Mibvunzo Inobva Kuvaverengi

Dhanieri akanga ari kupi apo vaHebheru vatatu vakaedzwa pamberi pechifananidzo chikuru chakanga chamiswa naNebhukadhinezari pabani reDhura?

Bhaibheri haritauri, saka nhasi hapana munhu anogona kutaura kuti Dhanieri akanga ari kupi pakuedzwa ikoko.

Vamwe vakati chinzvimbo chaDhanieri muhurumende kana kuti ropafadzo dzaaiwana kubva kuna Nebhukadhinezari dzakanga dzakakwirira kupfuura dzaShadraki, Meshaki, naAbhedhinego uye kuti Dhanieri akanga asingasungirwi kuenda kubani reDhura. Dhanieri 2:49 inoratidza kuti pane imwe nguva akanga ane nzvimbo yakakwirira kupfuura yeshamwari dzake nhatu. Asi hatingavi nechokwadi chokuti izvi zvakamuita kuti arege kuungana nevamwe pamberi pechifananidzo.

Vachiedza kutsanangura kusavapo kwaDhanieri, vamwe vakati zvimwe akanga asipo nebasa rehurumende kana kuti zvichida airwara saka akanga asingakwanisi kuvapo. Zvisinei, Bhaibheri haritauri izvozvo. Kunyange zvazviri, zvakaitwa naDhanieri zvinofanira kunge zvakanga zvisingashorwi, nokuti dai zvaidaro, vakuru vakuru vehurumende veBhabhironi vakanga vane shanje vangadai vakashandisa izvozvo kumupomera. (Dhanieri 3:8) Chiitiko chacho chisati chaitika uye chapera, Dhanieri akazviratidza kuva akatendeka, akavimbika kuna Mwari pasinei nokuti aitarisana nemiedzo ipi. (Dhanieri 1:8; 5:17; 6:4, 10, 11) Saka kunyange zvazvo Bhaibheri risingatauri kuti nei Dhanieri akanga asipo pamapani eDhura, tinogona kuva nechivimbo chokuti akanga akatendeka kuna Jehovha Mwari asingabvumirani pane zvisina kufanira.—Ezekieri 14:14; VaHebheru 11:33.