucharamba muchirarama.* 21 Asi kana mukaramba kuzviisa mumaoko emachinda acho, izvi ndizvo zvandaratidzwa naJehovha: 22 Vakadzi vese vasara muimba yamambo* weJudha vari kuendeswa kumachinda amambo weBhabhironi,+ uye vari kuti,
Vaita kuti tsoka yenyu inyure mumatope.
Iye zvino vatendeuka vakatiza.’
23 Vari kuendesa madzimai enyu ese nevanakomana venyu kuvaKadheya, uye hamuzopukunyuki mumaoko avo, asi muchabatwa namambo weBhabhironi,+ uye muchapisisa guta rino nemoto.”+
24 Zedhekiya akabva ati kuna Jeremiya: “Usaita kuti pave neanoziva zvinhu izvi, kuti urege kufa. 25 Uye kana machinda akanzwa kuti ndataura newe ouya kwauri oti, ‘Tapota tiudze zvawaudza mambo. Usava nechaunotivanzira uye hatizokuurayi.+ Mambo ati chii kwauri?’ 26 uti kwaari, ‘Ndanga ndichikumbira mambo kuti arege kundidzorera kuimba yaJehonatani kuti ndirege kufira ikoko.’”+
27 Papera nguva, machinda ese akapinda maiva naJeremiya akamubvunza. Akaaudza zvese zvaakanga anzi namambo ataure. Saka hapana zvavakazotaura naye, nekuti hapana akanga avanzwa vachitaurirana. 28 Jeremiya akaramba ari muChivanze cheVarindi kusvika pazuva rakatorwa Jerusarema;+ akanga achirimo pakatorwa Jerusarema.+